2017-09-22 08:28:25 clouds 27o High | Kigali Rwanda

Dukurikire:
 
 

Rubavu:Abatuye Kanyirabigogo barishimira iterambere bakesha imiyoborere myiza

Yanditswe na IMVAHO NSHYA

Kuya 2017-07-18 07:05:55

 
Share on:
 
Yasuwe:53
 
Yavuzweho:200
 
10
 
10

Abatuye mu Kagari ka Kanyirabigogo mu murenge wa Kanzenze mu Karere ka Rubavu, barashimira Leta y’u Rwanda yabashyiriyeho gahunda zibafasha kwikura mu bukene, ubu imibereho yabo ikaba yarahindutse ku buryo bugaragara.

Aba baturage bashima gahunda zitandukanye zashyizweho hagamijwe gukura abaturage mu bukene, zirimo korozwa binyuze muri gahunda ya Girinka, kwibumbira mu matsinda yo kuzigama ndetse no kuba bakomeje kwegerezwa ibikorwaremezo birimo imihanda, umuriro w’amashanyarazi n’amazi meza.

Kimwe n’abandi baturage, abatuye mu kagari ka Kanyirabigogo bavuga ko ibikorwa by’iterambere bigaragarira buri wese bamaze kugeraho babikesha imiyoborere myiza yabatoje gukunda umurimo, byose bishingiye ku bumwe n’ubwiyunge.

JPEG - 155 kb
Barashimira Perezida Kagame wagaruye umutekano usesuye iwabo (Foto Iyaremye Y)

Nyiramanza Lucie, utuye mu mudugudu wa Giramata mu Kagari ka Kanyirabigogo mu murenge wa Kanzenze, agaragaza uburyo amaze ukwezi kumwe afashijwe gutura heza ndetse n’inzu ye ikaba yaregerejwe ibi bikorwaremezo, byose akavuga ko abikesha Perezida Kagame wateje imbere imiyoborere myiza, yita kuri buri wese nta vangura.

Yagize ati “Mbere nabaga mu ishyamba rya Gishwati, Leta imvanayo baza kuntuza hano hafi y’umuhanda, nahubakiwe inzu nziza, ubu vuba banshyiriyemo umuriro w’amashanyarazi, none hashize icyumweru kimwe bangerejemo n’amazi.

Nta bwo ngikora ibirometero byinshi njya gushaka amazi mukabande, ibi byose tubikesha imiyoborere isobanutse dukesha Perezida wacu Paul Kagame, kandi twiteguye kongera kumuhundagazaho amajwi, kuko ntawundi twifuza ko atuyobora.”

Abaturage batuye muri aka gace, bagaragaza ko muri rusange iwabo hamaze kugera iterambere rigaragarira buri wese, ndetse by’umwihariko bakagaragaza ko n’ikibazo cy’amazi ataragera hose bizeye ko kigiye gukemuka vuba, nk’uko babyijejwe n’ubuyobozi.

Uwatwese Jean Paul, umunyamabanga nshingwabikorwa w’akagari ka Kanyirabigogo, mu kiganiro yagiranye n’Imvaho Nshya, yavuze ko na we ashimishwa cyane n’iterambere rigaragarira buri wese abatuye muri aka kagari bamaze kugeraho, ndetse agashimangira ko n’utundi tubazo duke nk’ahataragera amazi, tukibangamiye abaturage tuzakemurwa vuba.

Yagize ati “Hari icyizere ko bizakorwa muri uyu mwaka w’ingengo y’imari wa 2017-2018 kuko byatangiye gukorwa ndetse hakaba hari na bamwe ayo mazi yatangiye kugeraho.”

Akagari ka Kanyirabigogo gatuwe n’abaturage 3513, gahana imbibi n’umurenge wa Bigogwe mu Karere ka Nyabihu n’umurenge wa Mudende mu Karere ka Rubavu.
MAGARAMBE THEODORE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE