2017-09-22 08:28:25 clouds 27o High | Kigali Rwanda

Dukurikire:
 
 

Togo: Barahamagarira abaturage kwigaragambya

Yanditswe na IMVAHO NSHYA

Kuya 2017-08-26 13:59:21

 
Share on:
 
Yasuwe:201
 
Yavuzweho:200
 
10
 
10

Imitwe ya politiki itavuga rumwe n’ubutegetsi bwa Togo, irahamagarira abaturage bose kuzigaragambya ku wa 30 na 31 Kanama 2017, mu rwego ngo rwo guharanira impinduramatwara. Aba banyapolitiki batanze iri tangazo ku wa Gatatu w’iki cyumweru birengagije ko imyigaragambyo yindi yabaye ku 19 Nyakanga 2017 yahitanye inzirakarengane 2 abarenga 10 bagakomereka.

JPEG - 186.4 kb
Aba ni abarwanashyaka b’imitwe ya politiki itavuga rumwe na Guverinoma ya Togo bigaragambyaga i Lomé mu mwaka wa 2005 (Foto SIPA)

Ibitangazamakuru Jeune Afrique na AFP, ibiro ntaramakuru by’Abafaransa, bitangaza ko muri iryo tangazo ryashyizwe ahagaragara n’imitwe ya politiki 5 y’abatavuga rumwe n’ubutegetsi bwa Togo, irimo ubutumwa ko biyemeje kurwana uru rugamba rwo gusaba ko ubutegetsi buhinduka kuzageza babigezeho.

Iti «Twiyemeje twese dushyize hamwe ko muri Togo hagomba kuba amavugurura y’inzego za politiki. Tuzaba tunasaba ko bagenzi bacu bafunzwe n’inzego z’umutekano mu myigaragambyo yo ku wa 19 Nyakanga barekurwa nta kindi gisabwe». Iyo myigaragambyo yo mu kwezi gushize, ngo yari yateguwe PNP (Parti National Panafricain).

Iyi mitwe ya politiki itavuga rumwe na Guverinoma yishyize hamwe mu gutegura imyigaragambyo yo mu mpera z’uku kwezi, iranasaba ko hakorwa anketi yihariye, ngo igakorwa n’itsinda ridafite aho ryegamiye. Iti «Iyo anketi igomba kugaragaza abagize uruhare mu bwicanyi bwakozwe ku wa 19 Nyakanga, kandi ababukoze bagashyikirizwa ubutabera bukabahana hashingiwe ku buremere bw’icyaha buri wese yakoze». Abo bantu 2 bishwe ngo bazize amasasu ahitwa Sokodé, ni kuri bilometero 300 z’umurwa mukuru, Lomé.

Jeune Afrique itangaza ko abantu 66 ari bo ngo batawe muri yombi barafungwa bakekwaho gutegura imyigaragambyo yahitanye ubuzima bw’abenegihugu 2 abandi benshi barakomereka.

Mu kiganiro yagiranye n’abanyamakuru ku wa 20 Nyakanga 2017 i Lomé, Minisitiri w’ubutabera Pius Agbetomey yagize ati «Ku birebana n’abantu bishwe mu myigaragambyo, iperereza ryo kumenya uburyo bishwemo ryaratangiye». Ejo ku wa Gatanu Cap 2015 na PNP bawufashe nk’umunsi wo kwibuka no guha icyubahiro abo bagenzi babo bazize imyigaragambyo yo mu kwezi gushize.

Abatavuga rumwe n’ubutegetsi bwa Togo, bamaze imyaka 10 basaba ko Itegeko Nshinga ryavuguruwe mu mwaka wa 2002 ryasubizwa umwimerere waryo kugira ngo hirindwe ibya manda ebyiri ziri hejuru y’imyaka 10.

KAYIRA ETIENNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE