2017-12-11 11:00:24 clouds 27o High | Kigali Rwanda

Dukurikire:
 
 

Nyabihu:Abakirisitu Gatolika bishatsemo ubushobozi bubaka Kiliziya ya miliyoni 100

Yanditswe na IMVAHO NSHYA

Kuya 2017-08-15 13:20:12

 
Share on:
 
Yasuwe:1422
 
Yavuzweho:200
 
10
 
10

Abakirisitu Gatolika ba paruwasi ya Kora muri Diyosezi ya Nyundo, batashye kiliziya nshya biyubakiye yatwaye amafaranga arenga miliyoni 100 yavuye mu mbaraga zabo no kwitanga.

Aba bakirisitu bavuga ko bakoraga ingendo ndende bajya gusengera kuri paruwasi yabibarutse, ari yo Busasamana, ariko ubu barishimira ko bazajya basengera hafi yabo kandi serivise bajyaga bajya kwaka kuri paruwasi bakazajya bazibonera hafi.

Rubayiza Faustin, umwe mu bakirisitu ba paruwasi nshya ya yavuze ko byabatwaraga imbaraga nyinshi bakora urugendo rurerure bajya kuri Paruwasi ya Busasamana.

Yagize ati «Kuba tubonye iki gikorwa tucyujuje ni ibintu byo kwishimira cyane, yari imaze igihe ikiri ku rwego rw’akazi ariko kuba ihindutse paruwasi ni ibintu byo kwishimira cyane, ingendo zose twakundaga gukora tujya kuri paruwasi ya Busasamana turaziruhutse, turishimira kuba abatuye hano twaritanze tukagera ku gikorwa nk’iki. Ni ibintu byiza byo kwishimira kandi natwe tuzakomeza kugira uruhare mu iterambere ry’ibikorwa bituzamura bihindura ubuzima bwacu. »

JPEG - 65.4 kb
Ubuyobozi bwa Kiliziya Gatolika mu Rwanda bwashimiye abakirisitu biyubakiye paruwasi

Mbonabakira Vincent, Padiri mukuru wa Paruwasi ya Busasamana yibarutse iyi paruwasi nshya ya Kora, yashimiye cyane abakirisitu Gatolika b’iyi paruwasi bishatsemo ubushobozi bakiyubakira paruwasi.

Yagize ati «Ndashimira abakirisitu bitanze umunsi ku munsi mu rwego rwo kugira ngo iyi paruwasi ibashe kuvuka ikaba ikomeye, nta bwo byari byoroshye ariko ahari ubushake n’ubushobozi buraboneka, ni byo byagaragaye hano kandi biradushimisha cyane kuba iyi paruwasi ije hano, ni nako ibikorwa bitandukanye by’iterambere bigiye kurushaho kwiyongera hano. »

Nyiricyubahiro Musenyeri Anaclet Mwumvaneza, umushumba wa Diyosezi ya Nyundo, yashimye ubwitange bw’abakirisitu muri gahunda yo kwigira, abasaba gukomeza kugendana na gahunda za leta, bakaba umunyu w’Isi aho batuye.

Paruwasi nshya ya Kora yaragijwe Bikira Mariya Ugira Ibambe, ni paruwasi ya 26 mu zigize Diyosezi Gatolika ya Nyund ikora ku turere twa Karongi, Nyamasheke, Ngororero, Nyabihu, Rutsiro na Rubavu.

IYAREMYE YVES

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE