2017-09-24 09:25:05 clouds 27o High | Kigali Rwanda

Dukurikire:
 
 

Abasirikare ba Sri Lanka bashimye aho u Rwanda rugeze rwiyubaka

Yanditswe na IMVAHO NSHYA

Kuya 2017-08-11 04:29:06

 
Share on:
 
Yasuwe:253
 
Yavuzweho:200
 
10
 
10

Itsinda ry’abasirikare baturutse mu Ishuri rikuru rya Gisirikare rya Sri Lanka, baje mu rugendoshuri mu Rwanda, rwo kwigira ku ngabo z’Igihugu, bashimye aho igihugu kigeze rwiyubaka.

Col. Kithsiri Ekanayake uyoboye itsinda ry’izi ngabo ziri mu Rwanda mu rugendoshuri rwiminsi 12, ashima intambwe y’ubwiyunge Abanyarwanda bamaze kwigezaho nyuma ya Jenoside yakorewe Abatutsi mu 1994 n’uburyo rwiyubatse vuba.

Ku munsi w’ejo hashize, aba abasirikare ba Sri Lanka basuye Urwibutso rwa Jenoside rwa Gisozi, maze Col. Kithsiri Ekanayake ubayoboye avuga ko ashima intambwe Abanyarwanda bamaze gutera mu bumwe n’ubwiyunge n’iterambere igihugu kigezeho mu myaka 23 ishize. Avuga ko u Rwanda rugeze heza rwiyubaka nyuma ya Jenoside yakorewe Abatutsi mu 1994.

JPEG - 305.3 kb
Bamwe mu ngabo z’u Rwanda bari kumwe n’abasirikare baturutse mu Ishuri rikuru rya Gisirikare rya Sri Lanka

Col. Kithsiri Ekanayake yavuze ko u Rwanda rwakoze ibishoboka mu rwego rwo kwiyubaka kugira ngo rudaheranwa n’amateka mabi.

Yavuze ko nyuma yo gusura urwibutso rwa Gisozi bakirebera uburyo Jenoside yakorewe Abatutsi yateguwe ikanashyirwa mu bikorwa, asanga Abanyarwanda ubu bageze ku ntambwe y’intangarugero mu birebana n’ubumwe n’ubwiyunge.

Ati “Twe nk’abagize ikiremwamuntu, kandi nk’abafite umutekano mu nshingano, ibyo tubonye aha, twifuza ko nta handi byazongera kuba ukundi, haba mu Rwanda n’ahandi ku isi.”

Bamaze kwakirwa ku cyicaro cya Minisiteri y’Ingabo, Umuvugizi w’Ingabo z’u Rwanda, Brig. Gen. Ferdinand Safari, yavuze ko uruzinduko rw’aba basirikare bo mu Ishuri rikuru rya Gisirikare rya Sri Lanka rushimangira umubano mwiza n’ubufatanye.

JPEG - 239.7 kb
Aba basirikare bavuga ko bavanye isomo ku mateka mabi ya Jenoside u Rwanda rwanyuzemo

Yavuze ko ingabo z’u Rwanda n’iza Sri Lanka bihurira cyane mu bikorwa byo kubungabunga amahoro. Akomeza avuga ko hari ibyo abagize iri shuri baje kwirebera uko bikorwa mu Rwanda nk’uburyo Ingabo z’u Rwanda (RDF) zitegura abajya mu butumwa.

Brig. Gen. Safari yavuze ko amarembo afunguye ku baza gukorera ingendoshuri ku gisirikare cy’u Rwanda kimwe nuko ingabo z’u Rwanda zijya mu ngendoshuri mu bindi bihugu kuhavoma ubumenyi butandukanye.

Naho Col. Kithsiri Ekanayake waje ayoboye iri tsinda, yavuze ko urugendoshuri bajemo mu Rwanda ruzabafasha kwiga byinshi birimo n’uko Ingabo z’u Rwanda zikora n’uruhare zagize mu bumwe n’ubwiyunge bw’Abanyarwanda. Yavuze ko baziga uko u Rwanda rwiyubatse nyuma ya Jenoside yakorewe Abatutsi hamwe n’ubumwe n’ubwiyunge mu gihugu.

JPEG - 153.6 kb
Basobanuriwe imikorere y’igisirikare cy’u Rwanda

Ku cyicaro cy’Ingabo z’u Rwanda aba bashyitsi bakiriwe n’Umugaba w’Ingabo zirwanira mu kirere, Brig. Gen. Charles Karamba. Basobanuriwe imiterere y’Ingabo z’u Rwanda, uruhare rwazo mu iterambere ry’igihugu no kubungabunga amahoro.

Mu gihe cy’iminsi 12 bazamara mu Rwanda, bazasura inzego zitandukanye hamwe n’ibikorwa by’iterambere by’umwihariko banasure Ishuri rikuru rya Gisirikare i Gako ahategurirwa abajya mu butumwa bw’amahoro mu mahanga, ndetse banasure n’indi mishanga ya RDF irimo CSS n’Ikigo cy’Ubwishingizi mu kwivuza, MMI.

TWAGIRA WILSON

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE