2017-12-11 14:03:29 clouds 27o High | Kigali Rwanda

Dukurikire:
 
 

Miss Kalimpinya agiye gutangiza amatsinda yigisha ubuzima bw’imyororokere

Yanditswe na IMVAHO NSHYA

Kuya 2017-07-21 06:42:36

 
Share on:
 
Yasuwe:835
 
Yavuzweho:200
 
10
 
10

Kalimpinya Queen, igisonga cya gatatu cya Nyampinga w’u Rwanda 2017, utuye mu Karere ka Nyarugenge, mu murenge wa Gitega, aratangaza ko yatangiye gushyira mu bikorwa umushinga we wo kugabanya impfu z’ababyeyi bapfa babyara n’abana bapfa bavuka.

Uyu mushinga yawutangaje ubwo yahataniraga ikamba rya Nyampinga w’u Rwanda 2017.

Yatangiriye ku bukangurambaga burebana n’uyu mushinga mu Karere avukamo ka Gisagara. Muri Kanama 2017 yiteguye gutangiza n’amatsinda (Clubs) mu bigo by’amashuri yisumbuye yiga akanigisha ubuzima bw’imyororokere.

Asobanura ko abari mu matsinda bazajya biga ubuzima bw’imyororokere babifashijwemo n’inzobere, basure ibitaro barebe uko ababyeyi babayeho, bakore n’ibindi bikorwa bibafasha kugira ubumenyi buhagije, nibamara kubisobanukirwa na bo bajye basangiza ubumenyi abandi bana bagenzi babo; batange ubutumwa binyuze mu dukino, n’ibindi.

JPEG - 235.4 kb
Miss Kalimpinya agiye gutangiza amatsinda yigisha ubuzima bw’imyororokere

Mu kiganiro n’Imvaho Nshya Miss Kalimpinya yagize ati: “umushinga wanjye ni uwo kugabanya imfu z’ababyeyi bapfa babyara n’abana bapfa bavuka, kuzigabanya bikaba bishingira ku kugira ubumenyi ku buzima bw’imyororokere, butuma abana b’abakobwa birinda inda zitateguwe, kuko umwana utewe inda akiri muto iba ishobora no kumuhitana.”

Afite intego y’uko n’urubyiruko ruri mu kigero cye rugira imyumvire iri hejuru ku bijyanye n’ubuzima bw’imyororokere, kuko ahanini usanga badakunda kubiganirizwaho mu miryango, akaba abona ari na yo ntandaro y’inda zitateganyijwe zirimo guterwa abangavu. Akaba afite icyizere ko uyu mushinga we uzagira uruhare rugaragara mu gukemura icyo kibazo.

Atanga ubutumwa ku bandi bakobwa abashishikariza kwigirira icyizere, bagakora cyane bagamije kwiteza imbere kuko byabarinda kugwa mu bishuko, bibashora mu ngeso mbi ari na ho usanga bamwe batwara inda zitateganyijwe.

Ati “ hamaze iminsi havugwa ko abakobwa bagera ku bihumbi 16 batwaye inda zitateganyijwe …. Niba tuvuga ngo dushukwa n’abagabo, badushukisha amafaranga, numva ko wiyizeye, ukumva ko ayo mafaranga barimo kugushukisha ushobora kuyabona wowe ubwawe, ntabwo wagwa muri ibyo bishuko. Twiyizere, dutekereze imbere heza hacu, dufite Igihugu cyiza, dufite ababyeyi beza batureberera, twibakoza isoni.”

Miss Kalimpinya akomeza ashishikariza abakobwa gukora bashyizeho umwete. Ati “niba uri umucuruzi kora akazi neza, utange serivisi nziza, niba uri umunyeshuri iga neza, ukore icyakujyanye mu ishuri. Ikintu cyose ukora gikunde, ugikore neza ni bwo kizakubyarira umusaruro.”

Yongeraho ko gukora cyane bigomba kugendana no kugira imyitwarire myiza, kugira ikinyabupfura, kuko ukora cyane ntagaragaze imyitwarire iboneye nta cyo yageraho.

Uretse ibijyanye n’uyu mushinga arimo gukurikirana, afite intego yo gukomeza amashuri kugira ngo arusheho kwiyungura ubumenyi no gukomeza gutanga umusanzu mu kubaka umuryango nyarwanda.

Tumukunde Georgine

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE