2017-09-20 12:30:19 clouds 27o High | Kigali Rwanda

Dukurikire:
 
 

Rwamagana:Abageze mu zabukuru barishimira ubwisanzure buranga amatora mu Rwanda

Yanditswe na IMVAHO NSHYA

Kuya 2017-07-25 07:42:08

 
Share on:
 
Yasuwe:44
 
Yavuzweho:200
 
10
 
10

Bamwe mu bageze mu zabukuru b’i Rwamagana barashimira Leta imitegurire myiza y’amatora y’Umukuru w’Igihugu, kuko abakandida batandukanye basigaye bahabwa amahirwe angana mu kwiyamamaza kandi n’abaturage bagatora mu bwisanzure.

Zigirinshuti Siliveri, umusaza w’imyaka 74, atuye mu mudugudu wa Kabeza, akagari ka Bicaca mu murenge wa Karenge, mu buhamya bwe yagaragaje uko byagendaga kera.

Yagize ati “Itandukaniro ririho ubu ni uko amatora ari uburenganzira ntayegayezwa bw’umunyarwanda, ni ukwihitiramo uwo umuntu atora, nta bwo ari nka mbere aho umuntu bamutegekaga uwo atora, kuva kubwa Kayibanda uwiyamamazaga yabaga ari umuntu umwe rukumbi kandi utemerewe kumwanga, wajyaga gutora bakakwereka aho utora.

Ubu kuza kwiyamamaza nta nkurikizi z’uwaje n’utaje, ariko mbere si uko byari bimeze iyo utajyaga mu bikorwa byose bya Leta byo gutora habagaho inkurikizi ukaba wanabizira.”

JPEG - 327 kb
Abageze mu zabukuru nabo bitabira ibikorwa byo kwamamaza umukandida wa FPR Inkotanyi

Nyirimbibi Faustin w’imyaka 57, na we yagize ati “Ariya matora ya kiriya gihe nta bwo yari amatora, byari nk’ingufu zo gutora, urumva umuntu umwe kwiyamamaza byari ibintu bitoroshye, nta bwo yari amatora ahubwo byari ibintu byo guhata, byanze bikunze yagombaga gutorwa kandi n’uwatoye nabi nkuko babyitaga na we akamenyekana. Amatora turimo ubu ari mu cyerekezo cya Demokarasi nzima, isesuye, ubu tuzahitamo hari abakandida batatu, njye n’ubwo uwo nzatora muzi ariko nzahitamo ku rupapuro rw’itora hazaba hariho abandi ku buryo nzatora uwo nshaka.”

Aba basaza baganiriye n’Imvaho Nshya bemeza ko ibihe babayemo badashobora kuzabyibagirwa, ari yo mpamvu basaba urubyiruko gukoresha amahirwe bafite y’uko babayeho mu gihe cyiza bakabibyaza umusaruro.

Barayavuga Michel, umusaza w’imyaka 61, yagize ati “Amatora yo hambere wasangaga harimo irondakarere cyangwa se irondakoko, ubu turi muri demokarasi, ubu urisanzura ukava mu rugo uzi uwo ugiye gutora kandi ukaba ufite uburenganzira bwo guhitamo, twe ibihe twabayemo byari bibi cyane, nta bwo tuzabyibagirwa, ni yo mpamvu dusaba urubyiruko kudapfusha ubusa amahirwe bafite, bagakora batikoresheje kuko ubu u Rwanda ni igihugu cy’abanyarwanda kandi bisanzuyemo.”

Abasaza b’i Rwamagana bemeza ko intego bafite ari ugukomeza gushyigikira ibyagezweho kandi ngo ibyo bazabigeraho ari uko batoye neza, batoye uwabagejeje aho bageze ubu kuko ngo abereka icyerekezo kizima.

HAKIZIMANA YUSSUF

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE