2017-09-20 12:30:19 clouds 27o High | Kigali Rwanda

Dukurikire:
 
 

Rusizi:Biyemeje kuba aba mbere mu kurinda ibikorwa by’iterambere bagezeho

Yanditswe na IMVAHO NSHYA

Kuya 2017-08-23 09:53:13

 
Share on:
 
Yasuwe:53
 
Yavuzweho:200
 
10
 
10

Abaturage bo mu murenge wa Butare mu karere ka Rusizi, baravuga ko biyemeje gufata iya mbere mu kurinda uwakwangiza ibyiza bamaze kugeraho, ndetse bagaharanira gukoresha imbaraga nyinshi mu kubyongera.

JPEG - 448.9 kb
Bahamya ko iterambere bagezeho ntawaryangiza barebera (Foto Bahuwiyongera S)

Ubwo bamwe muri bo baganiraga n’Imvaho Nshya, bavuze ko hari byinshi bishimishije bamaze kugeraho, bimwe bivuye mu mbaraga zabo bwite mu bikorwa by’umuganda, nk’aho hari amashuri y’abana babo bagiye biyubakira, za poste de santé bagizemo uruhare rukomeye mu kubaka, n’imihanda ibahuza mu tugari igenda iba myinshi, n’ibindi... bakavuga ko badashobora kwihanganira uwabyangiza bareba.

Bavuga ko kera impamvu n’ibyakorwaga bitarambaga ari uko ngo batabibonaga nk’ibyabo kuko batabaga bagize uruhare mu kubyubaka, bakabona n’ubuyobozi butaritaga ku byo bwabaga bwakoze ngo birindwe, ari yo mpamvu nk’umuntu yasangaga hari abangiza robine akihitira, usanze bangiza inkingi y’amashanyarazi akumva nta cyo bimubwiye akikomereza, n’ibindi nk’ibyo, ariko ubu barakoresha ukuboko kumwe bubaka ukundi kurinze ibyo bubatse.

Nshimiyimana Manase, umwe muri aba baturage, yavuze ko mbere kubona ishuri ryisumbuye kwari ukurinda kujya kurireba i Gihundwe mu mujyi wa Rusizi, cyangwa mu murenge wa Mururu mu bilometero birenga 70, kubona ivuriro na byo ngo byari ingume, ariko ubu amashuri y’uburezi bw’ibanze yarabegerejwe bafite na bo abana bajya muri za kaminuza, barivuza igihe barwaye, n’ibindi ngo bakaba batakwemera uwabasubiza inyuma.

Yagize ati “Iyo mbona twe twarakoraga ibilometero birenga 8 tujya kwiga mu mashuri abanza ubu abana bacu bakaba bakora ikilometero kimwe kandi natwe twaragize uruhare mu kubaka amashuri y’abana bacu, kuba nta we ukirembera mu rugo ino kandi benshi baricwaga n’indwara bakabeshyera abaturanyi ngo babarogeye no kuba dufite amazi meza n’amashanyarazi mu tugari tumwe ni intambwe ikomeye dukwiye kwishimira yatewe.”

Yakomeje agira ati “Ntidushobora kubona uwangiza robine ngo twihitire nka kera cyangwa ngo umwana wanjye amene ikirahure cy’idirishya ry’ishuri mbifate nk’ibisanzwe, cyangwa ngo abantu bigabize pariki y’igihugu ya Nyungwe bajye kuyangiza ngo baricamo inyamaswa tureba kandi tuzi ko amafaranga avuye ku madovize aziturukaho atwubakira amashuri meza, cyangwa ngo umuntu yibe insinga z’amashanyarazi tumwihorere.Twamaze kumenya ko ibyo tugeraho bituvuna ntidushobora kubikinisha.”

Bavuga ko nk’ikibazo cy’abana bataga amashuri abaturage ubwabo bagihagurukiye, abasindaga bakangiza ibikorwa remezo na bo bafatiwe ingamba, ku buryo aho gutanga amafaranga basana ibyo bagombaga kurinda bayatanga bubaka ibindi.

Ubwo yasuraga aba baturage mu gutaha amashuri, umuyobozi w’aka karere wungirije ushinzwe imibereho myiza y’abaturage, Nsigaye Emmanuel, yababwiye ko ibigerwaho byose biba byatwaye abanyarwanda akayabo k’amafaranga ava mu misoro yabo, bikaba bigomba gufatwa neza, buri wese akumva uruhare rwe mu gucungira umutekano ibikorwa remezo biri mu murenge, uwo babonye agira icyo yangiza bakamushyikiriza inzego zibishinzwe zikamugira inama, bakanakomeza kongera ibyo bagezeho, aho badashoboye inzego z’ubuyobozi zikazajya zibunganira.

Ati “Niba ugeze ku gato aho kukangiza ngo utange amafaranga yo kongera kugasana kandi yagombye gutangwa mu kugera ku kandi, ahubwo wagacungira umutekano, ya mafaranga akubaka ibindi, ni ho tuzatera imbere mu bikorwa no mu myumvire kuko iyo imyumvire ikiri hasi hari byinshi byangirika, ariko kuba mumaze kuzamura imyumvire mu kurinda ibyo mugeraho hari icyizere ko iterambere ryanyu rizihuta.”

BAHUWIYONGERA SYLVESTRE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE