2017-10-16 07:05:01 clouds 27o High | Kigali Rwanda

Dukurikire:
 
 

Habineza yagejeje imigambi ye ku b’i Nyamasheke ariko hari iyo batumva kimwe

Yanditswe na IMVAHO NSHYA

Kuya 2017-07-17 06:05:56

 
Share on:
 
Yasuwe:771
 
Yavuzweho:200
 
10
 
10

Ku munsi wa kabiri wo kwiyamamariza umwanya wa Perezida wa Repubulika, umukandinda w’Ishyaka ‘Democratic Green Party of Rwanda’, Dr Frank Habineza, yabwiye abaturage ba Nyamasheke ko nibamutora azabaha ubwato bubahuza n’Akarere ka Rubavu ndetse akabubakira imwe mu mihanda itaratunganywa kugeza ubu.

Ku kibuga cy’umupira cya Kirambo kiri mu kagari ka Kigoya, mu murenge wa Kanjongo muri aka karere, ni ho Dr Frank Habineza yahuriye n’abaturage, abasaba kumugirira icyizere bakamutorera kuba umukuru w’igihugu, kuko ngo afite imigambi myiza izabafasha kurushaho kuzamura imibereho yabo.

Mu by’ibanze avuga azageza ku banyarwanda harimo kubarindira umutekano ku buryo bwose bushoboka, agashyiraho ibyogajuru n’indege zitagira abapilote (drones) zo gufasha abashinzwe umutekano kuwucunga neza.

JPEG - 100.1 kb
Habineza yiyamamaza i Nyamasheke

Hari kandi gushyiraho Politiki z’ubuhinzi zizafasha Abanyarwanda kurushaho kwihaza mu biribwa no gusagurira amasoko, kurushaho gutsura umubano n’ibindi bihugu, cyane cyane u Burundi n’u Bufaransa, kuko ngo atajya yishimira uburyo umubano w’u Rwanda n’ibi bihugu wasubiye inyuma cyane.

Yakomeje agira ati “Aha muri Nyamasheke hari ikibazo cy’ubwato, bakeneye ubwato buzajya bubafasha kuva hano kugera ku Gisenyi, nidutorwa tuzahita tububashyikiriza, ndetse n’umuhanda Cyato-Rangiro-Tyazo tuzawushyiramo kaburimbo urusheho kuba nyabagendwa, abaturage bave mu bwigunge.”

Bamwe mu baturage baje kumva imigabo n’imigambi ye, batangaje ko ibyo yemeye nashobora kubishyira mu bikorwa bizateza igihugu imbere, n’ubwo hari ibyo babona nk’ibigoranye kubishyira mu bikorwa.

Nsengiyumva Venuste yagize ati “Ibyo atubwiye tubyakiriye neza, abaye yabasha kubishyira mu bikorwa byaba ari byiza cyane, ariko njye mbona hari ibyamugora kugeraho, nko kuvuga ko yazana icyogajuru byo simbihamya, ariko ubwato bwo turabukeneye cyane n’undi watorwa twifuza ko yazabuduha, umuhanda na wo uzatorwa wese twizeye ko azawudukorera.

Gusa ibyo avuze turabyumvise tugiye kumva n’abandi bakandida bazaza ino, nyuma yo kubumva bose ni bwo tuzafata icyemezo cyo guhitamo umukandida dutora tunahereye no ku byo tumaze kugeraho ubu, ibyo twagejejweho.”

BAHUWIYONGERA SYLVESTRE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE