2017-10-16 07:05:01 clouds 27o High | Kigali Rwanda

Dukurikire:
 
 

Ngoma:Kwamamaza Paul Kagame byahujwe no kumurika iterambere yabagejejeho

Yanditswe na IMVAHO NSHYA

Kuya 2017-07-22 11:44:09

 
Share on:
 
Yasuwe:279
 
Yavuzweho:200
 
10
 
10

Abanyamuryango ba FPR-Inkotanyi mu murenge wa Kibungo mu karere ka Ngoma bamuritse ibikorwa by’iterambere bamaze kugeraho babikesha imiyoborere myiza, irangajwe imbere na Nyakubahwa Paul Kagame.

Ibikorwa byamuritswe ni ibikomoka ku buhinzi n’ubworozi birimo ibitoki, amashu, betarave n’amata ndetse n’ibikorwa by’ubukorikori n’ikoranabuhanga bikorwa n’abanyamuryango ba FPR-Inkotanyi mu murenge wa Kibungo, mu karere ka Ngoma.

Ibi babigaragarije mu gikorwa cyo kwamamaza umukandida watanzwe n’umuryango FPR-Inkotanyi, Paul Kagame, n’amashyaka amushyigikiye, cyabaye ku rwego rw’umurenge wa Kibungo, kuri sitade ya Cyasemakamba.

Abanyamuryango ba FPR-Inkotanyi mu murenge wa Kibungo bari benshi bitabiriye iki gikorwa, basubiragamo kenshi indirimbo zivuga ibikorwa umuryango wa FPR-Inkotanyi wagejeje ku banyarwanda.

JPEG - 316.9 kb
Abanyamuryango ba FPR Inkotanyi bamuritse ibyagezweho mu buhinzi n’ubworozi, ikoranabuhanga, imyuga n’ubukorikori ( Foto Manishimwe N)

Bari bafite kandi ibirango by’umuryango FPR-Inkotanyi, n’imyambaro n’amafoto byamamaza umukandida Perezida, Paul Kagame.

Basubiragamo kenshi ko nta wundi bifuza ko yabayobora, uretse uwo babonamo ubushobozi Paul Kagame, bakagaragaza ko biteguye kumutora 100%, ku itariki 4 Kanama 2017.

Uwineza Bonifirida wo mu kagari ka Gahima ni umugore wishimira iterambere agezeho mu myaka 7 ya manda ya Perezida Kagame, yatangiye mu mwaka wa 2010. Agaragaza ko yavuye ku gucuruza agataro, ubuyobozi bwiza bukamutoza gukorana n’ibigo by’imari, ubu akaba ageze aheza.

Ati “Ibyo ngezeho byose mbikesha imiyoborere myiza ya Perezida Paul Kagame. Mu myaka yashize najyaga gukinguza abantu ibipangu nshuruza inyanya nirirwa nikoreye agataro. Ariko ubu mu myaka 7 ishize, kubera imiyoborere myiza, nayobotse ibigo by’imari banguriza amafaranga.

Ubu njye n’umugabo wanjye dufite moto 6 mu muhanda, zitwinjiriza amafaranga. Abagore twahawe agaciro, tuzamutora 100%, kuko arasobanutse kandi arashoboye.”

Habimana Jean Damascène na we yagize ati “Iterambere dufite turikesha Paul Kagame, ubu umutekano dufite ni we tuwukesha. Yaduhaye inka turanywa amata, abana bacu bariga ku buntu, baraduhugura tugahinga tukeza… tuzamutora kandi ni twe twabimusabye.”

Mu kwamamaza umukandida Perezida, Paul Kagame w’umuryango FPR Inkotanyi, mu murenge wa Kibungo, abanyamuryango bagaragaje iterambere umukandida wabo yabagejejeho muri manda y’imyaka 7 amaze ayobora u Rwanda n’abanyarwanda.

Muri byo harimo: ibitoki bihingwa muri uyu murenge, imashini zuhira imyaka mu gihe cy’izuba, amata y’inka borojwe muri gahunda ya Girinka munyarwanda, ikoranabuhanga rya mudasobwa zahawe abanyeshuri biga mu mashuri abanza, ayisumbuye n’amakuru yo mu murenge wa Kibungo.

Hamuritswe kandi imyuga yo gukora inkweto, ubudozi no kuboha imipira; byose abanyamurayngo ba FPR-Inkotanyi bishimira ko byabateje imbere mu myaka 7 ya manda ya Perezida Kagame, batanze ngo yongere kuyobora u Rwanda mu myaka iri imbere, iterambere ryabo bikomeze rijye imbere.

Kirenga Providence, wari uhagarariye umukandida w’umuryango FPR-Inkotanyi muri iki gikorwa, yasabye ibihumbi by’abanyamuryango ba FPR-Inkotanyi bo mu murenge wa Kibungo kuzatora neza, bagashyigikira umukandida wabo Paul Kagame, kugira ngo ibyo yabagejejeho bidasubira inyuma, ahubwo bizikube inshuro nyinshi.

Abatuye umurenge wa Kibungo kandi batangaza ko biteguye kwakira n’urugwiro rwinshi umukandida Perezida, Paul Kagame, biteganyijwe ko azaza kwiyamamariza mu karere ka Ngoma, ku cyumweru tariki ya 23 Nyakanga 2017.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE