2017-09-22 08:28:25 clouds 27o High | Kigali Rwanda

Dukurikire:
 
 

Prof. Mbanda yagaragaje itandukaniro ry’amatora y’ubu n’ayo hambere

Yanditswe na IMVAHO NSHYA

Kuya 2017-08-03 06:38:57

 
Share on:
 
Yasuwe:93
 
Yavuzweho:200
 
10
 
10

Perezida wa Komisiyo y’igihugu y’amatora, Prof Kalisa Mbanda, yasobanuye itandukaniro riri mu matora akorwa kuri ubu mu Rwanda n’ayakorwaga mu bihe byo hambere.

Ubwo yagezaga impanuro ku ndorerezi zo mu ihuriro ry’imitwe ya politiki mu Rwanda, Prof. Kalisa yasobanuye ko amatora yo hambere yari umuhango aho yagereranywaga no gutoresha ibirenge kuko abantu bayajyagamo mu buryo bwo kubura uko babigira ariko bitabari ku mutima, ibintu bitandukanye cyane n’amatora akorwa kuri ubu kuko usanga Abanyarwanda bose bayashishikariye.

Mbanda yerekanye ko kuri ubu Abanyarwanda bitabira ibikorwa bibanziriza amatora birimo nko kwiyandikisha ku malisiti y’itora, gukurikirana ibikorwa byo kwiyamamaza kw’abakandida kandi mu mutekano, gufasha komisiyo y’amatora gutegura ibijyanye n’amatora, ahazatorerwa n’ibindi.

JPEG - 302.2 kb
Perezida wa komisiyo y’amatora, Prof Kalisa Mbanda asobanura itandukaniro ry’amatora y’ubu n’ayo hambere (Niyonsenga S)

Ibi kandi binagaragazwa no kuba abakoreshwa mu matora y’u Rwanda bitwa Abakorerabushake kuko atari abakozi bahembwa ahubwo ari abakoreshwa n’ubwitange.

Prof. Kalisa Mbanda yagize ati “Kuri ubu ubona ko Abanyarwanda bamaze gusobanukirwa, usanga badahatwa kandi buri wese akagaragaza ubwitange bwe mu migendekere myiza y’amatora. Iyo ubona nk’Abanyarwanda baba bitabira ibikorwa byo kwiyamamaza ndetse n’uburyo umuntu wese aba ashishikajwe n’uko itariki y’amatora igera bikwereka ko hari ubushake bw’Abanyarwanda.”

Gutora by’umuhango byabagaho kandi ngo ni na byo byatumaga amatora adakorwa neza ndetse ugasanga abantu benshi batoye imfabusa bitewe n’uko babikoze bitabarimo; perezida wa Komisiyo y’amatora asaba abazitabira amatora kuzashishoza bagatora ingirakamaro.

Perezida wa Komisiyo y’amatora mu Rwanda anavuga ko guhera mu gihe cy’ubukoloni umuco w’Abanyarwanda wagiye uvangirwa cyane n’abazungu bazanagamo ibyo bifuza byabafashaga gukoloniza neza igihugu, ibi bikaba ari na byo byatumaga Abanyarwanda batisanzura.

Ati ariko “Ubu amatora yacu ni ubukwe, iyo rero bibaye ubukwe ni uko umuntu wese aba yibona muri cya gikorwa.”

Umuvugizi w’ihuriro ry’imitwe ya politiki mu Rwanda, depite Mukakarangwa Clotilde, na we yemeza ko n’ubwo iri huriro rizajya mu matora nk’indorerezi ngo bizaborohera kuko bagiye mu bukwe.

Ati “Nk’indorerezi tugiye mu bukwe, nta bwo tugiye mu bugenzuzi, ni ugufasha, ni ukugaragaza uruhare rwacu kugira ngo Abanyarwanda bose bibone muri cya gikorwa.”

NIYONSENGA SCHADRACK

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE