2017-11-21 14:43:49 clouds 27o High | Kigali Rwanda

Dukurikire:
 
 

Huye:Meya Kayiranga yibukije urubyiruko kubyaza umusaruro amahirwe aruzengurutse

Yanditswe na IMVAHO NSHYA

Kuya 2017-08-26 13:50:12

 
Share on:
 
Yasuwe:132
 
Yavuzweho:200
 
10
 
10

Umuyobozi w’Akarere ka Huye Kayiranga Muzuka Eugene, arasaba urubyiruko kubyaza umusaruro amahirwe ari mu Rwanda, aho yagaragaje ko hari amahirwe menshi atarabonekaga kera.

JPEG - 4 Mb
Meya Kayiranga Muzuka Eugene (hagati) aganira n’urubyiruko (Foto Nshimiyimana E)

Meya Muzuka yagarutse kuri ibi ubwo yaganirizaga abagize inama y’igihugu y’urubyiruko bo mu Karere ayoboye, aho yabagaragarizaga amahirwe bakwiye kubyaza umusaruro ndetse bakanafasha imiryango yabo kuyabyaza umusaruro.

Yagize ati "Amahirwe mufite ya mbere ni Nyakubahwa Perezida wa Repubulika Paul Kagame, inshuti y’urubyiruko, ubakunda kandi ubifuriza gutera imbere kuko ibyo mubona by’amashuri, ikoranabuhanga, za VUP, imihanda myiza nk’iyo mubona yabegerejwe nta bwo byari bihari, mukwiye kubikoresha mukiteza imbere."
Kayiranga Muzuka Eugene, yibukije urubyiruko ko mu gihe cye hariho amashuri make kandi nayo yigwaga na bake bitewe n’impamvu zirimo ivangura.

Yagize ati "Twebwe twigaga bahora baduhagurutsa mu ishuri buri munsi ukibaza igituma baguhagurutsa kandi n’ubushize baraguhagurukije wajijisha nabyo bigateza ibibazo, ariko bagira ngo bazageze igihe cyo kukwica bakuzi neza batakwibeshyaho."
Avuga ko bitewe n’ubuyobozi buri wese yibonamo ubu amashuri akinguriye buri wese ubishaka, bityo ayo akaba ari amahirwe urubyiruko rukwiye kubyaza umusaruro.

Ati "Kera warangizaga amashuri atandatu abanza bati yarangije, ariko ubu uriga ugasaza wiga, umuntu yiga amashuri ashaka. Nimubwire abana b’abaturanyi aya mahirwe y’uburezi bw’imyaka 12 bayabyaze umusaruro, amashuri y’imyuga muyabyaze umusaruro, imihanda muyibyaze umusaruro, VUP muyibyaze umusaruro, ikoranabuhanga muribyaze umusaruro, mituweli muyibyaze umusaruro ubwanyu n’imiryango yanyu."

Yibukije urubyiruko ko kugeze na n’ubu muri VUP harimo amafaranga menshi akeneye kubyazwa umusaruro, bityo abasaba kuyafata bakayakoresha.

Umuhuzabikorwa w’inama y’igihugu y’urubyiruko, Muvandimwe Fred, na we yemeza ko koko amahirwe urubyiruko rwahawe ahari akandi agaragarira buri wese. Yagize ati "Amahirwe y’ibanze dufite nk’urubyiruko, ni uruhare twahawe n’igihugu muri politiki y’igihugu, kuko ubu turi mu nzego zose zifata ibyemezo yewe no mu nteko ishinga amategeko urubyiruko turahagarariwe."

Muvandimwe na we yemeza ko uburezi kuri bose ari amahirwe urubyiruko rukwiye kubyaza umusaruro ndetse rukarushaho no gukorera hamwe rukizigama rugakora amakoperative ndetse bakagira ibikorwa bitanga akazi.

Umubyeyi Marie Joyeuse, na we wari witabiriye ibi biganiro aganira n’Imvaho Nshya yemeje ko amahirwe bayabona kandi bazayabyaza umusaruro ndetse bakanafasha buri munyarwanda kuyamenya no kuyabyaza umusaruro.

Ati "Buriya ubuyobozi bunadushishikariza gukorera hamwe kandi iyo umwe azanye make undi akazana make ashyirwa hamwe mukabona inguzanyo bityo mukaba mwakwinjira mu ishoramari."

NSHIMIYIMANA EMMANUEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE