2017-11-18 15:01:27 clouds 27o High | Kigali Rwanda

Dukurikire:
 
 

Rusizi: Nsengiyumva yigobotoye ubukene abikesha inka yahawe muri Girinka

Yanditswe na IMVAHO NSHYA

Kuya 2017-07-26 07:54:57

 
Share on:
 
Yasuwe:86
 
Yavuzweho:200
 
10
 
10

Nsengiyumva Laurent, utuye mu mudugudu wa Kigurwe, akagari ka Ryamuhirwa, umurenge wa Nkungu, mu karere ka Rusizi, arashimira Perezida Paul Kagame wazanye gahunda ya Girinka mu Rwanda, yakuye abatari bake mu bukene, ubu imibereho yabo ikaba yarahindutse.

Nsengiyumva avuga ko yahoze atunzwe no guca inshuro, ariko ubu abarirwa mu bakungu, abikesha inka yahawe muri Girinka, yamuhaye ifumbire akisanga ari umwe mu bahinzi b’urutoki rwa kijyambere.

Mu kiganiro n’Imvaho Nshya, uyu musaza w’imyaka 60, yavuze ko yahawe iyi nka mu mwaka wa 2015, imusanga ari mu bukene bukabije, aho ngo yari atunzwe no gupagasa, agakorera amafaranga atarenga 700 ku munsi, ku buryo atari agishoboye gutunga abana be 6, ariko ngo aho amariye kuyibona ubu na we arakoresha abakozi akabahemba arenze ayo yakoreraga ku munsi.

JPEG - 461 kb
Nsengiyumva ashimagira ko iyi nka yamukuye mu bupagasi, none ubu akaba abarirwa mu bakungu

Avuga ko akimara kuyibona yahinze urutoki kuko yari yizeye ifumbire, atangira kurufumbira no kurwitaho mu buryo bunoze, ibyo gupagasa arabihagarika, ari bwo na we yatangiye gukoresha abakozi ahereye ku batwaraga iyo fumbire bayijyana muri urwo rutoki bakanamufasha kurukorera kugeza igihe rwatangiye gutanga ibitoki, atangira kugurisha ava mu cyiciro cy’abatishoboye.

Yagize ati “Inka Kagame yampaye ni yo yampaye ijambo mu bandi na ho uko nari meze nta jambo nari kugira kuko nari ndi hafi kwambara ibigunira kubera kubura icyo nambara, ariko mbonye iyi nka ubu ibintu bimeze neza n’uwashidikanya namugeza iwanjye akirebera.”

Yakomeje agira ati “Kubera iyi nka, mfite urutoki rurimo insina zigera ku 2000 kandi nta gitoki neza kiri munsi y’ibilo 80, igitoki gito nkigurisha amafaranga 6000 kandi bihoramo nkagurisha.

Mu gihe mbere y’iyi nka nari ntunzwe no guhingira abaturage bakampa utwo kugaburira abana iryo joro gusa, umugore n’abana ntibagire icyo bambara, mituweli yo kuyivuga byari nko guca umugani ku manywa, ariko ubu mfite abakozi 4 bahoraho bashinzwe kwita kuri uru rutoki gusa.”

Avuga ko hari igihe agurishiriza rimwe ibitoki 20 bakamuha amafaranga 150.000, amata y’inka na yo ngo akaba akama hejuru ya litiro 10 buri munsi akagurisha, bikaba byaratumye anahinga indi myaka nk’ibisyimbo, ibigori ndetse anatunganya icyayi cye cyari cyarazambye kubera kubura ifumbire, byose bigafatanyiriza hamwe kumwinjiriza amafaranga.

Uyu mugabo uhamya ko magingo aya yinjiza amafaranga ibihumbi 100 mu buhinzi bw’icyayi gusa utabariyemo ibindi, avuga ko iyi nka ari yo akesha ubuzima, ndetse ngo yiteguye kwigeza kure mu iterambere abiyikesha.

Umuyobozi w’akarere ka Rusizi wungirije ushinzwe imibereho myiza y’abaturage Nsigaye Emmanuel, avuga ko abahawe izi nka hafi ya bose bagaragaza impinduka mu iterambere kandi ngo n’abo zitarageraho zizabageraho, akabasaba gukomeza kuzifata neza kuko uko bazifata neza ari ko na bo zibafata neza.

BAHUWIYONGERA SYLVESTRE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE