2017-11-18 15:01:27 clouds 27o High | Kigali Rwanda

Dukurikire:
 
 

Musanze:Abageze mu zabukuru besheje umuhigo wo kuzinduka cyane mu matora

Yanditswe na IMVAHO NSHYA

Kuya 2017-08-05 05:49:19

 
Share on:
 
Yasuwe:57
 
Yavuzweho:200
 
10
 
10

Mu matora ya Perezida wa Repubulika y’u Rwanda yo kuwa 4 Kanama 2017, abageze mu zabukuru bagaragaje umwihariko wo kuzinduka cyane, bakaba bavuga ko ibyiza bagezeho mu myaka 23 ishize byatumye barushaho kumenya akamaro ko gutora neza.

Nyirantezimana Venantie ufite imyaka 73, utuye mu murenge wa Muhoza, akagari ka Ruhengeri, aganira n’Imvaho Nshya yavuze ko kuba yazindutse yabitewe no kuba afite ibyiza byinshi azi kandi yabonye, ku buryo ngo yumvaga amasaha yamutindiye ngo yitorere Umukuru w’igihugu uzagira uruhare mu gusigasira ibyiza byagezweho no gukomeza kubyihutisha.

Yagize ati “Nageze hano mu gihe cya saa cyenda, mperekejwe n’umwuzukuru wanjye, nsinshoboye kugenda, ariko navuze ngo banzindukane, kuko nta we utorera undi.

Nta bwo abato ari bo baturusha kuzinduka cyane kuko turi ababyeyi babo, ni ngombwa ko nk’ababyeyi tuba intangarugero muri byose n’ubwo bwose nta mwana nkigira mu nzu, bose barashatse, ariko mba nkeneye ko nanjye ngaragaza uruhare rwanjye mu guhitamo umuyobozi ushobora guteza imbere abo ayobora, ariko ni no gutegurira ab’ejo igihugu kiyobowe neza.”

JPEG - 301.4 kb
Bamwe mu bageze mu zabukuru bageze kuri site y’itora butaracya

Akomeza avuga ko umurimo ari uwa kare, bityo ngo ashingiye ku bukangurambaga bwabanjirije amatora y’uyu munsi, we abona buri munyarwanda wese yakagombye kuba yamaze gutora bitarenze saa mbili za mu gitondo cyane ko amatora y’ubu atandukanye n’ayo yagiye abona mu myaka yashize.

Yunzemo ati “Mbere twajyaga mu matora, ariko kuri uwo munsi nta kindi kintu cyakorwaga, abenshi babaga bafite ubwoba kuko akenshi nyuma yaho habaga hitezwe imvururu, ariko ubu nabonye abantu baza bemye, ni ubukwe rwose!

Kandi nyuma y’aho umuturage ahita yikomereza imirimo ye, ndasaba urubyiruko rw’ubu kutagundira ikirago, bakajya bibatura muri byose”.

Uretse uyu mukecuru, n’abandi bageze mu zabukuru muri aka karere byagaragaye ko bazindutse mu museso, ndetse uretse no kuba bari bemerewe gutora mbere kubera imbaraga zabo nke, n’ubusanzwe ni bo bahageze mbere.

Guverineri w’intara y’Amajyaruguru Musabyimana Jean Claude, yavuze ko kuba abasheshe akanguhe ari bo bagera kuri site z’itora bwa mbere ari urugero rwiza baba batanga ku bato, ibi kandi bigaragaza urukundo ababyeyi bacu bafitiye u Rwanda, gutora ni inshingano za buri Munyarwanda, uruhare rwe rero rurakenewe ko yishyiriraho ubuyobozi.”

Akarere ka Musanze kari gafite ibyumba by’itora 514, ahantu amatora abera hagera kuri 72, abatoye barengaho gato ibihumbi 248.

NGABOYABAHIZI PROTAIS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE