2017-09-21 09:07:12 clouds 27o High | Kigali Rwanda

Dukurikire:
 
 

Musanze: Abagore biyemeje gutora 100% Kagame wabasubije agaciro

Yanditswe na IMVAHO NSHYA

Kuya 2017-07-26 10:38:49

 
Share on:
 
Yasuwe:49
 
Yavuzweho:200
 
10
 
10

Abagore bo mu karere ka Musanze b’abanyamuryango ba FPR-Inkotanyi n’abo mu yandi mashyaka ashyigikiye umukandida Perezida, Paul Kagame, biyemeje ko bazamutora 100% kuko ari we wabasubije agaciro bari barambuwe na Leta zasimburanye mu Rwanda mbere ya 1994.

Aba bagore bavuga ko Perezida Kagame ari we washoboye gukura umugore ku nkeke y’ubuharike, bakira guhora bafatwa nk’abaja mu ngo zabo, aho bamwe mu bagabo bumvaga nta cyo umugore ashoboye uretse kwirirwa mu gikari, akaba ari nabyo bashingiraho bavuga ko nta mugore wabirengaho ngo atore undi utari Kagame.

Musanabera Marceline, umwe mu banyamuryango ba FPR-Inkotanyi muri aka karere, arasaba aba bagore bagenzi be gukomeza gushishikariza n’abandi kwitabirira amatora, kandi bagatora Kagame kuko imvugo ye ari yo ngiro, ndetse n’ibikorwa bye bikaba byivugira ubwabyo.

Musanabera yagize ati “Kudatora Kagame Paul ni ukongera gusubiza umugore ku ngoyi y’ubuharike n’ubuja yahozemo, uribuka ukuntu umugore yakubitwaga bikamujya mu muco ngo ni ko zubakwa? Umugabo akagufatira ikimasa akakigurisha ntukopfore?

JPEG - 150.8 kb
Abagore b’i Musanze ngo bazatora Kagame 100%

Akazana umugore wa kabiri, wa gatatu yewe n’uwa gatanu, kandi akamwirukanira igihe ashakiye bigafatwa bityo kuko byabaga ari ibintu bisanzwe, ariko kuva aho tugiriye Imana tukabona Kagame, ubu umugore arisanzura, afite ijambo. Yaraje itegeko nshinga arishinga ko umugore umwe agomba gutungwa n’umugabo umwe, umugabo akagira umugore umwe, kandi imitungo bakayiringaniza 50% kuri buri ruhande.”

Yakomeje agira ati “Tuzamutora rero 100% ni yo ntego twiyemeje, ubu uzi ko ubu ubuharike bwari bwarabaye imbata muri iyi ntara y’Amajyaruguru, kugeza n’ubu haracyagaragara ibisigisigi by’ubuharike, aho hakigaragara imanza nke ku bijyanye n’amasambu, turifuza ko ubuharike nk’uko Kagame yiyemeje kuburwanya bube amateka, ku buryo n’umwana uzavuka azajya yibaza ubuharike icyo ari cyo”.

Nyiransabimana Eugenie, ukuriye urugaga rw’abagore bibumbiye mu Muryango FPR-Inkotanyi mu karere ka Musanze, yagize ati “Kuba abagore bo mu karere ka Musanze bibumbiye mu muryango FPR n’abandi bashyigikiye umukandida wayo Paul Kagame, bavuga ko bazamutora 100%, ni ibintu bifite ishingiro kandi amaso yerekwa bike ibindi akahitiramo, mbere y’uko abagore bajya mu mashyaka ni abanyarwandakazi, nta we Kagame yaheje.

Ubu umugore na we biremewe ko agira umutungo we bwite, ndetse n’uwo asangiye n’umugabo we, ubu umugore aracuruza, ariga, yashyizwe mu nzego bwite za Leta, kuko Kagame yaciye ya mvugo ngo urugo ruvuze umugore ruvuga umuhoro, ni hehe se abagore batamutora 100%? Ni twe tuzi aho yakuye umugore, tukaba tuzamutora.”

Yunzemo ati “Ahubwo ndasaba abagore bagenzi banjye kuzazinduka kare tukitorera umukandida wacu, abo mu yandi mashyaka na bo ndabasaba gukomeza gushyigikira uwabakuye mu buja no gutegera ibiganza abo bashakanye, no kuba kandi barasubijwe agaciro mu muryango”.

Intara y’Amajyaruguru ni imwe mu zakunze kurangwamo umuco mubi w’ubuharike n’ihohoterwa rikorerwa abagore n’abana mu myaka yashize, ariko magingo aya uyu muco waracitse, umugore ahabwa ijambo n’agaciro akwiye, bituma iterambere rirushaho kwihuta.

NGABOYABAHIZI PROTAIS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE