2017-11-18 15:01:27 clouds 27o High | Kigali Rwanda

Dukurikire:
 
 

Nyirarukundo yizeye kwitwara neza muri shampiyona y’Isi

Yanditswe na IMVAHO NSHYA

Kuya 2017-08-02 08:39:56

 
Share on:
 
Yasuwe:78
 
Yavuzweho:200
 
10
 
10

Nyirarukundo Salome yitabiriye amarushanwa ya shampiyona y’Isi y’imikino ngororamubiri izabera i Londres mu Bwongereza“IAAF World Championships London 2017” kuva tariki 04-13 Kanama 2017.

Uyu mwari ugiye guhagararira u Rwanda muri aya marushanwa ya shampiyona y’isi yahagurutse i Kigali ejo hashize ku wa Kabiri tariki 1 Kanama 2017 yerekeza mu Bwongereza ajyanywe n’indege ya RwandAir.

Nyirarukundo wari umaze ibyumweru bitatu mu gihugu cya Kenya yitegura iyi shampiyona, yatangaje ko uko yitwaye mu myitozo yakoze ari kumwe n’abandi bazahurira muri iyi shampiyona bimuha icyizere cyo kwitwara neza agahesha ishema igihugu.

Ati “Imyiteguro yagenze neza kuko nakoranaga n’abandi babonye itike kimwe nkanjye, twese twakoreraga hamwe, niteguye ibyumweru bigera kuri 3 nubwo atari igihe kinini ariko kuri jyewe ndiha icyizere cyo kwitwara neza kuko maze kwitabira amarushanwa menshi akomeye”.

JPEG - 309.4 kb
Nyirarukundo Salome witeguye guhesha ishema u Rwanda muri shampiyona y’isi izabera i Londres

Atangaza ko abo bazahatana barimo n’abakinnyi bakomeye basanzwe bazwi mu rwego rw’Isi, gusa yemeza ko nawe agiye gushaka umudali kandi ko yiteguye guhangana na bo.

Ati “Ni shampiyona ikomeye, biba ari igihe cyiza cyo kugira ngo nkomeze nkore cyane, n’ubwo bikomeye hariya tuhahurira n’abakinnyi bakomeye bo ku rwego rw’isi baturuka mu bihugu nka za Ethiopia, Amerika n’ibindi bihugu byinshi bikomeye”.

Yemerewe guhiganwa muri shampiyona y’Isi nyuma yo kwitwara neza mu mikino ya olempike yabereye i Rio de Janeiro muri Brazil mu mwaka ushize. Azasiganwa mu bakuru ahareshya na kilometero icumi (10 km).

Nyirarukundo yajyanye mu Bwongereza na Perezida w’Ishyirahamwe ry’imikino ngororamubiri mu Rwanda “RAF”, Munyandamutsa Jean Pierre ugomba kwitabira inama y’inteko rusange y’ishyirahamwe mpuzamahanga y’imikino ngororamubiri ku isi “IAAF” iteganyijwe kuzaba mbere y’uko aya marushanwa atangira.

NKOMEJE GUILLAUME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE