2017-09-21 09:07:12 clouds 27o High | Kigali Rwanda

Dukurikire:
 
 

Imyaka 10 ishize u Rwanda rwinjiye muri EAC: Ishusho y’ubufatanye n’ibindi bihugu

Yanditswe na IMVAHO NSHYA

Kuya 2017-07-14 12:57:27

 
Share on:
 
Yasuwe:92
 
Yavuzweho:200
 
10
 
10

Hashize imyaka 10 u Rwanda rwinjiye mu muryango wa Afurika y’Uburasirazuba, EAC, ugizwe n’ibihugu bitandatu: u Rwanda, Kenya, Uganda, Tanzania, Burundi na Repubulika ya Sudani y’Amajyepfo yawinjiyemo nyuma.

U Rwanda rwinjiye muri uyu muryango hagendewe ku nkingi ya Gatandatu y’icyerekezo 2020 ijyanye no kuzamura ubukungu no kurushaho kunoza ubufatanye hagati y’ibihugu bigize Umuryango no kureshya abashoramari mpuzamahanga.

Ibarura ryakozwe rigaragaza ko EAC ifite abaturage bagera kuri miliyoni 162 n’umusaruro mbumbe w’imbere ungana na miliyari 169,5 z’amadolari ya Amerika, ushimangira ko hari isoko rikomeye n’ubukungu bufatika mu guteza imbere ishoramari n’ubucuruzi mu karere no hanze yako.

Perezida Paul Kagame aherutse gutangariza kuri Televiziyo y’igihugu ari byiza ko u Rwanda ari umunyamuryango w’Umuryango w’Afurika y’Uburasirazuba. Icyo gihe yagize ati “Hari byinshi byagezweho, twakoze dufatanyirije hamwe nk’umuryango.”

JPEG - 183.6 kb
Abakuru b’ibihugu bya EAC mu nama ya 17 idasanzwe yabahuje muri Nzeli 2016

Leta y’u Rwanda kuva yakwinjira muri uyu muryango, ibinyujije muri Minisiteri y’Ubucuruzi, Inganda n’ibikorwa by’Umuryango w’Afurika y’Uburasirazuba (MINEACOM), hakozwe ubukangurambaga mu baturage bugamije kubafasha kumenya impamvu u Rwanda ruri muri uyu muryango no kubahamagarira kubyaza umusaruro amahirwe awubonekamo.

Mu myaka 10 ishize ba rwiyemezamirimo benshi baiyandikishije mu nzego zitandukanye.

Ubucuruzi bw’u Rwanda na EAC

MINEACOM ivuga ko ubucuruzi hagati y’u Rwanda na EAC bwazamutse mu 2008 buva ku madolari ya Amerika miliyoni 340 bugera ku madolari miliyoni 544 mu mwaka wa 2016 bigaragaza ko bwazamutseho 6% ku mwaka.

Mu myaka 9 ishize ibyoherezwa mu mahanga byari ku mpuzandengo ya 17%, ubwo bucuruzi bw’ibyoherezwa mu mahanga burazamuka bugera ku madolari miliyoni 148 mu mwaka wa 2016 bivuye ku madolari miliyoni 42 mu mwaka wa 2008.

Guhuza imipaka

Gahunda yo guhuza za gasutamo mu bihugu bigize umuhora wa ruguru n’uwo hagati yashyizweho hagamijwe gukuraho inzitizi zabonekaga mu nzira hagati y’ibyambu na Kigali no kugabanya igihe ibicuruzwa byamaraga mu nzira nk’uko MINEACOM ikomeza ibivuga.

Mu mwaka wa 2013 hatangizwa ku mugaragaro iki gikorwa, mbere kugira ngo kontineri igere i Kigali ivuye Mombasa byafataga iminsi 22, kandi ikahagera ku kiguzi cy’amadolari y’Amerika 4 650.

Iyi minisiteri ivuga ko ibyagezweho kuri iyo tariki, byagize uruhare mu kugabanya igiciro n’igihe kontineri yamaraga hagati ya Mombasa na Kigali bigera ku minsi 6,3 ku madolari 3 655.

Ishyirwa mu bikorwa ry’ibyo byemezo ryatumye haba impinduka, haba mu koroherezwa gukora imenyekanisha, abakozi ba Gasutamo b’u Rwanda bagiye gukorera i Mombasa, igihe kiragabanuka, ikoreshwa ry’ikoranabuhanga mu gukora imenyekanisha n’ibindi.

JPEG - 111 kb
Umupaka wa Kagitumba woroheje ubuhahirane hagati y’u Rwanda na Uganda

Guhuza itumanaho

Kugabanya ibiciro byo kwitaba no guhamagara mu bihugu bigize Umuhora wa ruguru byongereye umubare munini w’abahamagara bagera kuri 312% hagati y’Ugushyingo 2014 n’Ugushyingo 2015.

Kugabanya ibiciro byo guhamagara ndetse no kwitaba hagati ya Kenya n’u Rwanda, bikaba byatangiye kubahirizwa kuva tariki ya 1 Ukwakira 2014.

Iki gikorwa cyo guhuza itumanaho cyashyizweho hagamijwe kugabanya ibiciro byo guhamagara mu karere aho mbere ya 2014 cyari ku madolari 2.19 ku munota mu guhamagarana mu muryango w’Afurika y’Uburasirazuba.

Ibiganiro hagati y’ibigo by’itumanaho birakomeje no mu muhora wo hagati haba mu kugira isoko rimwe, guteza imbere itumanaho, ubukerarugendo ndetse n’ubucuruzi bwambukiranya imipaka.

Umupaka umwe, gukoresha indangamuntu byoroheje ubucuruzi

Abakora ubucuruzi buciriritse n’abacuruzi bato bato bungukiye byinshi mu gukoresha indangamuntu ku mipaka kuko byaborohereje kugera ku isoko, abatumiza n’abohereza ibicuruzwa hanze bo babona inyungu nini mu ishyirwaho ry’umupaka umwe.

Hubatswe imipaka ihuza ibihugu, aho serivise zo kwinjira no gusohoka mu gihugu zitangirwa hamwe. Ibi bigabanya umwanya abantu bakoreshaga basinyisha mu gihugu kimwe, bagakomeza bajya gusinyisha mu kindi.

Ndamage Damascene ukunze gukoresha umupaka wa Gatuna, ahamya ko guhuza imipaka byoroheje ubucuruzi mu karere. Yagize ati “Iyo ngeze i Gatuna nkoresha amasaha 2 mu kuzuza impapuro nyuma ngakomeza urugendo. Uwo ni umwanya muto mu gihe mu bihe byashize byansabaga gukoresha iminsi 2 mu kuzuza impapuro”.

Hakuweho inzitizi zidashingiye ku mahoro

Hari intambwe nini yatewe mu gukuraho inzitizi zidashingiye ku mahoro (NTBs).

EAC yashyizeho gahunda muri 2009 igamije kugaragaza inzitizi ku bucuruzi zidashingiye ku mahoro zose hamwe zari 116 kandi zikurwaho. Ibi byafashihe ubucuruzi hagati y’ibihugu bigize Umuryango w’Afurika y’Uburasirazuba.

Ikoreshwa ry’indangamuntu ryongereye urujya n’uruza rw’abantu

JPEG - 185.6 kb
Kujya muri Kenya na Uganda ntibigisaba Passport indangamuntu irahagije

Ikoreshwa ry’indangamuntu ku mupaka ryagize uruhare mu bucuruzi. Guhera muri Mutarama 2014, abantu bangana na miliyoni 1.4 berekanye indangamuntu ku mupaka haba mu kwinjira no gusohoka ku mupaka w’u Rwanda nyuma y’umwaka umwe hatangijwe icyo gikorwa.

MINEACOM ivuga ko indangamuntu kandi yatumye habaho urujya n’uruza rw’abantu, bikaba ari amahirwe ku banyarwanda mu kwigira ku byiza biboneka mu karere haba mu guhangana ku isoko bagura ibikorwa byabo.

VISA imwe y’ubukerarugendo

Gukoresha visa imwe y’ubukerarugendo byatangiye mu 2014 kandi igakoreshwa mu kwinjira. Mu mezi 18 ya mbere nyuma y’uko iyi gahunda itangizwa hatanzwe visa 8 409.
Igiciro cya VISA ni amadolari y’Amerika 100 mu gihe cy’iminsi 90 kandi umukerarugendo akaba yemerewe gukoresha iyo Visa mu Rwanda, Kenya na Uganda.

Ibyo byongereye umubare munini wa ba mukerarugendo kandi byinjiriza byinshi ibyo bihugu. Buri gihugu cyakira kuri buri VISA y’urugendo yatanzwe, amadolari 30 naho igihugu cyayitanze kikabona amadolari 10 yiyongera kuri ayo yakoreshejwe muri icyo gikorwa. Iyo Visa itangwa hifashishijwe ikoranabuhanga, Ambasade n’abazihagarariye.

Gufatanya mu micungire y’ikirere

Hasinywe amasezerano y’ubufatanye mu mikoreshereze y’ikirere hagati y’ibihugu bigize umuhora wa ruguru. Kompanyi y’indege yemerewe gufata abagenzi muri Uganda, Kenya, u Rwanda na Sudani y’Amajyepfo aho baherereye ikabajyana mu kindi gice bashaka kujyamo nta guhagarara mu bihugu byabo.

Impinduka zihuse ku bukungu zageze ku madolari 49.43 harimo n’amafaranga yinjijwe na RwandAir, kugabanya igiciro cy’indege ku bakunze gukora ingendo, kongera umubare w’indege, kunoza imikorere, kubahiriza igihe ku Banyarwanda no ku bagenzi mpuzamahanga n’ibindi.

Minisiteri y’Ubucuruzi, Inganda n’ibikorwa by’Umuryango w’Afurika y’Uburasirazuba itegura buri mwaka icyumweru cyahariwe ubukangurambaga mu rwego rwo gufasha Abanyarwanda kuba babyaza umusaruro amahirwe aboneka muri uwo muryango.

Hategurwa kandi ubukangurambaga ku bagore bari mu nzego z’ubuyobozi haba mu nzego za Leta n’izigenga, sosiyete sivili, n’ibigo bagasobanurirwa ku mahirwe aboneka muri uyu muryango.

Hashize igihe iyi minisiteri itegura ibiganiro mu mashuri yaba ayisumbuye, Kaminuza n’ibigo by’amashuri makuru. Hagakorwa ibiganiro mpaka bifasha mu kwigisha urubyiruko mu mashuri na za Kaminuza bigamije kubafasha kubyaza umusaruro amahirwe ahari.

UWIMANA DONATA

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE