2017-09-24 09:25:05 clouds 27o High | Kigali Rwanda

Dukurikire:
 
 

Ikoranabuhanga ryatumye amatora agenda neza – Dr. Kayitesi

Yanditswe na IMVAHO NSHYA

Kuya 2017-08-08 07:32:43

 
Share on:
 
Yasuwe:94
 
Yavuzweho:200
 
10
 
10

Umuyobozi mukuru wungirije w’Ikigo cy’igihugu cy’imiyoborere (RGB), Dr Kayitesi Usta yatangaje ko Komisiyo y’igihugu y’amatora (NEC)yatanze serivisi nziza ku Banyarwanda basaga miliyoni 6 bagombaga gutora.

Mu kiganiro n’abanyamakuru kuri serivisi zatanzwe n’inzego zinyuranye mu gihe cyo kwamamaza abakandida n’icy’amatora, Dr. Kayitesi ku ruhare rw’ikoranabuhanga ryorohereje abaturage benshi mu bijyanye no kwitegura amatora ndetse no mu gihe cy’ibarura ry’amajwi.

Yagize ati “ Uruhare rw’ikoranabuhanga ni ntagereranywa muri aya matora ya Perezida wa Repubulika no mu gihe cy’imyiteguro yayo kuko ryafashije mu gutanga serivisi inoze kandi yihuse.”

JPEG - 142.9 kb
Dr. Kayitese umuyobozi wungirije w’ikigo cy’igihugu cy’imiyoborere, RGB

Yavuze ko ikoranabuhanga ryifashishijwe mu kwiyimura kuri lisiti y’itora, aho Abanyarwanda benshi bakoresheje iyo nzira y’ikoranabuhanga aho gufata inzira ngo bajye kuri Komisiyo y’igihugu y’amatora bataye imirimo yabo n’uwo mwanya wose wo kugana ku babishinzwe, abenshi babashije kubyikorera.

Kayitesi kandi yagaragaje uburyo ibarura ry’amajwi ryihuse bitewe n’ikoreshwa ry’ikoranabuhanga, aho uturere twose twoherezaga imibare y’ibyavuye mu matora bigahita bigera kuri Komisiyo y’igihugu y’amatora mu mwanya nk’uwo guhumbya.

Uyu muyobozi avuga ko serivisi nziza yatanzwe na NEC ishingiye kandi ku kurara itangarije Abanyarwanda ibyavuye mu matora by’agateganyo, akaba ari serivisi nziza yagaragariye abantu bose ndetse n’indorerezi z’amahanga.

Abakandida babangimwe n’inzego z’ibanze barakebuwe

Ku bijyanye n’abakandida bavuga ko babangamiwe n’inzego z’ibanze mu gihe cyo kwiyamamaza, Dr Kayitesi avuga hari aho byumvikanye ariko inzego za NEC n’iz’umutekano zaje gukurikirana icyo kibazo kandi n’ubu ababigizemo uruhare baracyakurikiranwa.

Yavuze kandi ko abakoze ibyo babikoze ku giti cyabo batabitumwe n’undi muntu cyangwa na Leta ari nayo mpamvu barimo gukurikiranwa ku giti cyabo.

Ati “ Hari aho byumvikanye ko abakandida baba barabangamiwe n’abayobozi b’inzego z’ibanze, ariko n’ababikoze bose babikoze ku giti cyabo, nta n’umwe watumwe na Leta, cyane ko bari bazi neza amabwiriza n’amategeko ya Komisiyo y’igihugu y’amatora agenga gahunda yo kwiyamamaza kw’abakandida.”

Dr Kayitesi avuga ko muri rusange igikorwa cyo kwiyamamaza kw’abakandida n’icy’amatora cyagenze neza, ku buryo n’indorerezi z’amahanga zabyemeje muri raporo yazo.

Asanga] ishusho rusange y’amatora mu Rwanda ari nziza kandi ari yo gushimwa, gusa ngo ibitaragenze neza bikaba bizaganirwaho n’inzego zinyuranye zikazafata umwanya wo kubikosora.

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE