2017-09-22 08:28:25 clouds 27o High | Kigali Rwanda

Dukurikire:
 
 

Ibyo twanyuzemo nibyo byinshi, ahasigaye ni ukunyerera gusa tukagenda –Paul Kagame

Yanditswe na IMVAHO NSHYA

Kuya 2017-07-27 14:28:40

 
Share on:
 
Yasuwe:498
 
Yavuzweho:200
 
10
 
10

Ubwo umukandida wa FPR Inkotanyi, Paul Kagame yiyamamazaga mu murenge wa Rubengera mu karere ka Karongi kuri uyu wa 21 Nyakanga 2017, yavuze ko kuri ubu byoroheye cyane Abanyarwanda gutera imbere, kuko ibibabangamira byagabanutse cyane.

Kagame yavuze ko mbere y’ubukoloni Abanyarwanda bari bafite igihugu cyabo, ariko hakaza abazungu bakabumvisha ko ari bo babacumbikiye, bakakibatwara. Yasobanuye ko ubukoloni bwakurikiwe n’ubuyobozi bubi.

Ati “ Ibyo kugira igihugu kikagira ba nyiracyo, Abanyarwanda, ntabwo navuga rwose ko birenze imyaka 23. Ubundi cyari icy’abagiraneza baza bakadusigira, bakadukuburira, barangiza bakatwigisha demokarasi yabo ko ari wo mwambaro tugomba kwambara, ntabwo ari byo, hari umwambaro w’Abanyarwanda.”

Yatanze urugero ku buryo abakoloni bashatse ko Abanyarwanda bata umuco wabo, ati “Byari nko kutubwira ngo iyi mishanana abategarugori bacu bambara ko nta kirimo ? Muyijugunye mwambare ibizibaho bigera hano [mu matako].. hasi hambare ubusa ngo nibyo bigezweho, ngo nibyo by’amajyambere. Ariko ubu Abanyarwanda bamenye ko igihugu ari icyabo, umushanana ni umwambaro ushobora kwambarwa aho ari hose.”

JPEG - 91.9 kb
Paul Kagame asuhuza abaturage b’i Karongi

Umukandida wa FPR Inkotanyi akaba na Perezida wa Repubulika, yongeyeho ko hari abaza kuneka niba abaza mu bikorwa byo kwiyamamaza kwe baba bashyizweho agahato ariko bahagera bagatungurwa n’urugwiro abaturage bamufitiye.

Yagize ati” N’aba bose birirwa bagenda muri iyi mihanda ndetse bakaza wenda hano ngo kureba ko Abanyarwanda baba baje bitabiriye nk’aha ngaha bazanwe ku gahato bafatiweho imbunda baraza bababona ntibabyumve kuko bataramenya uko u Rwanda rushya rumeze. “

“U Rwanda rushya , u Rwanda rwacu, u Rwanda rurimo ubuyobozi Abanyarwanda bose bisangamo, nta nenge rufite. Rero, Banyakarongi, buri wese asubije amaso inyuma ndetse agatekereza aho tuvuye n’aho tugeze sinzi ko hari ugushidikanya ko tumaze gutera imbere muri byinshi. Duteye imbere mu mutekano, mu bumwe, mu muco no gukora tukiteza imbere.

Kugera ku iterambere muri iki gihe byoroheye Abanyarwanda

Paul Kagame yunzemo ko kubaka iterambere rirambye bisaba imbaraga nyinshi, ariko ko kuri ubu byoroshye cyane ugereranyije no mu gihe cyashize.

Ati “ Bisaba kandi bitwara igihe kinini bisaba imbaraga bisaba amikoro ariko byose turi mu nzira yabyo. Ari igihe turagifite, ari imbaraga turazubaka, ari amikoro nayo aragenda aza, gukora byo turabisanganwe. Banyakarongi rero nta rugamba rwadutera ubwoba, ibyo tumaze kunyuramo nibyo byinshi, nibyo byari bikomeye, ahasigaye ni ukunyerera gusa tukagenda. Ari abatuvangira ibyo barabikoze bararuha, twe dusigara tugenda. N’iyo bamara kuruhuka bakagaruka, bazongera baruhe twe dukomeze tugende, turabiteguye.”

Ejo ku ya 28 Nyakanga, umukandida Paul Kagame azakomereza ibikorwa byo kwiyamamaza muri Karongi na Nyamasheke, uturere two mu ntara y’Uburengerazuba.

JPEG - 57.8 kb
Abaturage b’i Karongi bishimiye kwakira Paul Kagame

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE