2017-10-16 07:05:01 clouds 27o High | Kigali Rwanda

Dukurikire:
 
 

Gisagara:Rugayi yagaragaje uko yatejwe imbere n’ubuhinzi bw’urutoki

Yanditswe na IMVAHO NSHYA

Kuya 2017-08-08 14:37:23

 
Share on:
 
Yasuwe:77
 
Yavuzweho:200
 
10
 
10

Rugayi Innocent, umuhinzi-mworozi wo mu karere ka Gisagara mu murenge wa Mugombwa, arishimira iterambere agezeho, abikesha ubuhinzi bwe akora kinyamwuga.

Uyu mugabo ufite hegitari 6 zirimo insina zirenga ibihumbi 6, akaba bakoresha abakozi barenga 30, arahamya ko ubu afite uruganda ruciriritse rwenga inzoga, ubu akaba abarirwa mu biteje imbere muri aka karere.

Yagize ati "Mu by’ukuri na mbere nahingaga urutoki rusanzwe ariko nkabikora mu buryo bwa gakondo, igitoki kibaye kinini ugasanga gifite ibiro 15 cyangwa 20, ariko ubu ibitoki mpinga neza nkurikije amabwiriza, usanga igitoki gishobora kugira ibiro 80 cyangwa 100."

JPEG - 196.4 kb
Rugayi yishimira iterambere amaze kugeraho abikesha ubuhinzi bw’urutoki

Yakomeje agira ati "Ubundi guhinga urutoki rwa kijyambere ntawe bitateza imbere uretse abaruhinga nk’uhinga amasaka, ni bwo usanga rudafashe ntan’umusaruro rutanga."

Mu kiganiro yagiranye n’Imvaho Nshya, Rugayi yagaragaje ko inyungu yakuye muri ubu buhinzi bwe bwamubereye igishoro, abasha kwagura ishoramari, ndetse no mu buzima busanzwe yiteza imbere ku buryo bugaragarira buri wese.

Yagize ati "Aya mazu mureba, uruganda mwabonye byose byavuye mu rutoki kandi mfite inka 10 nkagira n’ingurube ziba aho nahinze urutoki, usanga buri mukozi wese mbasha kumworoza ingurube kandi byose byakomotse mu rutoki."

Yunzemo ati "Ubu buhinzi mbona ari cyo kintu gifite akamaro, kuko ubwanjye najyaga njya i Kigali, nkarangura ubuconsho abandi bacuruzi bakaza bakandanguraho, ariko ubu narabihagaritse nyoboka ubuhinzi bw’urutoki kuko ari bwo nabonye bunteza imbere."

Avuga kandi ko ngo we yamenye uko urutoki ruhingwa mu buryo wa kijyambere, ndetse ngo akaba anabyigisha abamukorera mu mirimo y’uruganda ndetse no mu rutoki.

Ati "Abakozi banjye mbaha abana b’insina nabo ngo bajye kwihingira kandi kuko nahuguwe nkababuza kubikora mu buryo bwa gakondo, kuriya bacukura akobo gato nabo ngo barateye."

Rugayi asobanura ko uhinga insina mu buryo bwa kijyambere, ngo acukura umwobo wa santimetero 60 z’ubujyakuzimu kuri 60 z’ubugari, maze hagashyirwamo ingorofani y’ifumbire ivangwa n’igitaka.

Ati "Bituma insina ikura vuba kandi igatanga n’igitoki kinini.Bitandukanye na kurya usanga urutoki rucucitse nk’amasaka ari nabyo bituma umusaruro uba muke kuko zera ubutoki buto n’amabere mato."

NSHIMIYIMANA EMMANUEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE