2017-11-17 14:59:33 clouds 27o High | Kigali Rwanda

Dukurikire:
 
 

Basketball: Yishimiye kuba amaze imyaka 2 ari we Munyarwandakazi utsinda amanota menshi

Yanditswe na IMVAHO NSHYA

Kuya 2017-08-09 10:33:50

 
Share on:
 
Yasuwe:452
 
Yavuzweho:200
 
10
 
10

Kapiteni w’ikipe y’abakobwa ya Kaminuza y’u Rwanda ishami rya Huye “UR Huye BBC”, Urwibutso Nicole ni we mukinnyi watsinze amanota menshi “Top Scorer” muri shampiyona y’abagore y’uyu mwaka wa 2017.

Urwibutso Nicole, wanahawe igihembo cy’umukinnyi witwaye neza ukina ku mwanya wa gatatu mu kibuga, yatsinze amanota 169 mu manota 365 ikipe ya UR Huye BBC yinjije muri uyu mwaka wa 2017.

Mu kiganiro yagiranye n’Imvaho Nshya, yatangaje ko yishimiye kugera ku ntego yari yihaye yo kongera gutsinda amanota menshi muri shampiyona y’uyu mwaka wa 2017 nk’uko yari yabikoze mu mwaka washize wa 2016.

JPEG - 45.7 kb
Rwibutso Nicole, kapiteni wa UR Huye BBC ashyikirizwa igihembo na Rwabuhihi Innocent, umutoza w’ikipe ya APR y’imikino ngororamubiri (Athletisme)

Avuga ko ubwo yatorwaga nk’umukinnyi watsinze amanota menshi mu 2016, yumvaga ari nk’ibitangaza ko bishobora kuba byaramugwiririye bituma yiha intego yo kubikora muri shampiyona y’uyu mwaka wa 2017.

Ati “Ubwa mbere byambayeho mu 2016, numvaga ko bidashoboka ndavuga nti nzabyizera neza ari uko bisubiriye, ariko bibaye n’uyu mwaka naravuze ngo ni byo koko bishoboka mbona ko umuntu yatsinda. Ikindi nanjye nari nagerageje kubara biranshimisha cyane”

Urwibutso yemeza ko yabigezeho abikoreye kuko yavaga mu masomo agahita ajya gukora imyitozo, gusa akaba atarakoraga mu minsi y’impera z’icyumweru kubera indi mirimo itandukanye.

Ati “Buri munsi uko navaga mu ishuri kuko ndiga najyaga muri siporo na bagenzi banjye, baba batanabonetse ngakora kuko numvaga nshaka kuzagira ikintu ngaragaza”.

Avuga ko nta gahunda afite yo gusubira inyuma kuko byamwongereye icyizere cy’uko ashobora no kuba umukinnyi mwiza wahize abandi “MVP” mu mwaka utaha w’imikino.

Yemeza ko hari amakipe arimo kumuganiriza ngo ayerekezemo

Uyu mwari watangiye gukinira UR Huye BBC mu 2012, atangaza ko amakipe arimo IPRC-South BBC, APR BBC n’Ubumwe BBC yatangiye kumuganiziriza ngo abe yabakinira.

Yemeza ko akirimo kureba ikipe ishobora kumufasha gukora akaguma kuri wa muvuduko adasubira inyuma ku buryo azavamo umukinnyi yifuza kuba we ndetse bikamugirira umumaro.

Ati “Ndacyarimo kwiga, ikipe nkeneye kwerekezamo ngereranyije n’igihe ndimo ni ikipe ishobora kumfasha gukomeza gukora siporo ikamfasha gukomeza guteza imbere impano yanjye, ku buryo mu myaka ibiri nsigaje nazasohoka ndi umukinnyi ukenewe cyangwa ikipe ishobora kundihira byarangira bikampa n’amahirwe y’akazi.”

NKOMEJE GUILLAUME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE