2017-11-22 09:53:14 clouds 27o High | Kigali Rwanda

Dukurikire:
 
 

Ubuyobozi bw’akarere ka Rubavu bwahagurukiye ikibazo cy’umunuko uva mu ibagiro

Yanditswe na IMVAHO NSHYA

Kuya 2017-08-16 15:13:46

 
Share on:
 
Yasuwe:80
 
Yavuzweho:200
 
10
 
10

Ubuyobozi bw’akarere ka Rubavu bwiyemeje gukora igenzura ku kibazo kimaze iminsi kigaragazwa n’abaturage, bavuga ko babangamiwe n’umunuko uturuka mu ibagiro rya kijyambere rya Gisenyi, ukabasanga mu ngo zabo.

Bamwe mu baturage baturiye ibagiro rya kijyambere riri mu murenge wa Gisenyi bavuga ko uyu munuko uva muri iri bagiro ubabangamira cyane mu masaha ya mu gitondo.

Hakizimana Etienne, umuturage uturiye iri bagiro, yagize ati “Iyo bigeze mu masaha ya mu gitondo mu rukerera ujya kumva wiryamiye ukumva umwuka mubi urazamutse, ubwo urumva nta bwo wafata icyayi cyangwa ibiryo bya mu gitondo muri uwo munuko, biza kuba ikibazo gikomeye iyo abashyitsi bari kuza kudusura bamwe bahageze ntibifuze kuzagaruka, tugiye gushyirwa mu kato kubera umunuko ukabije, turasaba ko ubuyobozi bwagira icyo bukora. »

JPEG - 88.6 kb
Ibagiro rya Gisenyi riri hagati mu ngo z’abaturage

Uyu muturage avuga ko uyu munuko uterwa n’amase avanze n’indi myanda nk’amaraso biba birunze hafi y’ingo zabo. Havugimana Alphonse ushinzwe ubuvuzi bw’amatungo muri iri bagiro, avuga ko hari ubwo bagira ikibazo cy’uko icyobo cyoherezwamo amaraso n’ibindi biva mu nda y’amatungo gishobora kuziba, bigatera umunuko.

Yagize ati “Nta bwo umuntu yavuga ko hari byacitse, hari ubwo icyobo tumenamo amaraso y’amatungo gishobora kuziba bitewe n’akantu kaguyemo, bigateza umunuko, ariko iyo tubimenye turabikosora umunuko ugashira, gusa ntitwawuhakana.”

Akomeza avuga ko ikibazo abaturiye ibagiro bafite cy’umunuko uva mu ibagiro bitoroshye ko gikemuka, agahamya ko uwakoze ikosa ari uwatuje abaturage ahubatse ibagiro kuko ngo baje nyuma y’uko ryubakwa.

Ubuyobozi bw’Akarere ka Rubavu buvuga ko ikibazo bwakunze kumva kijyanye n’umunuko uva muri iri bagiro ari icy’amazi, ariko ngo bugiye gukurikirana niba harimo ibindi bibazo by’umwanda bishobora guteza uwo munuko bishakirwe umuti urambye.

Murenzi Janvier, umuyobozi wungirije w’akarere ushinzwe ubukungu, avuga ko haramutse hakozwe igenzura bagasanga ibiva mu matungo yabazwe ari byo biteza uwo munuko, bashobora kujya babaga amatungo ibiyavamo nk’amaraso n’ibindi bitari inyama bikajyanwa hanze aho kubikwa mu ibagiro.

Ati «Hari uburyo niba koko ibyo biva mu matungo ari byo biteza umunuko bashobora no kubijyana hanze y’aho hantu, dufite ikimoteri, dufite ahandi hantu hanze y’umujyi, biramutse bigaragaye ko ari icyo kibazo cy’ibiva mu matungo, uburyo bwose burashoboka ko abantu bamara kubaga ibyasigaye babaga bakabijyana kure hategereye abantu.”

Uyu muyobozi kandi yagarutse ku kibazo cy’urusaku rw’amatungo abagwa rubangamira abaturage, avuga ko hazakorwa ibishoboka byose umuturage agatekana.

Yagize ati “Aho iri bagiro ryubatse ni hagati y’amazu, bitandukanyijwe n’igikuta, ni ikibazo kuko urusaku rwo nta kuntu rutabageraho. Tugiye kugirana ibiganiro n’abarikoreramo turebe niba bitashoboka ko haboneka umuti urambye kuko iki kibazo bisaba ko cyigwaho, abaturage bagatura mu mahoro.»

Ibagiro rya Kijyambere rya Rubavu ribagirwamo inka ziri hagati ya 50 na 70 ku munsi.

IYAREMYE YVES

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE