2017-09-20 12:30:19 clouds 27o High | Kigali Rwanda

Dukurikire:
 
 

Kirehe:Urubyiruko rwatoye bwa mbere, rwishimiye gutora mu mucyo n’ubwisanzure

Yanditswe na IMVAHO NSHYA

Kuya 2017-08-04 14:58:56

 
Share on:
 
Yasuwe:83
 
Yavuzweho:200
 
10
 
10

Urubyiruko rwo mu karere ka Kirehe, mu ntara y’Uburasirazuba rwitabiye amatora bwa mbere rutangaza ko rwashimiye ko gutora bikorwa mu ibanga, umuntu akihitiramo umukandida yifuza, atabihatiwe n’undi muntu.

Mu matora ya Perezida wa Repubulika y’u Rwanda yabaye mu Rwanda kuwa 04 Kanama 2017, abenshi mu rubyiruko rugejeje imyaka yo gutora, rwatoye bwa mbere, bahuriza ku gushima uburyo babonye amatora akorwa mu ibanga.

Ku biro by’amatora bitandukanye aho Imvaho Nshya yabashije kugera mu karere ka Kirehe, amatora yatangiye saa moya za mu gitondo, abanzirizwa no kurahira kw’abatoresha.

JPEG - 216.8 kb
Umwe mu rubyiruko rwo mu karere ka Kirehe rwatoye bwa mbere, yashimye uburyo gutora bikorwa mu ibanga (Foto Manishimwe N)

Abaturage bari bazindukiye ku biro by’itora beretswe ko nta kintu kiri mu masanduku agomba gushyirwamo urupapuro rw’itora, hakurikiraho igikorwa cyo gutora nyir’izina.

Ku biro by’itora bya G.S Nyakarambi, mu kagari ka Nyabikokora, umurenge wa Kirehe hari hateganyijwe gutorera abasaga ibihumbi 4, umuturage wa mbere yahageze saa kumi za mu gitondo, ni Habyarimana Jacques w’imyaka 30, wo mu kagari ka Nyabikokora.

Yabwiye Imvaho Nshya ko icyamuteye kuzinduka ari uko yumvaga yifuza gutora Perezida ari uwa mbere.Ati “Naje murikisha agatoroshi, ariko nifuzaga ko natwe uza kuhantanga, ndatora Perezida ndi mu ba mbere, nsubure mu mirimo yanjye.”
Mu byaranze aya matora mu karere ka Kirehe harimo kuba abageze mu zabukuru, ababyeyi bafite abana bato bahetse n’abatwite, abafite ubumuga n’abanyantege nke (abarwayi) bagiye bahabwa umwanya bagatora, bakihagera.

Kuri site z’itora hacurangwaga indirimo zitandukanye zitanga ubutumwa bujyanye n’amatora, akamaro ko gutora.Hari imitako, itandukanye kandi n’abagana kuri site bari babukereye, ubona ko ari ibirori.

Abaturage kandi bitabiriye gutora mu masaha ya mbere ya saa tatu, ku buryo ahagana ma saa sita z’amanywa abantu bazaga umwe, umwe.

Urubyiruko rwashimye ko amatora akorwa mu mucyo

Abitabiriye gutora bwa mbere bo mu karere ka Kirehe baganiye n’Imvaho Nshya barahuriza ku kuba bishimiye uburyo amatora akorwa mu mucyo n’ubwisanzure, kandi uwo utora yatoye, akaba ibanga rye na we.

Ndayisenga David, w’imyaka 19, atuye mu mudugudu w’Akagera, mu murenge wa Nyamugali.Yagize ati “Bajyaga gutora nkumva mfite amatsiko yo gutora, ariko ubu kuba nanjye natoye ndumva ari byiza.

Icyo nabonye kidasanzwe kandi nakunze ni uko utora nta muntu uguhagaze hejuru.Gutora ni ibanga ry’umuntu. Kandi umuntu ni we wihitiramo uwo atora.Njyewe numvaga ko iyo umuntu agiye gutora bamuhata uwo atora, ariko nagiye mu bwihugiko, ndatora njyenyine, nabonye ari byiza cyane.”

Muhawenima Jeanette w’imyaka 23 utuye Nyankora nawe ni ubwa mbere atoye, yagize ati “Igishya nabonye ni uko natoye Perezida, kandi ninjye wamwitoreye mu ibanga.Niyeze ko umukandida natoye, agomba gutorwa rwose, agakomeza kuduteza imbere.”

Tuyishime Jean Claude 19 na we kimwe na bagenzi be avuga ko yashimiye ko yitoreye kandi mu ibanga.Ati “Ni ubwa mbere natoye, nateye igikumwe.Ikintu gishya nabonye kandi nakunze ni uko ubikora mu ibanga ryawe, nta wundi muntu ubyereka.

Biba ari ibyawe n’umuntu uzabireba bari kubarura amajwi.Ubu ndumva binshimishije cyane kuba nishyiriyeho umuyobozi, kandi nizeye ko ari butorwe.”

Nisingizwe Rosine w’imyaka 18 we, nyuma yo gutora, yabwiye Imvaho Nshya ko kuba yatangiye gutora (agejeje imyaka yo gutora) byamuteye ishema ry’uko agize uruhare mu kwishyiriraho ubuyobozi.

Ati “Ubu ndumva ari bwo mbaye umunyarwandakazi nyawe, kuko aribwo ntangiye kugira uruhare mu miyoborere, nitorera abayobozi. Kandi nabonye ari byiza kuko nitoreye uwo nshaka, nshingiye ku migabo n’imigambi abakandida batubwiye bateganya kuzatugezaho.Nashimye ko nitoreye, kuko ari ndi muntu untoreye, ashobora kuntorera uwo ntifuza.”

Muzungu Gerard, Umuyobozi w’akarere ka Kirehe, watoreye mu murenge wa Mpanga, yabwiye Itangazamakuru ko uburyo abanyarwanda bitabira amatora, bakayitegurira nk’ubukwe, bayishimiye bigaragaza demokarasi, ndetse bigashimangira ko abaturage basobanukiwe kandi bagaha agaciro amatora.

Ati “Amatora urabona ko ari ubukwe, abaturage bateguye, ababyeyi bakenyeye, abandi bateze ingori, ni ibirori ku buryo ubona ko bishimishije. Kuba rero umuturage agira uruhare mu kwihitiramo ubuyobozi ni byiza cyane, ni ihame rya demokarasi.

Umuturage yihitiramo umuyobozi uzamugirira akamaro, kuko uwo utora, umutora ushingiye ku byo azagukorera, bikaba bigaragaza impamvu mu by’ukuri abanyarwanda bishimira kwihitiramo abayobozi.”

Amatora ya Perezida wa Repubulika y’u Rwanda, yabaye kuwa kane tariki ya 3 ku banyarwanda bari mu mahanga (Diaspora), no kuwa gatanu tariki ya 4 Kanama 2017 ku banyarwanda bari mu Rwanda.Yatangiye saa moya zuzuye za mu gitondo, asozwa saa cyenda z’igicamunsi, hakurikiraho igikorwa cyo kubara amajwi mu ruhame.

Abakandida biyamamaje muri aya matora ya 2017, ni umukandida wigenga Mpayimana Philippe, Dr. Habineza Frank w’ishyaka riharanira demokarasi no kurengera ibidukikije, na Nyakubahwa Kagame Paul w’umuryango FPR Inkotanyi.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE