2017-10-18 18:43:44 clouds 27o High | Kigali Rwanda

Dukurikire:
 
 

Abatuye i Gikondo baravuga ko icyizere bafitiye Kagame bakigaragarije muri referandumu

Yanditswe na IMVAHO NSHYA

Kuya 2017-07-16 14:06:00

 
Share on:
 
Yasuwe:16
 
Yavuzweho:200
 
10
 
10

Abatuye i Gikondo ho mu karere ka Kicukiro baravuga ko aribo ubwabo bafashe iya mbere mu gusaba ko ingingo ya 101 iri mu Itegeko Nshinga ivugururwa, birakorwa ariyo mpamvu ngo basigaje kubisoza batora umukandida wa FPR Inkotanyi Paul Kagame ku matora y’umukuru w’Igihugu ateganyijwe ku itariki ya 4 Kanama 2017.

Nsengimana Théophile, umuturage muri Gikondo avuga ko ari rwiyemezamirimo ubikesha Paul Kagame bakigaragarije muri referandumu ndetse baniteguye kumutora 100%.

Yagarutse ku buhamya bukomeye bw’ukuntu yashimutiwe muri Kongo, agakorerwa iyicarubozo ariko Paul Kagame akamugarura mu Rwanda.

Yagize ati “Mu mwaka wa 2007 nagiye mu gihugu cy’abaturanyi cya Kongo, mu mujyi wa Goma ngiye kurangura, ngezeyo nshimutwa n’igisirikare cya Kongo banyita umusirikare mukuru w’u Rwanda.

JPEG - 320.8 kb
Abatuye i Gikondo baravuga ko biteguye kuzatora Kagame 100%

“Bahise bamfungira mu kigo cy’iperereza kitwa Tede, ndaramo umunsi umwe, bukeye banyambika imyenda ya gisirikare imwe twitaga ‘Mukotanyi’ ibamo uturongo tumanutse, barangije bahamagara itangazamakuru rya Kongo, bati muze murebe lieutenant w’u Rwanda twafashe.

“ Iryo tangazamakuru ryaraje ariko ntiryigera rituma nisobanura uburyo nafashwe, bo ubwabo nibo basobanuraga ibyo bashatse, bukeye bwaho banyurije indenge, banjyana ntazi ahantu banjyanye bangeza i Kinshasa banyuriza imodoka ya gisirikare banjyana aho bita état major géneral ya Kongo Kinshasa, bansomera ibyaha bandega, bemeza ko ndi umusirikare mukuru mu Rwanda, bahita banjyana muri gereza nkuru ya Kongo. Aha haba ubuzima bubi cyane, aho urya ikiyiko kimwe k’impungure mu minsi itatu, ni ubuzima bubi nabayemo mu myaka 2 umuryango wanjye utazi ahantu ndi.”

Yakomeje agira ati “ Umunsi umwe ngiye kumva numva barampamagaye bati hari umuntu ugushaka mu buyobozi bwa gereza, ngezeyo nahasanze umugabo, ansuhuza mu Kinyarwanda, ndikanga. Arambwira ati njyewe ndi umuntu uburanira abandi utagira umupaka, noherejwe na Presidence y’u Rwanda.”

“ Namaze kumva ayo magambo, ndaturika ndarira, ariko amarira y’ibyishimo, amarira akamye ndiyumvira mu mutima wanjye nti koko umubyeyi Paul Kagame niwe umpaye agaciro kangana gutya, ubwo ntangira kumubwira ubuzima bwanjye ukuntu nafashwe nshimuswe ambwira ko aje gukurikirana iby’idosiye yanjye mubwira ko hari n’abandi banyarwanda bashimuswe. Twese twari 33 amaze kubabona yatangiye gukurikirana dosiye zacu.”

Akomeza avuga ko hashize nk’ukwezi kumwe hakaza imiryango mpuzamahanga irimo HCR, droit de l’homme na croix rouge. Guhera uwo munsi ngo ntibongeye gukorerwa iyica rubozo.

Ati “ Hashize nk’amezi atatu tubona wa mugabo aragarutse atubwira ko yoherejwe na Presidence y’u Rwanda kuduhumuriza, ko ntacyo tukibaye. Imvugo niyo ngiro, Leta ya Kongo yarabyemeye isinya icyo bita Amnesty conditionnel bemeza ko dufungurwa ariko mu gufungurwa tubura indege iducyura tumara hafi ukwezi ariko tubona ingabo z’umuryango w’abibumbye ziraje zivuga ko zoherejwe n’u Rwanda kuducyura. Navuyeyo mbwiye Abakongoman nti wabyemera utabyemera Paul Kagame aruta abayobozi benshi. Ngeze ku butaka bw’u Rwanda numvaga meze nk’urota. Kagame wacu ni Mose bavuga muri Bibiriya, umwe warokoye ubwoko b’Abisirayeri kuko niwe wangejeje muri iki gihugu cy’u Rwanda.”

Akomeza avuga ko ageze mu Rwanda yahawe ubufasha bw’ibanze akaba akomeje urugamba rwo kwiteza imbere, atangira kurangura ibiribwa Nyabugogo, akorana n’ibimina, agurizwa ibihumbi magana 500, ayishyura neza.

Kuri ubu yaguze ikibanza cya miliyoni n’igice mu mujyi wa Rubavu , butike ye yabyaye indi yakabiri. Ayo ibimina byamuhaye ngo ayashyira kuri konti ye kandi uko aranguye yizigama ibihumbi 50,000.

Ubu amaze kuzuza inzu y’akataraboka mu mujyi wa Gisenyi , inzu nziza y’amatafari ahiye ifite igisenge kijyanye n’icyerecyezo cy’igihugu, izitiwe n’amatafari ahiye, afite gahunda yo kuyishyiramo amakaro meza agezweho. Ngo ni inzu ihagaze mu gaciro ka miliyoni 25,000 z’amafaranga y’u Rwanda.

Uretse ibi, ngo yavuguruye urutoki rwa hegitari 2 aho yeza igitoki kirenze ibiro 100, akora ubworozi. Byose abishimira imiyoborere myiza irangajwe imbere na Nyakubahwa Paul Kagame.

Ni muri urwo rwego ararikira Abanyagikondo ndetse n’Abanyarwanda bose kuzatora Paul Kagame bashyira igikumwe cyabo imbere y’igipfunsi kugira ngo bakomeze bibere mu Rwanda bifuza.

MUKAGAHIZI ROSE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE