2017-09-22 08:28:25 clouds 27o High | Kigali Rwanda

Dukurikire:
 
 

Inteko rusange ya Rayon Sports izafata icyemezo kuri komite ya Gacinya

Yanditswe na IMVAHO NSHYA

Kuya 2017-07-24 09:25:13

 
Share on:
 
Yasuwe:1107
 
Yavuzweho:200
 
10
 
10

Nyuma y’ibibazo bimaze iminsi bivugwa muri Rayon Sports, abayobozi b’umuryango baravuga ko inama y’inteko y’umuryango wa Rayon Sports izafata icyemezo ku kwirukana cyangwa gusesa komite y’ikipe y’umupira w’amaguru (Rayon Sports FC) ikanavugurura izindi nzego.

Ibi byatangiye gututumba mu mpera z’icyumweru gishize ubwo Gacinya, Perezida wa Rayon Sports yatangazaga ko Karekezi Olivier agizwe umutoza mukuru wa Rayon Sports asimbuye Masoudi Djuma weguye.

Nyuma y’iminsi ibiri, ubuyobozi bwa komite nyobozi n’ubw’akanama k’ubuyobozi bw’umuryango, binyuze kuri Ngarambe Charles uhagarariye umuryango mu mategeko busohora ibaruwa bushingiye kuri Sitati y’umuryango bushimangira ko komite nyobozi ari yo yonyine yemerewe gushyiraho abakozi, ari nayo mpamvu umwanya w’umutoza wari wahawe Karekezi usubiye ku isoko.

Komite nyobozi n’urwego rw’ubutegetsi by’umuryango byaje gute? Bimaze iki?

JPEG - 344 kb
Perezida w’umuryango wa Rayon Sports, Ngarambe Charles

Ishingiro ryo gushyiraho izi nzego nshya yatangiye muri 2013 ubwo Rayon Sports yatangiraga urugendo rwo gushaka ubuzima gatozi mu kigo cy’imiyoborere.

Umunyamabanga mukuru w’umuryango, Musabende Ange Claudine avuga ko izi nzego zajeho kugira ngo umuryango waguke kandi ukore ibintu binyuze mu mucyo.

Sitati ya Rayon Sports ku mutwe wa 3 ingingo ya 8 isobanura ko inzego z’umuryango ari inteko rusange, inama y’ubuyobozi (urwego rufata ibyemezo), Komite nyobozi, akanama k’ubugenzuzi bw’umutungo n’itsinda ry’abafana.

Ingingo ya 19 yerekana ko urwego rw’ubuyobozi rutanga icyerekezo cy’ibikorwa, kwemeza no gukurikirana ingengo y’imari naho komite nyobozi igashyira mu bikorwa ibyifuzo n’ibyemezo by’inama y’ubuyobozi.

Musabende yabwiye Imvaho Nshya ko ibi byakorwa hari hasanzwe komite icunga ikipe biba ngombwa ko idahita isenywa.

Ati ’’Sitati ijyaho Rayon Sports yari ikiyobowe nk’uko byakozwe kuva kera, icyabaye ikibazo ni uko abantu bari bayoboye ikipe y’umupira batahise bibonamo. Twe twarabwiye tuti singombwa ko duhita tubisenya ahubwo twaravuze tuti nibagumeho ariko bajye bakorana n’izindi nzego’’.

Yungamo ati ’’Hari hakiri ikibazo cy’ubukene hakomeza kubaho abantu bakomeza gukora bitanga. Twaravuze tuti reka bakurikirane ikipe ariko ikintu cyose cyatuma umuryango ujya mu rubanza kijye gikowa abantu babanje kubyumvikanaho’’.

Abamenyereye gukorera mu bwiru ntibabyakiriye neza

Uyu munyamabanga avuga ko iki cyemezo kitakiriwe neza n’abari bamenyereye gukora nta muntu baha za raporo.

Ati “Hariho ubuyobozi bukora ntawububaza uko bimeze. Na nyuma yo kubyumvikana gutyo twabonaga FC itarabyiyumvagamo yo igashaka ko ari yo yonyine ikora, twababaza bakavuga ngo ntibizongera, ejo ukumva ngo bakoze ibindi, ukumva umuntu aje kuturega. Tukababwira tuti ibyo mwakora byose mujye mutubwira, kuko tutari kubyanga iyo biba ari byiza’’.

Iki kibazo cy’imikoranire kikaba cyaratangiranye n’amadeni yafashwe na komite y’ikipe, hakaniyongeraho n’uburyo bagurishije abakinnyi Ismaila Diarra na Kasirye Davis muri DCMP i Congo batamenyesheje ubuyobozi n’iki cya Karekezi Olivier. Byanatumye konti y’ikipe ifungwa amafaranga akajya aca kuri konti y’umuryango.

Ngarambe Charles uhagarariye inama y’ubutegetsi yabwiye Imvaho Nshya ko ubundi iki kitakabaye ikibazo kuko izi nzego zubatse nk’uko komite nyobozi na njyanama z’uturere zikorana.

Gakwaya Olivier, umunyabanga mukuru wa Rayon Sports FC yabwiye Imvaho Nshya ko bo bagiye baha raporo umuryango ahubwo bakawushinja gushaka kwivanga mu kazi katabareba.

Ati “Komite yacu n’iy’umuryango zose zatowe n’inteko rusange, twebwe icyo tugomba gukora ni ukubaha raporo ikindi baba bagomba gusinyaho ariko ntibinjira mu kazi ka tekinike nko gushaka abakinnyi. Niba tutafata icyemezo ku mukinnyi cyangwa ku mutoza ntacyo twaba tumaze. Aho ni ho tutajya twumvikana na bo. Tukumva hashyirwaho aho umuryango utangirira n’aho ugarukira n’aho komite ya FC itangirira n’aho irangirira’’.

Musabende umunyamabaga w’umuryango agashinja komite y’ikipe gukora ibintu mu bwiru kandi izi ko byagira ingaruka ku muryango.

Ati ’’Ikibazo cyabo ni uko bo bashaka gukomeza gukora ibintu mu bwiru. Kandi amafaranga abafana batanga tuba tugomba kumenya ngo yagiye aha n’aha. Kuri karekezi iyo byatangiriye ntituhazi bo gusa kuva bari bazi ko umukono ukenewe, baratubwiye ngo muze musinye, tukababaza tuti kontaro iri he? Bo bajya kuri radiyo bo bakoze kontaro bagendeye kuki”.

Rayon Sports FC yigeze gutekereza gushaka ubuzima gatozi igatandukana n’umuryango

Umunyamabanga mukuru w’umuryango yanahishuye ko abo muri komite y’ikipe bigeze gushaka kwaka ubuzima gatozi bitwaje ko CAF itabemerera gukina, uyu mugambi uza gupfuba.

Musabende ati ’’Bariya bantu ni abantu bashaka gukora ntawe ubabaza ngo mwakoze iki? Mwabikoze gute? mubitwereke? Kugira ngo bashake uburyo bwo kubigeraho, bahinduye uburyo baca inyuma bajya gushaka ubuzima gatozi bwa FC yonyine kugira ngo hadasigara hari ubabaza ngo muri FC bimeze gute? Baragiye bahimba ibintu baraza bati ntabwo CAF izemera ko dukina ariya marushanwa FC idafite ubuzima gatozi. Tuti se mwumva FC itabufite? Bati oya biriya ni iby’umuryango. Tuti se andi makipe yo si ko bimeze ku yo hanze. Twarabishwaniye, twandikira FERWAFA turabibasobanurira. Ko batabushatse se amarushanwa twabuze kuyakina?’’.

Inteko rusange ni yo izaca urubanza kuri komite ya Gacinya

Manda ya komite ya Rayon Sports FC izarangira muri Kanama 2017 iy’inama y’ubutegetsi y’umuryango nayo imaze igihe irangiye naho iya komite nyobozi y’umuryango izarangira muri Mata 2018.

Umunyamabanga mukuru w’umuryango agaragaza ko inama y’inteko rusange igomba guterana mu mpera za Kanama 2017 izasuzuma niba hakwiye gushyirwaho komite nshya y’umuryango ikaba yanasesa iya Rayon Sports FC.

Musabende ati “FC ntiba muri Sitati, twumvikanye ko hazabaho inzego ebyiri. Niyo abo bo muri FC bazamuka bakajya mu buyobozi nta kibazo ha handi iyo komite yari iri hajye umu Manager ubihemberwa anafashwe kubigeraho”.

Yungamo ati ’’Buriya tuzahamagara inteko rusange tuganire neza turebe uko izo nzego ebyiri zizajyaho, nibashaka bazavuga bati tuzatora komite nshya, nta kibazo. Nibabishaka bazavuga bati mureke iriya nayo irangize manda’’.

Ku rundi ruhande abakinnyi bo baguzwe byakozwe na komisiyo yo kugura abakinnyi ariko bisinywaho n’uhagarariye umuryango mu mategeko.

BIZIMANA ERIC

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE