2017-09-21 09:07:12 clouds 27o High | Kigali Rwanda

Dukurikire:
 
 

Uko bamwe mu bayobozi babona Kagame n’uko bakiriye intsinzi ye

Yanditswe na IMVAHO NSHYA

Kuya 2017-08-07 08:39:26

 
Share on:
 
Yasuwe:814
 
Yavuzweho:200
 
10
 
10

Paul Kagame wari usanzwe ayobora u Rwanda yongeye kwegukana intsinzi mu matora y’umukuru w’igihugu, nyuma y’uko yiyamamaje abisabwe n’Abanyarwanda bakanamutora ku rwego rwo hejuru.

Imvaho Nshya yaganiriye na bamwe mu bayobozi bavuga uko bamubona n’uko bakiriye intsinzi ye.

Minisitiri w’Ubucuruzi, Inganda n’Ibikorwa by’Umuryango wa Afurika y’Iburasirazuba, Kanimba Francois, avuga ko Perezida Kagame ari umuyobozi uhoza umutima ku baturage.

JPEG - 225.7 kb
Minisitiri Francois Kanimba yishimira ko Abanyarwanda batoye neza, bagatora Paul Kagame

Avuga ko Kagame atekereza iteka icyatuma abaturage bava mu bukene, ati “Mubonamo kuba umuyobozi ureba kure, atekereza iteka icyatuma abaturage bava mu bukene, yashoboye kwagura amahirwe n’imibanire myiza hagati y’u Rwanda n’ibindi bihugu hirya no hino ku isi, agira ibyo yemera kandi bigaragarira mu byemezo afata bijyanye no gushaka ko u Rwanda ruba igihugu kigize hagamijwe ko kiva ku gutegereza akimuhana.”

Minisitiri w’Umutungo kamere, Dr. Vincent Biruta, avuga ko Kagame ari Umukuru w’Igihugu udasanzwe, ukunda Abanyarwada bose.

Yagize ati “Intsinzi ya Nyakubahwa Perezida wa Repubulika Paul Kagame twayakiriye neza cyane. Ni umusaruro wavuye mu byo Abanyarwanda bari bifuje, babigaragariza muri referandumu.

JPEG - 95.9 kb
Dr Vincent Biruta

Iyi ntsinzi yerekana icyizere Abanyarwanda bamugiriye bashingiye ku byo yabakoreye kandi natwe twayishimye cyane kubera ko ari Umukuru w’Igihugu udasanzwe ukunda Abanyarwanda bose.”

Guverineri w’Intara y’Amajyaruguru Musabyimana Jean Claude, avuga ko abaturage bo muri iyi ntara batatunguwe n’intsinzi ya Perezida Paul Kagame bashingiye ku bikorwa bye.

Guverineri Musabyimana yagize ati: “Nta wavuga ngo azi ibyiza bya FPR-Inkotanyi na Paul Kagame Perezida w’u Rwanda kurusha abaturage bo mu ntara y’amajyaruguru, kuko twebwe buriya yaduhaye umuti utuvura uburozi bubi twariye bushingiye ku mateka mabi n’imyumvire mibi y’ivangura n’amacakubiri, kandi ibi bintu twabimazemo imyaka myinshi.

FPR rero yadukubise icyuhagiro, kuri ubu turi Abanyarwanda, kuko gahunda ya Ndi Umunyarwanda yatugize umwe, ikindi kandi nyuma yo guhagarika Jenoside, umucengezi hano yari yatwibasiye, ariko Kagame ni we wakubise inshuro umucengezi n’abambari be, muri rusange FPR n’umukandida wayo Kagame badukuye ibuzimu batujyana ibuntu”.

JPEG - 77.5 kb
Guverineri Musabyimana Jean Claude

Yongeyeho ati “Kuri ubu intara y’Amajyaruguru ni imwe mu zifite ibitaro by’ikitegererezo biri ku rwego mpuzamahanga, nka Butaro, Kinihira n’ahandi, amashuri yabaye menshi haba abanza, ayisumbuye, Kaminuza, kandi umwana akigira hafi y’umuryango we, ni byinshi byereka buri wese yaba uri mu Rwanda no hanze ko Kagame yari ikwiye intsinzi.”

Depite Gatabazi Jean Marie Vianney, kuri we Perezida Kagame ni umuyobozi wakoze ibikomeye.

Ati “Yahuje Abanyarwanda, si ibintu byari byoroshye, aharanira ko buri Munyarwanda wese agira uruhare mu iterambere abantu bakazamukira hamwe.”

JPEG - 187.5 kb
Depite Gatabazi Jean Marie Vianney

Avuga ko Perezida Kagame gukundwa n’Abaturage bishingira ku buryo ayoboramo ati “Perezida Kagame ni umuyobozi w’abaturage, arabegera, abatega amatwi bakanagira uruhare mu miyoborere y’igihugu, yakoze amateka, ni we wakuyeho ikintu cyabagaho mu bamubanjirije aho umwe yafataga ubutegetsi hakabaho ikintu cyo kwihimuranaho, ibi ku miyoborere ye byaracitse aha imyanya abo barwanaga, ingabo ziravangwa izatsinze n’izatsinzwe…”

Kandi ati “Perezida Kagame ni umuyobozi utagamburuzwa n’amananiza, akomera ku kinyabupfura n’imyitwarire myiza ye byihariye, ibi bimushoboza kuyobora abantu bafite imyitwarire itandukanye, ni urugero rwiza abayobozi twese dukwiye gushingiraho mu miyoborere yacu ya buri munsi.”

Gasamagera Wellars, ni umuyobozi mukuru w’Ikigo cy’Imicungire y’Abakozi (RMI) avuga ko kuri we Perezida Kagame ari umuntu udasanzwe.

Ati “Perezida wa Repubulika Paul Kagame watorewe kongera kuyobora indi myaka irindwi iri imbere, njye mubonamo kuba inkingi yubakiyeho umutekano n’ubudahangarwa bw’u Rwanda. Ni we shingiro ry’iterambere tugezeho, ahangayikishwa cyane n’iterambere ry’umuturage, ibyo akora byose umuturage aza ku isonga.”

JPEG - 93 kb
Wellars Gasamagera

Ashimangira ko Perezida Kagame ari umuyobozi ureba kure ati “Areba kure, ni na we imiyoborere myiza y’iki gihugu ishingiyeho iyo urebye u Rwanda n’amateka yarwo, njye nsanga iyo tutamugira twari kuba tukiri hasi cyane, afite ubudasa, ni umuyobozi udasanzwe.”

Guverineri w’intara y’Iburasirazuba Kazaire Judith, avuga ku ntsinzi ya Kagame yagize ati “Iyi ntsinzi twayishimiye, turayibonamo ayandi mahirwe n’ikindi cyizere byo gutera imbere. Kandi tunashingiye ku byo yatugejejeho mu myaka 23 yari ishize, byongeye kutwubakira imbaraga zikomeye ko tugiye gukomeza gukataza mu iterambere, twubakira ku byo twagezeho, ariko noneho muri iyi myaka 7 iri imbere, tukagera no ku bindi byinshi bituma imibereho y’abaturage bacu ihinduka; ikomeza kugana aheza.”

JPEG - 125.4 kb
Guverineri Kazaire

Umuyobozi w’Akarere ka Gasabo Rwamurangwa Steven, avuga ko Perezida Kagame ari igisubizo cy’u Rwanda nyuma y’ibibazo rwagize. Avuga ko Kagame yatanze umurongo abantu bakagira icyizere cyo kubaho.

Ati ”Nyakubahwa Perezida Paul Kagame mubona nk’umuyobozi wakoze ibirenze ibyo abantu bari bamutegerejeho haba mu mibereho myiza, ubukungu, ubutabera n’imiyoborere myiza, ni nayo mpamvu twifuje tunamusaba gukomeza kutuyobora no mu yindi myaka 7 iri imbere.”

Uyu muyobozi anashimira Perezida Kagame ku bw’uruhare rwe rwo kwemera kongera kuyobora u Rwanda, ati ”Ndabimushimira, namusezeranya ko tuzakomeza kumufasha twubakira ku byagezweho ari nako tunakomeza gukora ubudasa.”

UBWANDITSI

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE