2017-10-16 07:05:01 clouds 27o High | Kigali Rwanda

Dukurikire:
 
 

Amatora 2017 : Paul Kagame yegukanye intsinzi

Yanditswe na IMVAHO NSHYA

Kuya 2017-08-05 04:10:50

 
Share on:
 
Yasuwe:441
 
Yavuzweho:200
 
10
 
10

Komisiyo y’Igihugu y’Amatora yatangaje ko umukandida Paul Kagame ari we watsinze amatora y’Umukuru w’Igihugu yabaye ku munsi w’ejo hashize, ku wa 4 Kanama 2017.

Amajwi yagaragajwe yari amaze gukusanywa ku biro by’itora bingana na 74% by’ibyatoreweho n’abatoye bangana na 80%, yagaragaje ko Paul Kagame, umukandida w’Umuryango FPR-Inkotanyi aza ku isonga n’amajwi 98.66%.

Amajwi yakusanyijwe ku biro by’itora bingana na 74%, ni ukuvuga ibingana na 1732 mu biro 2340 byatorewemo n’abangana na 80% by’abatoye, ni ukuvuga abangana na 5 498 414, mu batoye muri rusange basaga miliyoni 6.8, yagaragaje ko Paul Kagame, umukandida wari watanzwe n’Umuryango FPR-Inkotanyi yegukanye amajwi 98.66%, bityo bikaba nta gushidikanya ko ari we uzayobora igihugu mu gihe cy’imyaka irindwi iri imbere.

JPEG - 62.8 kb
Paul Kagame yatorewe kuyobora u Rwanda indi myaka irindwi

Mpayimana Philippe, umukandida wigenga, yaje ari ku mwanya wa kabiri, aho ku mibare yavuzwe hejuru y’abatoye yagize amajwi 0.72%, naho Habineza Frank watanzwe n’ishyaka rya DGPR agira amajwi 0.45%.
Kagame yatangaje ko akazi kagiye gutangira

Nyuma yo gutangazwa kw’aya majwi, Paul Kagame, umukandida w’Umuryango FPR-Inkotanyi, yagize ati “Ibyo bamaze kutugezaho, ni uko FPR-Inkotanyi yatsinze amatora.”

Akaba yaravuze ko ubu akazi kagiye gutangira, ati “Akazi kagiye gutangira nk’uko twajyaga tugakora. Ni imyaka irindwi yo kwita ku bibazo by’Abanyarwanda.”
Kagame yavuze ko yubahirije ibyo yasabwe n’Abanyarwanda ubwo bamusabaga kwiyamamaza, haba mu mpapuro basinye ndetse no mu matora ya referandumu, none bakaba bongeye kubihamya. Ati “Ndetse uyu munsi bikaba bigaragara ko mwabyemeje.”

Gusa ngo ubu busabe bw’Abanyarwnada hari ababunenze bo hanze, ariko Abanyarwanda bakaba berekanye ko ibyo bahisemo ari byo, berekana ko icyo bahisemo bari bazi icyo bakora.

Akaba yarashimye abayobozi muri rusange, abanyamuryango ba FPR-Inkotanyi, ati “Intsinzi ni iyanyu, ni amateka asanzwe ya FPR-Inkotanyi, yahanganye n’ibibazo byinshi ariko dukomeza gutera imbere.”

Paul Kagame kandi yashimye Abanyarwanda bose, imitwe ya Politiki umunani yifatanyije na FPR-Inkotanyi, ashimira umuryango we, abamuherekeje bose mu gihe cyo kwiyamamaza, abahanzi, abanyamakuru, abikorera, anashima inzego z’umutekano.

Mpayimana yashimye Kagame

Mpayimana Philippe, wari umukandida wigenga mu matora y’Umukuru w’Igihugu, yavuze ko yishimiye uko amajwi agenda atangazwa hirya no hino. Ati “Umwanya kugeza ubu ndi ho uranshimishije.” Yashimye Paul Kagame aho amajwi yamaze gukusanywa agaragaza ko intsinzi ari iye. Aha, Mpayimana yagize ati “Bigaragara ko uwatsinze amatora ari FPR na Nyakubahwa Paul Kagame”.

Mpayimana akaba yarashimye Paul Kagame kuko yatowe ari amahitamo y’abaturage. Yavuze ko ubwo yinjiraga mu bikorwa byo kwiyamamaza yari azi ko bitoroshye, ati “Ndashimira inzego z’ibanze zamfashije kwiyamamaza n’ubwo nahuye n’inzitizi ku ikubitiro.”

Inzego z’umutekano nazo yazishimye ko zamufashije mu kwiyamamaza kwe, akaba anashima urwego demokarasi yo mu Rwanda iriho, n’uburyo amatora yateguwe neza mu buryo bw’umwuga.

Perezida wa Komisiyo y’Igihugu y’Amatora, Prof. Kalisa Mbanda, yavuze ko amajwi yabaruwe yari ukugira ngo Abanyarwanda barare bazi aho amatora ageze, ariko uyu munsi bakongera kuza gushyira ahagaragara amajwi y’agateganyo.

Yavuze ko Paul Kagame ari we uri ku isonga, ati “Hari umukandida umwe urusha abandi amanota ku buryo bugaragara, uwo ni Nyakubahwa Paul Kagame”. Akaba yaravuze ko bigaragara ko ari we uzayobora igihugu, n’ubwo andi majwi y’agateganyo agaragazwa uyu munsi.

Uko imibare y’amatora iteye

Muri rusange, Abanyarwanda 6,897,076 ni bo batoye Perezida wa Repubulika. Ku bantu 6,897,076 batoye Perezida wa Repubulika, 54% ni abagore naho 46% ni abagabo; muri abo bose urubyiruko rukaba ari 45%.

Abanyarwanda baba mu mahanga batoye ku itariki ya 3 Kanama 2017 ni 44,362 batoreye mu byumba by’itora 98. Muri rusange, muri aya matora abantu batoreye kuri site z’itora 2 340 zigizwe n’ibyumba by’itora 16,691.

Mu Banyarwanda bose 6, 897,076 batoye (abatoreye mu mahanga n’abatoreye mu gihugu), abatoye bwa mbere (abujuje imyaka 18) ni 254,796. Abakorerabushake bagera ku 70,675 bafashije muri aya matora yabereye hirya no hino mu gihugu.

MUGABO LAMBERT

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE