2017-12-11 14:03:29 clouds 27o High | Kigali Rwanda

Dukurikire:
 
 

Ngoma: Abaturage barwara bakishyiramo ko‘barozwe’ barasabwa guhindura imyumvire

Yanditswe na IMVAHO NSHYA

Kuya 2017-08-07 07:05:12

 
Share on:
 
Yasuwe:29
 
Yavuzweho:200
 
10
 
10

Ubuyobozi bw’ibitaro bikuru bya Kibungo, mu karere ka Ngoma burashishikariza abaturage kwita ku isuku, no kujya bihutira kujya kwa muganga mu gihe biyumvisemo uburwayi mu mubiri, aho gukeka ko ‘barozwe’.

Ni ubutumwa Dr. Namanya William uyobora ibitaro bya Kibungo yageneye abaturage, mu kiganiro yagiranye n’Imvaho Nshya, nyuma yuko mu murenge wa Mutendeli hagaragaye uburwayi butunguranye bwafashe abaturage barenga 80.

Ni abaturage 85 bo mu midugudu ya Gitesanyi na Cyanamo, mu kagari ka Karwema, mu murenge wa Mutendeli n’abandi babiri (2) bo mu murenge wa Sake; bose bari kwitabwoho n’abaganga nyuma yuko bafashwe n’uburwayi bwo gucibwamo.

JPEG - 147.8 kb
Dr. Namanya William asaba abturage kujya bihutira kugera kwa muganga, mu gihe bumva batameze neza mu mubiri ( Ifoto Manishimwe N)

Imbarutso y’ubu burwayi, abaganiye n’Imvaho Nshya bahuriza ku kuba yarabaye ikigaye banyoye kwa Habineza Alphonse, ku cyumweru tariki ya 30 Nyakanga 2017, mu munsi mukuru w’umwana we wari wahawe isakaramentuyo gukomezwa.

Yaba abarwayi n’abarwaza, barahuriza ku kuba bakeka ko uburwayi bwabafashe bwatewe n’uburozi, umugizi wa nabi yaba yarashyize mu kigaye banyoye.

Uyu ni Habakurama Jean Claude, we ntiyagiye muri uyu munsi mukuru, ariko umugore n’umwana we bawugiyemo , ubu arabarwaje bari kwa muganga.

Yagize ati “bafashwe no kuruka no gucibwamo. Ntabwo waba ari umwanda, twe turakeka ko ari umuntu waba warazanye ibintu by’uburozi agashyirwa mu binyobwa banywaga, bose bagatita bafatwa; kuko nta kuntu wabona abantu bagera hafi mu 100 bafatirwa rimwe.”

Mugenzi we na we urwaje umwana, aravuga ko impamvu bakeka ko ari uburozi, ari uko n’abo mu urugo rwakoresheje ibirori, umugore, umugabo n’abana; bose barwaye.

Iragena Laurence w’imyaka 50, arwariye mu bitaro bya Kibungo, ni umwe mu babarirwa muri 80 banyoye ikigage bagafatwa n’uburwayi bwo gucibwa, aravuga ko icyo bakeka ari uko barogowe mu kigaye banyoye.

Avuga bimugoye, agira ati “ Natangiye kumva mu nda handya mu ijoro ryo ku cyumweru. Nanyweye ikigage, nta biryo nariye. Icyo kigaye twanyweye nicyo cyadukozeho, uwakinyoye wese wese byaranze. Ni umuntu waturoze, kuko urwo rugo ubusanzwe rugira isuku cyane.”

Dr. Namanya William Umuyobozi w’ibitaro bikuru bya Kibungo yabwiye Imvaho Nshya ko abarwayi bose bakiriwe, bahuriza ku baragaragaza ibimenyetso by’ibyo kurya byahumanye.

Asobanura ko ibyo kurya cyangwa kunywa bihumana iyo byateguranywe n’umwanda, za mikorobe mbi zateguranywe nabyo umuntu yazirya cyangwa yazinywa mu binyobwa nk’uko aba ngaba banyoye ikigaye, bikaba byabaviramo ingaruka mbi zirimo guhitwa, kuruka, gucika intege; no guhinda umuriro.

Dr. Namanya asaba abaturage guhindura imyumvire yo kumva ko barozwe, akabagira inama yo kunoza isuku, no kujya bihutira kujya kwa muganga, mu gihe cyose bumvise batameze neza mu mubiri.

Ati “akenshi biriya bintu iyo bigiye kubaho, biterwa nuko aho bateguriye ibyo kurya no kunywa hari umwanda. Ubu rero turi kubabwira ko batarozwe n’umuntu. Tugiye gukora isuzuma neza, tunarebe ibyo banyoye aho byateguriye, kugira ngo haveho na rurira rwikekwe rwo kuvuga ngo naka yandoze; Kandi ahubwo (ibyo banyoye) byarozwe n’uburyo babiteguyemo. Tubagira inama yo kujya bihutira kujya kwa muganga, kuko iyo indwara uyitindanye uraremba, bikaba byanakuviramo urupfu…Iyo myumvire ikwiye guhinduka.”

Ubuyobozi bw’ibitaro bikuru bya Kibungo buvuga ko abarwayi bose bakiriwe, yaba abagejejwe muri ibi bitaro n’abari ku bigo nderabuzima bari kwitabwaho n’abaganga, ahinini hakibandwa ku kubongerera amazi mu mubiri.

Mu butumwa bukuru agenera abaturage Dr. Namanya William, ni ukubibutsa ukunoza isuku. Anavuga ko ibimenyetso aba barwayi bagaragaza, n’uburyo bari kwitabwaho mu minsi 2 baraba bakize, banatashye.

Ibizami by’abaganga bikomeje gukorwa kugira ngo harebwe mikorobe bashobora kuba baranyoye zabanduje. Hari n’ikigaye bivuga ko abaturage banyoye gihumanye, cyashyikirijwe Polisi ikijyana muri Labotatwari, kugira ngo hapimwe ibyanduje abaturage; bimenyekane.

Si ubwa mbere, mu karere ka Ngoma abaturage bigerwaho n’ingaruka z’ibyo banyoye, Kuko no mu kwezi k’Ukwakira 2015, abaturage 33 bo mu murenge wa Murama bafashwe no gucibwamo no kuruka, nyuma yo kunywa umutobe; byemejwe ko wari wateguranywe umwanda.

Manishimwe Noël

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE