2017-12-13 09:46:30 clouds 27o High | Kigali Rwanda

Dukurikire:
 
 

Musanze:Bishimiye intsinzi ya Perezida Kagame wabafashije guteza imbere ubucuruzi bwabo

Yanditswe na IMVAHO NSHYA

Kuya 2017-08-08 09:35:52

 
Share on:
 
Yasuwe:41
 
Yavuzweho:200
 
10
 
10

Abagore bo mu mujyi wa Musanze bahoze bacururiza mu muhanda ‘abazunguzayi’ barishimira intsinzi ya Perezida wa Repubulika Paul Kagame, bakaba bizeye ko iterambere yabagejejeho rizarushaho kwiyongera muri manda itaha.

Mukamurenzi Judith, umwe mu bahoze ari abazunguzayi mu mujyi wa Musanze, avuga ko Perezida Kagame yabakuye ku ‘musaraba’wo guhora bazererana ibicuruzwa ku mutwe, ubu bakaba baribumbiye mu makoperative abafasha guteza imbere ubucuruzi bwabo binyuze mu mucyo.

Yagize ati “Rwose mu myaka igera kuri 15 nkora ubucuruzi bwo gutembereza ibyo nabaga naranguye, nahuriyemo n’ibibazo byinshi, hari ubwo naguraga ibikoresho byo mu rugo hakaba ubwo njya no kubishakira isoko mu rugo byibwemo nkahafatirwa, kuko uwo nabaga nabiguze na we yabaga na we yabyibye.

JPEG - 84.1 kb
Abagore bahoze ari abazunguzayi bishimiye intsinzi ya Perezida Kagame wabafashije kwagura ubucuruzi bwabo

Ibi byamviriyemo no kujya nitaba kuri Polisi, nkariha ibyibwe, yemwe hari n’agashyamba kanjye kabiguyemo, ariko rero kuva aho Paul Kagame atekerereje ku ngorane umugore ahura na zo mu iterambere rye, yaduhaye inkunga ingana n’ibihumbi 600, none kuri ubu twibumbiye muri Koperative, ibi byatumye dutera imbere.

Ikindi ni uko kuri ubu yaduhaye n’imyanya mu isoko rinini rya Musanze, ubu nta mugore ukirirwa abungana ibicuruzwa bye, kuba rero Kagame yatorewe kutuyobora ni ikintu cyadushimishije, kuko ubuzima umunyarwandakazi afite bugiye kwikuba inshuro nyinshi, twishimiye intsinzi ye rwose”.

Umuyobozi w’akarere ka Musanze wungirije ushinzwe imibereho myiza y’abaturage, Uwamariya Marie Claire, yagize ati “Abagore bo muri Musanze bahoze ari abazunguzayi bagera kuri 50 bibumbiye mu ishyirahamwe, kuri ubu bamaze gutera imbere nyuma y’aho baboneye ubushobozi ku nkunga bagenewe na Nyakubahwa Paul Kagame igera ku bihumbi 600.

Iyi nkunga rero yabakuye mu bibazo bikomeye, kandi kuri ubu ni bamwe mu bafasha ubuyobozi kuvana abandi bagore bagenzi babo mu muhanda babashishikariza kwibumbira mu makoperative, ntibabura rero kuvuga ko kuba Kagame yongeye gutorerwa kuyobora u Rwanda, ari ikintu cy’ingirakamaro, gusa icyo nabasaba ni ugukomeza gukora cyane, kugira ngo bakomeze kwiteza imbere, kandi baharanire agaciro yabahaye”.

Aba bagore bavuga ko kwibumbira hamwe kwabo byabafashije mu kwiteza imbere n’imiryango iva mu bukene, bakaba bahamagarira bagenzi babo bakibunza udutaro kuza bakifatanya nabo kuko hari icyo bamaze kubona mu gukorera hamwe.

NGABOYABAHIZI PROTAIS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE