2017-09-22 08:28:25 clouds 27o High | Kigali Rwanda

Dukurikire:
 
 

Umuryango Kanyarwanda umaze imyaka 25 urwanya akarengane

Yanditswe na IMVAHO NSHYA

Kuya 2017-07-17 07:00:00

 
Share on:
 
Yasuwe:31
 
Yavuzweho:200
 
10
 
10

Umuryango utari uwa Leta KANYARWANDA washinzwe mu mwaka wa 1991, igihe hariho umwuka mubi n’ubutegetsi bubi ari nabyo byaje kubyara Jenoside yakorewe Abatutsi mu mwaka wa 1994, ituma umuryango utakaza abanyamuryango benshi kuko bari 186 hagasigara gusa 36.

Ugamije guharanira no guteza imbere uburenganzira bwa muntu, guharanira uburinganire bw’Abanyarwanda imbere y’amategeko, kugira uruhare mu ishingwa n’iterambere ry’ibicumbi by’ubusabane kubijyanye n’uburenganzira bwa muntu, kurwanya akarengane ako ariko kose, kugira umubano n’ubutwererane n’indi miryango yo mu gihugu n’iyo hanze bihuje intego.

JPEG - 267.4 kb
Abanyamuryangio ba Kanyarwanda bafashe ifoto y’urwibutso

Ubwo kuri iki cyumweru hizihizwaga isabukuru y’imyaka 25 uyu muryango umaze ushinzwe Nzamwita Jean Marie Vianney, umuyobozi w’inama y’ubutegetsi ya Kanyarwanda yavuze ko uyu muryango muri Jenoside watakaje abanyamuryango benshi. Icyakora, nyuma yayo, abayirokotse bagerageje kwiyegeranya bagerageza gukomeza ibikorwa bari batangiye.

Yagize ati “ Nyuma ya Jenoside Kanyarwanda yifashishije imiryango itandukanye itanga inkunga, itangira kuvuza abantu bahuye n’ibikomere ku mubiri no kumutima mu buryo butandukanye irabafasha, irihira abana batandukanye b’imfubyi amashuri. Inyigisho zagiye zitangwa zagiye zigira uruhare rukomeye mu gusana umuryango nyarwanda.”

Akomeza agira ati “ Ku bw’imyubakire myiza y’igihugu cyacu twagize amahirwe yo gusana imitima.”

Mu gihe uyu muryango wizihiza yubile y’imyaka 25 umaze ushinzwe, ubuyobozi bw’umuryango burashimira byimazeyo abagize igitekerezo cyo gushinga uyu muryango, abanyamurango bawinjiyemo, abafatanyabikorwa ndetse n’inzego bwite za Leta uruhare bagize mu gushyira mu bikorwa intego umuryango wiyemeje.

Muri iyi myaka 25 Kanyarwanda yakoze ibikorwa bitandukanye cyane irihira amafaranga y’ishuri abana b’imfubyi, abana bavutse ku bagore n’abakobwa bafashwe ku ngufu muri Jenoside yakorewe Abatutsi mu 1994, kuvuza no gutanga ubujyanama mu by’ihungabana ku bagizweho ingaruka na Jenoside yakorewe Abatutsi mu 1994.

Umuryango Kanyarwanda wongereye ubushobozi abagenerwabikorwa mu buryo bwo gukora no gucunga imishinga iciriritse kandi bakaba barashoboye kwiteza imbere.

Mu rwego rwo guteza imbere no guharanira uburenganzira bwa muntu, Kanyarwanda yagize uruhare mu gushinga impuzamiryango iharanira uburenganzira bwa muntu mu Rwanda CLADHO n’impuzamiryango iharanira uburenganzira bwa muntu mu karere k’ibiyaga bigari (LDGL),ibi byakozwe bigamije guhuza imbaraga, guteza imbere no kurengera uburenganzira bwa muntu.

Kanyarwanda yagize uruhare mu kwigisha Abanyarwanda uburenganzira bwabo, nko kugira uruhare mu itegurwa ry’ingengo y’imari n’uburyo ishyirwa mu bikorwa.

JPEG - 199.5 kb
Bamwe mu bayobozi ba Kanyarwanda

Kuva uyu muryango washingwa, wagize uruhare mu bikorwa byo kurwanya ihohotera ry’uburenganzira bwa muntu ryagiye rikorwa mu Rwanda ifatanije n’indi miryango irengera kandi iharanira uburenganzira bwa muntu no gukora ubuvugizi.

Kuva uyu muryango ubayeho kugeza ubu, uharanira amahoro n’uburenganzira bwa muntu mu Rwanda. Ni muri urwo rwego Kanyarwanda yagiye igira uruhare mu kwigisha uburenganzira bwa muntu mu bigo by’amashuri yisumbuye cyane cyane mu ntara y’amajyepfo.

Uyu muryango wagize uruhare rukomeye mu gufasha imfubyi za Jenoside yakorewe abatutsi mu 1994 ubaha ibikoresho n’amafaranga y’ishuri, yagize uruhare rufatika mu bujyanama mu by’ihungabana n’ubufasha mu mishinga iciriritse irimo iy’ubuhinzi, ubworozi bw’amatungo magufi, kubitsa no kugurizanya ku bagore n’abakobwa bafashwe ku ngufu muri jenoside.

Abagenerwabikorwa baravuga ko KANYARWANDA yabakuye mu bwihebe

Umwe mu bagenerwabikorwa Alina Kayirangwa yashimye Imana ibagejeje kuri uyu munsi nyuma y’inzira y’umusaraba n’ibibazo by’indengakamere byamubayeho mu gihe cya Jenoside ubwo yari akiri muto afite imyaka 14. Avuga ko uyu muryango wamubaye hafi, umugarurira icyizere n’ubumuntu mu gihe yumvaga ko kubaho bidashoboka kubera ibintu byamubayeho.

Kanyarwanda yashyize imbere ibikorwa byo kwigira

Kanyarwanda yaterwaga inkunga n’imiryango mpuzamahanga iza guhagarara ariko nayo yashatse uburyo yakwishakamo kwigira ikora ibikorwa bitandukanye.

Nubwo hari ibyiza byinshi Kanyarwanda ihura n’imbogamizi zo kuba imishinga myinshi yaterwaga inkunga n’imiryango y’amahanga ikaza guhagarara. Byagize ingaruka ku bagenerwabikorwa no kuri Kanyarwanda ubwayo biba ngombwa ko abakozi bamwe bahagarikwa.

Hari kandi kudohoka kw’abanyamuryango ba Kanyarwanda mu kwitabira ibikorwa no gutanga inama.

Kuva iyo miryango yahagarara, hari abagenerwabikorwa bigaragara ko bari bagikeneye ubufasha.

Niyo mpamvu ubuyobozi bwa Kanyarwanda busaba Komisiyo y’Uburenganzira bwa muntu imikoranire ya hafi bityo, abo ngabo bagikeneye ubufasha ikababa hafi ndetse ikababa hafi mu ishyirwa mu bikorwa by’imishinga Kanyarwanda yiyemeje.

Nzamwita ati “Kanyarwanda iri mu miryango itandukanye ishobora kugira icyo yakora kandi ikagisoza neza kuko ifite imbaraga zo kuba hari imishinga imwe n’imwe yashyira mu bikorwa. Ndasaba Komisiyo y’Igihugu y’uburenganzira bwa muntu ko hari imishinga imwe n’imwe twafatanya, tukagirana ubufatanye bwa hafi, ntitubarirwe mu miryango iri aho ngaho ahubwo tukabafasha gushyira mu bikorwa imishinga bafite itandukanye.

Turasaba kandi ko na Leta yatuzirikana, ikazirikana imiryango tubara nka sosiyete civile. Hari ingengo y’imari ivugwa ko ishobora kujya mu miryango itandukanye ariko ugasanga nta mbaraga zijyamo, turashaka ko hajyamo imbaraga iyo miryango igahabwa amafaranga kugira ngo ibashe kugira ibikorwa bifatika ikora.”

JPEG - 220.4 kb
Mu kwizihiza ubusabane, umushyitsi mukuru Niwerukundo Claude yatase umutsima

Kuri ibi byifuzo, Niwerukundo Claude, wari uhagarariye Komisiyo y’igihugu y’uburenganzira bwa muntu, akuriye ishami rishinzwe ubufatanye na Komisiyo n’indi miryango yashimye ibikorwa bya Kanyarwanda bijyanye no guteza imbere uburenganzira bwa muntu, avuga ko bayifata nk’umufatanyabikorwa wizewe ufite icyerecyezo.

Yagize ati “Kanyarwanda igaragaza ibikorwa. Turabizi neza ko ubu ibihe bitoroheye imiryango itari iya Leta kuko imyinshi ijyana n’ubukungu bw’isi ndetse na politiki mpuzamahanga ugasanga iyo rero ibihugu bitera inkunga bitangiye kugabanya inkunga byahaga igihugu ariko tubashimiye ko mugikora. Nkaba ngira ngo mbashimire mu izina rya komisiyo ibikorwa mufite kandi ubufatanye bujyanye na komisiyo nta kabuza buzakomera.”

Yashimiye uyu muryango uburyo bafatanyije ibikorwa byo kwigisha abantu bijyanye no gukangurira abantu uburenganzira bwa muntu mu matora.

Kanyarwanda izakomeza icyerecyezo yatangiranye cyo guteza imbere no kurengera uburenganzira bwa muntu no gukora ibikorwa bifasha abagenerwabikorwa b’umuryango ibaha ubufasha ikanabakorera ubuvugizi.

MUKAGAHIZI ROSE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE