2017-11-22 09:53:14 clouds 27o High | Kigali Rwanda

Dukurikire:
 
 

Kagame yikomye abatega iminsi u Rwanda

Yanditswe na IMVAHO NSHYA

Kuya 2017-08-02 15:18:20

 
Share on:
 
Yasuwe:487
 
Yavuzweho:200
 
10
 
10

Umukandida w’Umuryango FPR Inkotanyi, yihanije abatega iminsi u Rwanda, ntibanyurwe n’uko kuri ubu ruganjemo amahoro ahubwo bakavuga ko ruzajya mu icuraburindi igihe azaba atakiruyoboye.

Ibi yabigarutseho ubwo yiyamamarizaga mu murenge wa Bumbogo mu karere ka Gasabo kuri uyu wa 2 Kanama 2017, ari naho yasoreje ibikorwa byo kwiyamamariza amatora azaba ejo bundi ku wa Gatanu ku ya 5 Kanama.

JPEG - 47.3 kb
Umukandida Paul Kagame asuhuza abaturage mu karere ka Gasabo

Yagize ati “Umunsi dutangira ibikorwa byo kwiyamamaza, hari ibyo navuze mpereye ku bivugwa n’abandi badutega iminsi. Noneho ubu baravuga ngo: ‘ariko buriya, Kagame nazaba atakiri umuyobozi buriya u Rwanda ruzagira amahoro?’ . Ubu noneho baradutega ibihe bizaza ko tutazagira amahoro ariko noneho nanabaza nti “ariko mbere ya Kagame u Rwanda wari rufite amahoro? “

“Ibyo se ko babishimaga? bashimaga ibya mbere ya Kagame hatari amahoro, none ubu baradutega iminsi ya nyuma ya Kagame? Reka mbabwire ikindi: uru Rwanda, rwacu aho ruvuye aho rugeze n’aho rujya , u Rwanda rw’ubudasa, twize byinshi… ntabwo ibyo twiga bipfa ubusa.”

Paul Kagame yasobanuye ko akurikije aho igihugu kigeze ntawe ukwiriye guhitiramo Abanyarwanda uko babaho, cyane ko nawe ku giti cye atajya yubahiriza umuntu umutegeka icyo agomba gukora.

Yagarutse ku matora y’ibihugu byitwa ko bifite demokarasi, nka Leta Zunze Ubumwe za Amerika, aho banze ibyavuye mu matora bakavuga ko ari u Burusiya bwinjiriye ikoranabuhanga bugatoresha Perezida Donald Trump.

Ati “Ikindi bakavuga ngo nibo bazi demokarasi, nibo bayigisha, ariko turabizi mu bya vuba aha, hari abagiye nabo mu gikorwa cya demokarasi bajya mu matora ariko barangije ngo ntabwo ibyavuyemo ari byo twashakaga, ngo hari abantu bagiye muri mudasobwa baduhindurira ibintu, ubu dufite umuyobozi tutashakaga. “

“Ariko demokarasi yawe, uwo muyobozi niwe yaguhaye! Wavuga ute ko utamushaka se? Cyangwa warenga ibyo ukajya kubwira abandi uko bakora demokarasi yabo gute?”

Umukandida Kagame yakomeje abwira abasaga ibihumbi 500 bari bamuteze amatwi ko abananiwe kwemera ibyavuye mu matora iwabo badashobora kwigisha Abanyarwanda demokarasi.

Yongeraho ati “ Ariko wari uziko hari n’abavuga ngo Kigali, umurwa mukuru w’u Rwanda n’iyo inyuma mu byaro ngo hari isuku ariko ngo iyo suku ntabwo ari demokarasi, ni dictatorship (igitugu)?! Ariko icyo bivuze ni agasuzuguro basuzugura Abanyafurika, basuzugura u Rwanda! Kuko Abanyafurika, Abanyarwanda bakwiye kwicara mu mwanda ntacyo bakwiriye kuba bawunengaho. Ibyo bivaho bakinjira no muri politiki noneho ibyo twishakiye bakavuga ko atari byo bitubereye, nibo bakwiye guhitamo.”

JPEG - 55 kb
Abitabiriye gusoza ibikorwa byo kwiyamamaza kwa Paul Kagame basaga ibihumbi 500
atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE