2017-12-11 14:03:29 clouds 27o High | Kigali Rwanda

Dukurikire:
 
 

Volleyball: Sibomana yatangiye areba abakina none ubu ni umukinnyi wabigize umwuga

Yanditswe na IMVAHO NSHYA

Kuya 2017-08-07 13:58:24

 
Share on:
 
Yasuwe:456
 
Yavuzweho:200
 
10
 
10

Sibomana Placide bakunze kwita Madison usanzwe ari umukinnyi w’ikipe y’igihugu y’u Rwanda ubu akaba akinira ikipe ya Al Gharafa VC yo muri Qatar atangaza ko atigeze atekereza ko yazakina Volleyball kugera ku rwego rwo kuba uwabigize umwuga.

Mu kiganiro kirambuye Imvaho Nshya yagiranye na Sibomana Placide yagize byinshi atangaza ku nzira ye mu mukino wa Volleyball kugeza uyu munsi akina nk’uwabigize umwuga.

Sibomana ni muntu ki?

JPEG - 227.2 kb
Sibomana Placide Madison ubwo yahembwaga nk’umukinnyi witwaye neza mu mikino y’akarere ka 5

Sibomana Placide yavutse muri Kamena 1992 avukira mu Murenge wa Cyeza mu Karere ka Muhanga ahahoze ari muri Komine Rutobwe. Kuri ubu atuye i Kanombe mu Karere ka Kicukiro arubatse afite umugore n’umwana.

Sibomana atangaza ko yatangiye kureba Volleyball muri 2005 atangiye kwiga amashuri yisumbuye aho yigaga mu ishuri rikuru rya Rutobwe. Ati “Icyo gihe narebaga abakina gusa”.

Ageze mu mwaka wa 3 ni bwo abakinnyi bari imbere ye barangije ushinzwe imyitwarire y’abanyeshuri mu kigo “Animateur” amusaba ko yajya aza agahagarara mu kibuga kuko yari muremure wenda ko hari umupira yajya akoraho.

Sibomana ufite uburebure bwa metero 2,05 ati “Ntabwo nazuyaje nahise mbyemera njyamo kugira ngo njye nsohokana n’ikipe igiye gukina hanze gusa ntabwo navuga ko nakinnye”.

Sibomana arangije umwaka wa 3 avuga ko yagize amahirwe yo kumenyana n’umutoza Ntawanga Dominique ubu utoza UNIK VC ari bwo yatangiye gukina Volleyball bya nyabyo.

Ati “Hari umwana twiganaga mu biruhuko ahura na Dominique aho yatorezaga abana muri FAWE, aramubwira ati twigana n’umwana muremure amusaba nimero nyuma agarutse ku ishuri ndazimuha araduhuza”.

Nyuma yo guhura n’umutoza Ntawanga, Sibomana yahise ajya kwiga umwaka wa 4 muri I.P Mukarange muri 2008 ari ho yatangiye gukina Volleyball.

Ati “Umutoza yatangiye anyigisha buri kimwe cyose, ndakomeza ndakina ngeze mu wa gatanu nagiye muri GSO Butare muri ya mashuri y’icyitegererezo yajyagamo abana b’abahanga muri Volleyball nyuma nagiye muri Lycee de Nyanza ariho navuye njya gukina muri Qatar”.

Ntabwo muri Qatar byamworoheye
Sibomana Placide agiye gukina nk’uwabigize umwuga muri Qatar byabanje kumugora nk’umuntu wese wavuye mu cyaro gusa avuga ko yahasanze Mukunzi Christophe, kapiteni w’ikipe y’igihugu akamufasha akagenda amenyera ubuzima.

Avuga ko gukina byabanje kumugora. Ati “Ubundi hariya haba abakinnyi babigize umwuga b’ubwoko bubiri, abakuru ndetse n’abari munsi y’imyaka 21 ari bo narindimo”.

Sibomana yagiye muri Qatar agomba gukinira ikipe ya Al Arabi gusa ahura n’ikibazo cy’uko umutoza yari yizaniye undi mukinnyi we akabura umwanya gutyo. Ati “Umutoza wari waje muri Al Arabi yaje azanye undi mukinnyi kuko nagezeyo nkerewe, byarambabaje kuko namaze umwaka wose ntakina”.

Sibomana avuga ko yakoraga imyitozo agakina n’amarushanwa asanzwe. Ati “Hari abantu benshi baba muri Qatar baturutse mu bihugu bitandukanye, hari amarushanwa yabaye nkinira Abahinde dutwara igikombe mba umukinnyi ukina hagati witwaye neza bampa n’igihembo”.

Muri 2014-2015, Sibomana yagiye gukinira ikipe ya Al Shamar gusa agenda nk’intizanyo. Ati “Iyi kipe nagiriyemo ibihe byiza, harimo abana bafite ubushake, twakinnye turi nk’abavandimwe kandi nari umwe mu bari batwaye ikipe”. Sibomana avuga ko bayigiyemo ari iya 11 shampiyona irangira iri ku mwanya wa 6, iba ikipe y’umwaka.

Sibomana yongeye kwicara undi mwaka

Ubwo umwaka w’imikino wa 2014-2015 warangiraga, ikipe ya Al Shamar yageze muri ½ cy’igikombe cy’umwami nyuma bahura na Al Arabi yari isanzwe ari ikipe ye.

Ati “ Twarakinnye biba ngombwa ko dukina amaseti 5 kuko nari nayikaniye cyane, nyuma abayobozi barandakariye kuko twari tugiye kubabuza gukina umukino wa nyuma, bahise bambuza kongera kujya gukina muri ya kipe mara undi mwaka wa 2015-2016 ntakina”.

Muri uyu mwaka wa 2016-2017 nabasabye ko bandeka nkajya gushaka ikipe ngakina nyuma njya muri Al Gharafa ari yo ndimo kugeza ubu aho yampaye amasezerano y’imyaka 3.

Sibomana avuga ko uyu mwaka bitabagendekeye neza kuko iyi kipe yari isanzwe itira abakinnyi kuko amakipe menshi yo muri Qatar ariko akunze kubigenza. Ati “Nyuma bafashe gahunda yo gushaka abakinnyi babo ni uko njyayo mpura n’abandi dukora ikipe ntabwo byagenze neza ariko ni ikipe ihagaze neza”.

Sibomana yagarutse mu ikipe y’igihugu nyuma y’imyaka 6

Sibomana yakiniye ikipe y’igihugu y’abatarengeje imyaka 20 muri 2010 ndetse no muri 2011 akinira ikipe y’igihugu nkuru. Muri Nyakanga 2017 ni bwo yongeye kwambara umwenda w’ikipe y’igihugu nyuma y’imyaka 6.

Yagize ati “Muri 2013 na rindi mu kiruhuko nyuma mpamagarwa mu ikipe y’igihugu ariko nza kugira ikibazo cy’ububare munsi y’ivi mbwira abatoza nyuma bansaba ko nakomeza kubafasha mu myitozo nk’umutu ufite ubunararibonye mu irushanwa bakazandeka, ndakomeza njya no mu mwiherero nyuma mvuze ko bandeka abayobozi ntibabyumva bavuga ko nshaka gukwepa ikipe bambwira ko badashobora kundekura, mfata icyemezo kuko ntarimeze neza ndagenda, bavuga ko natorotse ariko sinari natorotse kuko hari abayobozi nari nabibwiye”.

Muri 2014, Sibomana avuga ko yanditse ibaruwa asaba imbabazi. Ati “Nanditse nsaba imbabazi ko nagiye tutafatiye umwanzuro hamwe baransubiza bampa imbabazi, ndicara ndatuza ntegereza ko bongera kumpamagara, ubu nibwo bampamagaye ni uko mpita nza kuko narindi mu kiruhuko, nari nabanje kubyumva ariko nti ko 2015 batampamagaye wabona n’ubu butampamagaye”.

Yabaye umukinnyi w’irushanwa ry’akarere ka 5

Sibomana yabwiye Imvaho Nshya ko kugaruka mu ikipe y’igihugu byamushimishije kandi ntacyamugoye kuko abakinnyi bose bari bamenyeranye. Yatangaje ko yakoze imyitozo y’ingufu kugira ngo agaragaze ko hari urwego ariho kandi anagire icyo afasha ikipe muri rusange.

Mu irushanwa ry’akarere ka 5 mu gushaka itike y’imikino y’Afurika, ikipe y’u Rwanda yitwaye neza itsinda Sudani y’Amajyepfo na Uganda ariko itsindwa na Kenya gusa zombi zibona itike y’imikino y’Afurika. Sibomana yatowe nk’umukinnyi wo hagati mwiza ndetse aba umukinnyi witwaye neza mu irushanwa ryose.

Aha yagize ati “Byarantunguye kuko ntabwo narimbitegereje, intego ya mbere kwari ugufasha ikipe tukareba ko twagera kure hashoboka, tugatwara igikombe, gusa kuba umukinnyi w’irushanwa buriya bagendeye ku bushake narimfite”. Sibomana avuga ko irindi rushanwa ashobora kuzaba yarasubiye hanze ariko ko nibamutumira azitabira nta kibazo.

Urwego rwa Volleyball

Sibomana atangaza ko Volleyball y’u Rwanda iri ku rwego rwiza kuko ubu hari abana benshi kandi bafite ubushake. Ku bijyanye no kujya hanze, Sibomana yavuze ko bisaba ko umukinnyi agomba kubona umushakira ikipe “Agent” ariko bigasaba ko uwo mukinnyi akina imikino mpuzamahanga kugira ngo agaragare kuko hari benshi bashobora kugenda kandi bakabishobora.

BUGINGO FIDELE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE