2017-11-22 09:53:14 clouds 27o High | Kigali Rwanda

Dukurikire:
 
 

Muhanga: MINISANTE igiye gutanga miliyoni 300 zo gusana ibitaro bya Kabgayi

Yanditswe na IMVAHO NSHYA

Kuya 2017-08-11 05:01:36

 
Share on:
 
Yasuwe:364
 
Yavuzweho:200
 
10
 
10

Minisiteri y’Ubuzima igiye gutanga amafaranga y’u Rwanda angana na miliyoni 300 yo gusana ishami ryakira by’ababyeyi mu bitaro bya Kabgayi kubera ko bishaje.

Minisitiri w’ubuzima, Dr Gashumba Diane ubwo yasuraga Ibitaro bya Kabgayi, yashimye abakozi b’ibi bitaro kubera ko bavuguruye imikorere bakaba batanga serivisi nziza ku babagana, bitandukanye n’isura ibi bitaro byagiraga mu myaka ishize.

Abakozi bakora kuri ibyo bitaro bahawe umwanya w’ibibazo ndetse n’ibitekerezo maze bavuga ko hari ibibazo by’ibitaro bishaje bifuza ko byasanwa cyane cyane ibitaro by’ababyeyi, kuko hari n’icyumba kimwe gishobora gusenyuka niba ntagikozwe.

JPEG - 313.1 kb
Minisitiri w’ubuzima Dr Gashumba Diane(uwa kabiri iburyo) atambagizwa ibitaro bya Kabgayi (Foto Muhizi E)

Umuyobozi w’Ibitaro bya Kabgayi, Dr Nteziryayo Philippe, yavuze ko izo nyubako zishaje zibateye impungenge kubera ko hashize imyaka myinshi zarubatswe kandi nta bushobozi ibitaro bifite byo kuzisana no kubaka izindi nshyashya.

Avuga ko kuba bagize amahirwe bagasurwa na Minisitiri ufite ubuzima mu nshingano ze, bigiye kubagirira akamaro kanini kugira ngo aho bakirira ababyeyi n’abarwayi muri rusange harusheho gusa neza.

Dr Gashumba yatangaje ko Minisiteri ayoboye ku ikubitiro igiye gutanga miliyoni 300 z’amafaranga y’u Rwanda, andi asigaye akazatangwa na Diyosezi ya Kabgayi, kandi akavuga ko ari make ugereranyije n’ayo Minisiteri izatanga kugira ngo iyo nyubako isanwe.

Yagize ati “Twifuza ko Diyosezi yareba kure, mukishakamo ubushobozi mu buryo burambye, kandi mugakora igenamigambi rikubiyemo aho muzajya muvana amafaranga mwenyine mwinjije mukirinda buri gihe ko Minisiteri y’Imari n’igenamigambi ibaha amafaranga.”

Musenyeri Mbonyintege Smaragde Umushumba wa Diyosezi ya Kabgayi, yavuze ko hari miliyoni zirenga 100 Diyosezi izatanga yunganira ayo Minisiteri igiye kubaha.

Yongeyeho ko mu myaka ishize ibi bitaro byavugwagaho imicungire mibi ku buryo no guhemba abakozi byabaga ari ikibazo, ariko ubu iki kibazo cyarakemutse.

Ati “Hari ikinyuranyo cy’imicungire myiza y’amafaranga y’ibitaro, kuri ubu bitandukanye nuko byari bimeze mbere. Turizera ko imikorere myiza nk’iyo nikomeza nta gushidikanya ibitaro biziyubaka.”

Ibitaro bya Kabgayi byubatswe mu mwaka wa 1937, inyubako y’ababyeyi bikaba ari byo bishaje cyane kuko hari n’ibyumba byatangiye kwiyasa. Imibare itangwa n’ibi bitaro igaragaza ko ku munsi abagore bahabyarira bagera kuri 12. Minisitiri kandi yemereye ibitaro bya Kabgayi abaganga b’inzobere.

MUHIZI ELISÉE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE