2017-09-20 12:30:19 clouds 27o High | Kigali Rwanda

Dukurikire:
 
 

Amajyepfo:Abayobozi mu rwego rw’ubuhinzi n’ubworozi muri Nigeria barigira k’u Rwanda

Yanditswe na IMVAHO NSHYA

Kuya 2017-08-04 08:19:50

 
Share on:
 
Yasuwe:41
 
Yavuzweho:200
 
10
 
10

Itsinda ry’abayobozi 13 mu nzego nkuru zifite aho zihuriye n’ubuhinzi n’ubworozi muri Nigeria bari mu Rwanda, basuye intara y’Amajyepfo, muri gahunda yo kwigira ku bikorwa by’indashyikirwa mu rwego rw’ubuhinzi n’ubworozi, by’umwihariko ibikorwa hifashishijwe ikoranabuhanga.

Muri uru ruzinduko aba bashyitsi basuye ibikorwa by’ubushakashatsi bikorerwa mu kigo cy’igihugu gishinzwe guteza imbere ubuhinzi n’ubworozi (RAB), bishimira uburyo Leta y’u Rwanda ishyira imbaraga guteza imbere ibikorwa by’ubuhinzi n’ubworozi.

Iri tsinda ry’abanya Nigeria baje mu rugendoshuri mu Rwanda, rigizwe na bamwe mu bakuriye inzego nkuru za Leta muri Nigeria, basuye kandi ahakorerwa ubushakashatsi bw’ibihingwa binyuranye, ndetse n’ahakorerwa ubworozi mu kigo cya RAB.

JPEG - 255 kb
Abanyanijeriya 13 baje kwigira ku Rwanda ubumenyi n’ikoranabuhanga mu buhinzi

Nyuma yo kwerekwa uburyo bwo kurinda ibimera indwara binyuze mu bushakashatsi n’ikoranabuhanga, Prof. Habu Galadima waje akuriye iryo tsinda, yavuze ko bigiye byinshi ku Rwanda, birimo nko kwishakamo ibisubizo mu guhangana n’ibibazo bishobora guturuka mu buhinzi.

Yagize ati "Mu Rwanda twasanze harashyizwe imbaraga zidasanzwe mu kwishakira ibisubizo by’ibibazo, iyo rero ni imwe mu ngamba nziza zo guhangana n’imbogamizi nyinshi zishobora kugaragara, urugero nko mu buhinzi gahunda yo guhuza ubutaka, iyi ni imwe muri gahunda nziza u Rwanda rwahisemo kandi rwose iri gufasha u Rwanda kubasha gukoresha ikoranabuhanga mu buhinzi.

Ndetse indi ngamba nziza twabonye mu Rwanda ni gahunda ya Girinka iyi ni gahunda nziza cyane kuko ntiri gufasha abaturage kubasha gukora ubuhinzi biturutse kwifumbire gusa, ahubwo yabaye n’inzira nziza yo kuvana ibihumbi byinshi by’abanyarwanda mu bukene, iri rero ni isomo ryiza cyane twungutse".

Karangwa Patrick, umuyobozi w’ubushakashatsi muri RAB, avuga ko kuba aba banya Nigeria barahisemo kuza mu Rwanda ari uko rwasize mu buryo bugaragara igihugu cya Nigeria mu ikoranabuhanga ry’ubuhinzi n’ubworozi, ariko kandi akaba ari no muri gahunda yo gufatanyiriza hamwe nk’ibihugu bya Afrika kugira ngo babashe kwihaza mu biribwa nta gihugu gisigaye inyuma.

Biteganyijwe ko iri tsinda ry’abanya Nigeria rizamara iminsi 12 mu Rwanda, basura ibikorwa binyuranye by’ubumenyi, ikoranabuhanga no guhanga udushya mu buhinzi n’ubworozi.

UMUTONI BEATHA

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE