2017-11-17 14:59:33 clouds 27o High | Kigali Rwanda

Dukurikire:
 
 

Abanyafurika nitwumve ko ntacyo tuzageraho tutakirwaniriye –Perezida Kagame

Yanditswe na IMVAHO NSHYA

Kuya 2017-07-21 14:52:50

 
Share on:
 
Yasuwe:299
 
Yavuzweho:200
 
10
 
10

Perezida Paul Kagame yabwiye urubyiruko rwa Afurika ko ari rwo rufunguzo rw’iterambere ry’uyu mugabane, arusaba kwirinda ubunebwe kuko nta na kimwe rushobora kugeraho rutagiharaniye.

Mu ijambo yagejeje ku bitabiriye inama ya Youth Connect Afurika kuri uyu wa 21 Nyakanga 2017, yasobanuye ko akazi k’urubyiruko rwa Afurika gashingiye ku gusigasira ibyo abakuru bagezeho no gukora cyane kugira ngo babyongere.

Yagize ati “Buri gihugu muri Afurika gifite ibyo cyagezeho ariko kubisigasira ntibyoroshye, ibyo ni mwe bireba rubyiruko. Akazi kanyu gatangiriye mu kutwibutsa ko ibyo twagezeho bituruhije bidahagije. “

JPEG - 124.3 kb
Perezida Kagame (hagati), umuherwe Jack Ma (iburyo) n’umuyobozi wa UNCTAD, Mukhisa Kituyi mu nama ya Youth Connect Africa

Umukuru w’igihugu yavuze ko Abanyafurika bazarushaho kugira ingufu nibakorana, hagati yabo, bakavanaho imbogamizi ziri mu guhahirana no kwishyira hamwe mu miryango y’uturere.

Yakomeje ati “ Ibyo dushakira umugabane nk’Abanyafurika tuzabirwanirira, ingufu za Afurika zizaturuka mu gukora no kwiyemeza kwacu. Urubyiruko rwa Afurika rukwiye gukomeza kurushaho kuba Abanyafurika ba nyabo. Ni mwe hazaza hacu binyuze mu ikoranabuhanga, kandi ikiruse byose muri agaciro kacu. “

Perezida Kagame yabajijwe icyo abona cyakorwa kugira ngo ubukungu bw’umugabane wa Afurika wiyongere, avuga ko icya mbere ari uko ibihugu byawo bitaragira ubushake bwa politiki bwo gukorana.

Ati “Hari n’ikibazo cyo kwishyira hamwe kwa Afurika, ni gute twaba twarananiwe koroherana ubwacu ngo tubuze abantu kujya ahandi. Kuri ubu ntibyoroshye no gucuruza cyangwa gushora imari mu bihugu bindi bya Afurika. Dukwiye kwigishanya, dukwiye korohereza urujya n’uruza rw’ibintu, tugomba gutangira dukosora ayo makosa yose kandi ni inshingano zirebana na politiki.”

“Nitubikemura hazakurikiraho guhanga imirimo, kuko nk’ubu urebye ubucuruzi buracyari hasi cyane hagati y’Abanyafurika. Ibyo byose bikwiye gukemuka kugira ngo tubona ubushora imari hagati yacu.”

Umuherwe w’Umushinwa, Jack Ma yavuze ko agiye gushora imari mu kuzamura urubyiruko rwa Afurika binyuze muri gahunda yo kubigisha no kubatera inkunga.

Yagize ati “Twemeye ko abarwiyemezamirimo bakiri bato 250 bazaza kwiga ishoramari, no gukorera ubucuruzi kuri internet, ubwenge bukorano, n’irindi koranabuhanga.

Ikigo cye Alibaba Group nacyo ngo kigiye gutangiza gahunda yo guhemba Abanyafurika babungabunga ibidukikije, aho buri mwaka azajya ahemba abantu 50.

Jack Ma, umuherwe wa 14 ukize ku Isi yongeyeho ko ashyizeho n’ikigega kizafasha abashoramari bakiri bato bo ku mugabane wa Afurika binyuze mu muryango we Jack Ma Foundation.

Inama ya Youth Connect yari imaze iminsi ibiri ibera Kigali, yigiwemo ibibazo bitandukanye byugarije urubyiruko rwa Afurika, inashakirwamo ibisubizo byo kuruha amahirwe ngo rutere imbere.

HERVE UGIRUMUKUNDA

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE