2017-11-23 18:23:19 clouds 27o High | Kigali Rwanda

Dukurikire:
 
 

Amateka ya Sergio Kun Agüero umaze imyaka 6 akinira Manchester City

Yanditswe na IMVAHO NSHYA

Kuya 2017-08-01 13:11:20

 
Share on:
 
Yasuwe:55
 
Yavuzweho:200
 
10
 
10

Ku wa Gatanu tariki 28 Nyakanga 2017, nibwo rutahizamu wa Manchester City Sergio Kun Agüero ukomoka muri Argentine yujuje imyaka itandatu akinira iyi kipe yo muri shampiyona y’u Bwongereza.

Umutoza Roberto Mancini wazanye Kun Agüero muri Manchester City amutanzeho miliyoni 38 z’amapawundi avuye muri Atletico Madrid yari yizeye ko abonye umwe muri barutahizamu beza kandi wai ufite impano ushobora kuzabageza kuri byinshi mu gihe kizaza.

Mancini waje gutangaza ko afata Kun Agüero nk’impanga y’umunyabigwi Romario ukomoka muri Brazil yamusinyishije amasezerano y’imyaka 5 ubwo yageraga muri iyi kipe tariki 28 Nyakanga 2011.

Sergio Agüero utaragize impera nziza za shampiyona y’umwaka ushize w’imikino (2016-2017) yafashije Manchester City gusoreza ku mwanya wa 3 muri shampiyona y’u Bwongereza nyuma yo kuyitsindira ibitego 20 mu mikino 31 yayikiniye.

AMAVU N’AMAVUKO YA KUN AGÜERO

JPEG - 65.2 kb
Sergio Kun Aguero

Sergio Kun Agüero yabonye izuba tariki 2 Kamena 1988, avukira i Buenos Aires muri Argentine. Ni umwana wa kabiri mu muryango w’abana 7 bavuka kuri Leonel Del Castillo wari umushoferi na Adriana Agüero wari umukozi wo mu rugo.

Aba bavandimwe be barimo Gaston Del Castillo Agüero, Mauritius Del Castillo Agüero, Yesica Del Castillo Agüero, Daiana Del Castillo Agüero, Gabriela Del Castillo Agüero, Maira Del Castillo Agüero.

BIMWE WAMENYA KURI KUN AGUERO

Sergio Kun Agüero ni umukinnyi mpuzamahanga ukomoka muri Argentine akaba akinira Manchester City n’ikipe y’igihugu y’Argentine. Uyu rutahizamu afite ibiro 69 akaba areshya na metero imwe na 70 (1.70m).

Kun Agüero wahoze ari umukwe wa Diego Maradona aho yari yashakanye n’umukobwa we, Gianinna Maradona mu 2008 baje gutandukana mu 2012 nyuma y’imyaka ine bari bamaranye. Sergio Kun Agüero na Gianna Maradona babyaranye umwana umwe Benjamin Agüero wavutse tariki 19 Gashyantare 2009.

SOBANUKIRWA IMPAMVU YAHAWE IZINA RYA NYINA

Sergio Kun Agüero, ubwo yavukaga ubuyobozi bw’ibitaro yavukiyemo bwasanze ababyeyi be bose nta numwe ugejeje imyaka yo kubaka urugo ndetse bari batarashakana bituma babashyira mu cyiciro cy’abato.

Muri icyo gihe se, Leonel Del Castillo yari afite imyaka 19 naho nyina, Agüero afite 18. Ibi byiyongera ku kuba nta numwe wari ufite irangamuntu kubera ko bari bimuwe n’umwuzure wari mu gace bari batuyemo wari watembanye buri kimwe cyose bari batunze mu rugo.

Leonel Del Castillo ntabwo yemerewe gusinya mu mpapuro zo kwa muganga, byatumye Sergio Kun Agüero adahabwa izina rye “Del Castillo” kuko byasabye umuryango we gushaka umuntu waza kubasinyira ngo amuhagararire.

Ubwo habagaho gusinya, “Sergio” nk’izina yahawe n’uwabasinyiye hiyongereyeho n’izina rya nyina “Agüero” ari nayo mazina yemejwe ashyirwa mu bitabo akaba ari yo azwiho kugeza ubu.

Sergio Agüero bitandukanye n’abandi bavandimwe be, Yesica, Gabriela, Maira, Daiana, Gaston na Mauritius yafashe izina rya nyina “Agüero” mu gihe bo bafite irya se wabo “Del Castillo”.

MENYA INKOMOKO Y’IZINA RY’AKABYINIRIRO KUN

Sergio Agüero, ubwo yari afite imyaka imyaka ibiri, umuryango we waje kwimukira Florencio Varela mu majyepfo ya Buenos Aires. Baje kuba inshuti cyane n’undi muryango bari baturanye, Chetti na Jorge Chetti ari nabo bahaye Sergio Agüero akazina k’akabyiniriro ka “Kun”.

Iri zina ryabaye imvano ya filimi “Wanpaku Amukashi kum kum” y’uruhererekane ikoze mu buryo baha ibintu ubushobozi bwo gukora nk’umuntu “animated series” y’abayapani yakundaga kunyura kuri Televiziyo, Kun Agüero yaje gukunda umwana n’umuryango we bari bayigaragayemo aho bari batuye munsi y’umusozi wa kum kum.

Uko iminsi yagiye itambuka, nk’umwana kubera kudidimanga agakunda cyane kuvuga “Kum kum”, byaje kuba intandaro bimuviramo kwitwa “Kun”, ubu yitwa Kun Agüero.
Sergio Agüero, ubwe yigeze gutangaza ati “Naje gukura ndyishimira kubera ko ririhariye. Bitagoye kubona umukinnyi witwa izina kubera igishushanyo gikina filimi (cartoon)”.

INZIRA YANYUZEMO KUGERA KU RWEGO AGEZEHO

Kun Agüero afite imyaka 3, umuryango we wimukiye mu nzu ntoya kandi yoroheje ihereye hanze ya Los Eucaliptus, umujyi ukennye ku mbibi z’uturere twa Quilmes na Beranal.

Abahatuye barahuraga bagakina amasaha maremare ari naho Agüero yatangiye kugaragaza bimwe mu bimenyetso by’impano ye ku mupira ndetse uko imyaka yagiye itambuka ntiyatinze kwiyerekana mu buryo bugaragara.

Mu gukomeza guhozwaho ijisho na se, Leonel n’igitsure cya nyina, Adriana wanyuzagamo akanamuha n’ibihano yaje kwerekeza mu makipe atandukanye y’abato yo mu majyepfo ya Buenos Aires.

Kun Agüero wari uzi kwiyubakira izina abikesha ubuhanga mu gufata icyemezo nka rutahizamu. Mu marushanwa yagiye akina, yaje kwerekeza muri Independiente y’abato afite imyaka 9 (1997).

Nyuma y’imyaka 6 mu ikipe y’abato, Agüero yerekeje mu ikipe nkuru afite imyaka 15 akomeza kwigaragaza kuko mu myaka itatu yayibayemo yayikiniye imikino 56 ayitsindira ibitego 23.

Mu 2006, Agüero yaciye agahigo ko kugurwa miliyoni 23 z’amapawundi ubwo yerekezaga muri Atletico Madrid. Mu myaka 5 yayibayemo yatsinze ibitego 101 mu mikino 234.

Muri Atletico Madrid yayifashije kwitwara neza ayigarurira igitinyinyiro muri shampiyona ya Espagne ndetse no mu ruhando mpuzamahanga yaje kwifuzwa na Manchester City anayerekezamo mu 2011.

Kun Agüero, mu mwaka wa mbere atozwa na Mancini yabashije kuyihesha igikombe cya shampiyona y’u Bwongereza “Premier League” (2011-2012) ni nyuma yo kuyitsindira ibitego 23 mu mikino 34 yakinnye muri iyi shampiyona.

Yongeye guhesha Manchester City igikombe cya shampiyona y’u Bwongereza (2013-2014) ubwo yatozwaga na Manuel Pellegrini. Aha akaba yarayikiniye imikino 23 ayitsindira ibitego 17.

Mu mwaka ushize w’imikino wa 2016-2017, ntabwo wabaye mwiza kuri uyu mukinnyi ni nyuma yo kuza k’umutoza mushya, Pep Guardiola waje kumwicaza ku ntebe y’abasimbura agahitagamo rimwe na rimwe kubanza mu kibuga Gabriel Jesus ukomoka muri Brazil.

Muri iki gihe cy’isoko ry’igura n’igurisha, hagiye havugwa ko Kun Agüero atishimiye kuba muri Manchester City ndetse ko ashobora no kuyisohokamo nyamara Pep Guardiola aherutse kwitangariza ko ntaho azajya.

Sergio Agüero watangiye gukinira Argentine mu 2006, amaze kuyikinira imikino 88 atsinda ibitego 33. Yatwaranye nayo umudali wa zahabu mu mikino Olempike (2008) n’ibikombe 2 by’isi mu batarengeje imyaka 20.

BIMWE MU BIHEMBO YEGUKANYE N’UDUHIGO YESHESHEJE

Kun Agüero yatwaranye na Atlético Madrid UEFA Europa League imwe na UEFA Super Cup (2010). Muri Manchester City yatwaye ibikombe 2 bya shampiyona 2, League Cup 2 na FA Community Shield imwe.

Ku giti cye yahawe igihembo cy’umukinnyi mwiza ukiri muto n’igihembo cya Tuttosport Golden Boy (2007), World Soccer Young Player of the Year (2009), Etihad Player of The Year inshuro 2, Etihad Goal of the Season, umukinnyi w’ukwezi muri shampiyona y’u Bwongereza inshuro 5 n’icy’umukinnyi w’umwaka (2014-2015).

NKOMEJE GUILLAUME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE