2017-09-21 09:07:12 clouds 27o High | Kigali Rwanda

Dukurikire:
 
 

Perezida Kagame yatangije imirimo yo kubaka ikibuga cy’indege cya Bugesera

Yanditswe na IMVAHO NSHYA

Kuya 2017-08-09 11:21:28

 
Share on:
 
Yasuwe:556
 
Yavuzweho:200
 
10
 
10

Perezida Paul Kagame, uherutse kongera gutorerwa kuyobora u Rwanda, yashyize ibuye ry’ifatizo ahazubakwa ikibuga mpuzamahanga cya Bugesera kuri uyu wa 9 Kanama 2017.

Atangiza ku mugaragaro imirimo yo kubaka icyo kibuga, yavuze ko ari umushinga w’ingirakamaro ku mibereho y’Abanyarwanda.

Yagize ati “ Nishimiye gushyira ibuye ry’ifatizo kuri uyu mushinga w’ingirakamaro ku gihugu cyacu. Uyu ni umushinga twategereje igihe kirekire nizere ko twese tuzafatanya kugirango urangire neza. Iki kibuga gikoreshwe. Iki kibuga cy’indege ntabwo kizaba ’nka ya mabati’. Iri buye ry’ifatizo ni intangiriro y’ibikorwa.”

JPEG - 137.9 kb
Perezida Kagame ashyira ibuye ry’ifatizo ahagiye kubakwa ikibuga cy’indege mpuzamahanga cya Bugesera

Umukuru w’Igihugu yongeyeho ko nubwo u Rwanda atari igihugu kinini, abagituye bazakomeza guharanira kuba intangarugero mu mahanga, bakagera kuri byinshi byiza.

Yakomeje agira ati “Ikibuga cya Kanombe gikomeje gutera imbere, ariko iki kibuga cya Bugesera gifite umwanya munini mu ntumbero dufite. Ikibuga cy’indege cya Bugesera kizafasha mu kongera ubukungu bw’u Rwanda ndetse n’ubuhahirane mu karere duherereyemo.”

Perezida Paul Kagame yashimiye abagize uruhare mu mushinga w’ikibuga mpuzamahanga cya Bugesera, abizeza ko Leta y’u Rwanda itazabatenguha ndetse yizeza Abanyarwanda ko bazabona inyungu nyinshi ziturutse kuri icyo kibuga.

Ikibuga Mpuzamahanga cya Bugesera kigiye kubakwa nyuma y’amasezerano hagati ya Leta y’u Rwanda n’ikigo cy’ubwubatsi cy’abanya Portugal, Mota Engil.

Igice cya mbere cy’uwo mushinga kizuzura mu Kuboza 2018 gisige icyo kibuga cy’indege gifite ubushobozi bwo kwakira abantu bagera kuri miliyoni 1.7 buri mwaka.

Mota Engil niyo izayobora ibikorerwa ku kibuga mpuzamahanga cy’indege cya Bugesera mu gihe cy’imyaka 25, kandi ishobora kuzongererwa amasezerano indi myaka 15.

Byitezwe ko igice cya mbere cy’imirimo yo kubaka kizatwara miliyoni 418 z’amadorali ya Amerika naho icya kabiri kikazatwara miliyoni 414$.

Nyuma y’igice cya Kabiri ikibuga cya Bugesera kizaba gifite ububasha bwo kwakira miliyoni 4.5 buri mwaka.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE