2017-09-21 09:07:12 clouds 27o High | Kigali Rwanda

Dukurikire:
 
 

Mu ntara: Amatora y’umukuru w’igihugu yaranzwe n’ubudasa

Yanditswe na IMVAHO NSHYA

Kuya 2017-08-04 12:54:42

 
Share on:
 
Yasuwe:361
 
Yavuzweho:200
 
10
 
10

Mu ntara zitandukanye z’igihugu, bitabiriye gutora Perezida wa Repubulika kuri uyu wa 4 Kanama 2017, bitandukanye n’andi matora yagiye aba, ay’uyu munsi yitabiriwe cyane ndetse n’abaturage bagaragaza ibyishimo byo kwihitiramo uzabayobora.

Gakenke-Rulindo: Saa kumi n’ebyiri z’igitondo abaturage bari bamaze kugera ku mirongo imbere y’ibiro by’itora ari benshi ku buryo mu ma saaa tatu bari bamaze kugabanuka haza umwe umwe.

Mpungirehe Thacien, ubana n’ubumuga bwo kutabona watoreye kuri site y’ishuri ryisumbuye rya Nyarutovu, mu murenge wa Janja, yabwiye Imvaho Nshya ko ubusanzwe yatoraga yifashishije umwana akamurebera.

JPEG - 184.6 kb
Mpungirehe Thacien ufite ubumuga bwo kutabona arishimira ko yihitiyemo umukandida yifuza

Uyu munsi ho ngo yishimye cyane kuko yihitiyemo umukandida ashaka akoresheje urupapuro rwihariye rwagenewe abafite ubumuga nk’ubwe.

Yagize ati “Ni ubwa mbere mbashije gutora njyewe ubwanjye kuko nahoraga nzana umwana akaba ari we unyereka uwo ngomba guhitamo ariko ubu ninjye ubwanjye wihitiyemo umukandida nifuza uzatuyobora, ndashimira Komisiyo y’Igihugu y’Amatora (NEC) na Komisiyo y’Igihugu y’Abafite Ubumuga badukoreye ubu buryo bushya dukoresha utudirisha aho duhitamo umukandida twifuza’’.

Mpungirehe asobanura yabanje gusoma akoresheje uburyo bita ‘‘barayani’’ (Braille) amaze gusoma, abakorerabushake bamuha urupapuro rw’itora, yinjira mu bwihugiko wenyine hanyuma atora umukandida yifuza.

JPEG - 226.6 kb
Abaturage bari ku murongo w’itora ku biro by’itora by’ishuri ryisumbuye rya Nyarutovu mu Murenge wa Nemba mu Karere ka Gakenke

Umuyobozi w’ibiro by’itora by’’ishuri ryisumbuye rya Nyarutovu, yavuze ko hatoreye imidugudu 10 kandi ko byose byagenze neza.

Ati “Abaturage batora kuri iyi site ni 3 656, umuntu araza agatora agataha akajya mu mirimo ye nk’uko bisanzwe, mu gihe kandi haje abafite ubumuga, abasaza n’abakecuru turaborohereza, bakinjira mu cyumba cy’itora agahita ataha.’’

Mujawamariya Vestine, Umuhuzabikorwa wa Komisiyo y’Igihugu y’Amatora mu turere twa Gakenke na Rulindo yasabye abatoresha kwakira neza abaje gutora no gukurikiza amabwiriza y’amatora.

Yagize ati ‘‘Turasaba kandi abatora kwirinda impfabusa no kubahiriza ibisabwa mu gutora, aho bagomba kwitwaza amakarita y’itora n’indangamuntu’’.

Mujawamariya yavuze ko mu Karere ka Gakenke hari ibiro by’itora 101 naho muri Rulindo hakaba ibiro 79.

JPEG - 186.3 kb
Abatoresha babanje kurahira mbere yo gutangira akazi

Musanze:

Abaturage barimo n’abasheshe akanguhe bazindutse mu masaha yak are cyane bajya kwitorera umukuru w’igihugu. Umwe mu bazindutse cyane, Venantie Nyirantezimana, ufite imyaka 73 yabwiye Imvaho Nshya ko yazindutse kubera afite ibyiza byinshi yabonye byagezweho kubera ubuyobozi bwiza.

Ati “ Nageze hano mu gihe cya sa cyenda, mperekejwe n’umwuzukuru wanjye, nsinshoboye kugenda, ariko navuze ngo banzindukane , kuko ntawe utorera undi. Ntabwo abato ari bo baturusha kuzinduka cyane ko turi ababyeyi babo, ni ngombwa ko nk’ababyeyi tuba intangarugero muri byose n’ubwo bwose nta mwana nkigira mu nzu, bose barashatse. “

JPEG - 176.2 kb
Nyirantezimana avuga ko yageze ku biro by’itora saa cyenda z’ijoro

Guverineri w’intara y’Amajyaruguru Musabyimana Jean Claude yavuze ko kuba abasheshe akanguhe ari bo bagera kuri site z’itora bwa mbere ari urugero rwiza baba batanga ku bato.

Akarere ka Musanze kagizwe n’ ibyumba by’itora 514, ahantu ibiro by’itora 72, n’abatora barenga ho gato bihumbi 248 000.

Karongi:

JPEG - 154 kb
Abanya Karongi bari biteguye amatora nk’ubukwe

Mu karere ka Karongi abaturage batangiye kugera ku biro by’itora saa kumi z’ijoro bategereza bihanganye kugera saa moya za mugitondo amatora atangiye.

Ibyumba by’itora byari bitaguue ku buryo butandukanye, hari iziteguye mu muco nyarwanda, zirimo uruhimbi ruriho inkongoro z’amata, ibiseke n’ibisabo. Hari n’ababyeyi bateze ingori abandi bambaye imishanana bishimiye gutora umukuru w’igihugu.

Mukambaraga Claire atuye mu kagali ka Gisanze avuga ko yishimiye gutora Perezida kandi akaba yisubiriye mu mirimo ye.

Ati”amatora ntabwo yahagaritse ibindi bikorwa ubu maze gutora kandi ngiye gukomeza imirimo yanjye,ndi kubona abantu batuje kandi bitabiriye, ntoye umuyobozi nihitiyemo ishema ry’igihugu cyacu”.

JPEG - 207.4 kb
Abihayimana bari mu bazindutse cyane i Karongi

Umuhuzabikorwa w’amatora mu turere twa Karongi na Rutsiro Mukeshimana Yasoni avuga ko mu karere ka Karongi abagomba gutora basaga ibihumbi 200 bagatorera kuri site 93.

Ati”abantu bitabiriye amatora bazindutse nta kibazo na kimwe twagize, turabona nka saa sita haraba hasigaye abantu bake cyane ku buryo ku isaha ya saa cyenda baraba barangije bose”.

Umuyobozi w’akarere ka Karongi Ndayisaba Francois avuga ko abaturage bazindukiye ku biro by’itora bagatora bishimye cyane, barangiza bakisubirira mu mirimo yabo.

Ati” Abaturage bari gukora imirimo yabo abacuruzi bari gukora,imodoka ziri ku genda uratora warangiza ikisubirira mu mirimo nta kibazo’’.

Ku biro by’amatora bitandukanye muri Karongi, abagore batwite,abafite ubumuga,abakecuru n’abasaza n’abandi bafite intege nke babanza gutora badatonze umurongo.

Rwamagana:

Abaturage batoreye mu karere ka Rwamagana bemeza ko amatora bitabiriye bayafashe nk’ubukwe dore ko bari bamaze igihe bategereje uyu munsi.

Bamwe mu baturage baganiriye n’Imvaho Nshya bemeza ko kwitabira amatora hakiri kare babikesha kuba barasobanuriwe ibijyanye n’ayo ndetse n’abakandida hakiri kare.

Karira Gaspard watoreye kuri site ya Lycee Islamique mu kagari Cyanya mu murenge wa Kigabiro ni umusaza w’imyaka 77, yagize ati “ku bwa Kayibanda naratoye no ku bwa Habyarimana naratoye ariko hose nta na hamwe nigeze mbona amatora ateguwe neza nk’uku, umuntu ayakangurirwa mbere akamenya ko azitorera umuyobozi bitari nka bya bindi bya mbere baduhatiraga gutora, kandi nabwo dutora umuntu umwe rukumbi ubu njye namaze kwihitiramo uwo numva unyuze.”

Mukakimenyi Godebereta ari mu kigero cy’imyaka 95 yabwiye Imvaho Nsha ko kuba ko kwitorera umukuru w’igihugu ari umwe mu mirage myiza azasigira abana be.

Ati “Ndangije gutora , ibi ni ibitangaza ni ubukwe nanjye nicyo cyandizaga numvaga nshaka gutora byibuze ijwi ryanjye ryanyuma ndaritanze nifuzaga ko byibuze nanjye nagira umurage nsigira abana banjye, dutoye neza dutoye mu mahoro n’umutekano.”

Umuyobozi w’intara y’iburasirazuba Kazire Judith yemeza ko ibikorwa by’amatora mu Rwanda ari ubudasa.

Yakomeje agira ati “Uyu ni umunsi w’ibyishimo twari tuwutegerezanye ibyishimo ibihe bishize byose byagenze neza haba mu myiteguro yabanjirije iki gikorwa cy’amatora, uyu munsi igikorwa abanyarwanda bazindukiyemo ni igikorwa cy’indashyikirwa ni igikorwa kigaragaza indi ntera muri demokarasi mu gihugu cyacu.”

Kuri bimwe mu biro by’itora byasuwe n’Imvaho Nshya hagati ya saa tatu za mugitondo na saa yine ahenshi bari bashoje gutora hasigaye abantu bake bataratora.

Rubavu:

Umujyi wa Rubavu uhana imbibi n’igihugu cya Repubulika Iharanira Demokarasi ya Congo kuri uyu munsi y’amatora y’umukuru w’igihugu wasangaga ari urujya n’uruza rw’abaturage aho bamwe babyutse kare kare bitabira gutora kugira ngo bahite bajya mu bucuruzi butandukanye cyane ku banyarwanda bakorera mu mujyi wa Goma.

JPEG - 280.4 kb
Abanya Rubavu bazindukiye ku biro by’itora ari benshi

Hadji Karimunda Jamad umuyobozi ukuriye komisiyo y’Amatora mu ntara y’Uburengerazuba avuga ko amatora muri rusange mu ntara yagenze neza ntihagira imbogamizi zigaragara mu byumba by’itora kuko bari bariteguye bihagije.

Ati “ Twari twariteguye bihagije kuko kuva mu rukerera abantu bari batangiye kugera aho batorera, imirongo yari yose kuko bari gutora bagahita bajya mu mirimo yabo itandukanye,ubufasha bwose burahari bubafasha kandi bari gutora bameze neza ubona koko ko ari ubukwe.”

Rwamucyo Emmanuel ni umwe mu ndorerezi wari uhagarariye umuryango wa FPR Inkotanyi yagize ati ”ikigaragara amatora aragenda neza abantu bayitabiriye ari benshi nta kibazo na kimwe gihari,nabonye umwihariko w’amatora mu mutuzo,abakorerabushake bakoze uko bashoboye ngo bite ku baturage babafasha n’uwagiraga ikibazo bamwerekeraga bakamufasha.”

JPEG - 274.8 kb
Abasheshe akanguhe nabo ntibatanzwe

Umuturage w’imyaka 75, Hitayezu Jerome yabwiye Imvaho Nshya ko yishimiye uburyo yakiriwe ku biro by’itora.

Yagize ati ”Njye nishimye cyane kuba ngeze kuri iyi myaka nkaba naje kwitorera umukandida numvaga nkunze kandi nshigikiye, nagize n’amahirwe nsanga hari abantu batwakira neza cyane ibi byanshimishije kuko natoye mu mudendezo,ubu ni ubukwe rwose bushimishije twajyaga twumva kuri radio ngo bizaba ari ubukwe none twabyiboneye n’amaso.”

Mu karere ka Rubavu wasangaga ibyumba by’itora byari biteguye neza cyane bitatse mu buryo bugezweho ndetse n’uburyo bwa gakondo aho harimo ibiseke,ibirago ,inkongoro n’ibindi bitandukanye.

JPEG - 273.5 kb
Gen. Murokore, umuyobozi w’Inkeragutabara mu ntara y’Uburengerazuba ni umwe mu batoreye i Rubavu
JPEG - 237 kb
Ibyumba by’amatora byo mu karere ka Rubavu byari bitatse neza

IMVAHO NSHYA, UPCOUNTRY NEWS REPORTERS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE