2017-09-25 08:13:20 clouds 27o High | Kigali Rwanda

Dukurikire:
 
 

CHAN 2018: Amavubi yerekeje i Mwanza muri Tanzania

Yanditswe na IMVAHO NSHYA

Kuya 2017-07-14 08:32:33

 
Share on:
 
Yasuwe:338
 
Yavuzweho:200
 
10
 
10

Ikipe y’u Rwanda “Amavubi” mu ijoro ryakeye yahagurutse mu Rwanda yerekeza i Mwanza muri Tanzania aho igiye gukina umukino ubanza n’ikipe y’igihugu ya Tanzania mu rwego rwo gushaka itike ya CHAN 2018 izabera muri Kenya.

Abakinnyi 18 bari kumwe n’ababaherekeje bahagurutse mu Rwanda saa tanu n’igice z’ijoro (23h30) berekeza i Dar es Saalam, nyuma uyu munsi tariki 14 Nyakanga 2017 akaba ari bwo berekeza i Mwanza ahazabera umukino.

Umukino biteganyijwe ko uzaba ejo ku wa Gatandatu tariki 15 Nyakanga 2017 kuri CCM Kirumba Stadium. Naho umukino wo kwishyura ukaba tariki 22 Nyakanga 2017 kuri Sitade ya Kigali i Nyamirambo.

JPEG - 134.8 kb
Abakinnyi b’Amavubi bajyanye intego yo kwitwara neza muri Tanzania (Foto Ngabo R)

Nyuma y’imyitozo ya nyuma yabaye tariki 12 Nyakanga 2017, umutoza w’Amavubi, Antoine Hey yatangaje ko abakinnyi ajyanye bameze neza nta mvune. Avuga kuri uyu mukino yatangaje ko icyiza ari uko bazakinira umukino wo kwishyura mu Rwanda.

Ati “Tugomba gushaka umusaruro mwiza nyuma tukareba uko twakwitwara neza mu mukino wo kwishyura”.

Uyu mutoza ariko yagarutse ku bakinnyi yari yizeye kuzakoresha barimo Usengimana Danny, Rusheshangoga berekeje muri Singida FC na Niyonzima Ally wagiye mu igeragezwa muri Zambia.

Yagize ati “Twari tubafite muri gahunda zacu ariko mu gihe cy’isozwa ry’umwaka w’imikino ibi biba bigomba kuba, abakinnyi bahiduranya amakipe bamwe bajya no hanze. Tuzakoresha abakinnyi dufite kandi twizeye kuzakina umukino mwiza”.

Kapiteni w’Amavubi, Ndayishimiye Eric “Bakame” yatangaje ko biteguye neza guhangana na Tanzania.

Ati “Ni ikipe nziza imaze iminsi yitegura inakina amarushanwa atandukanye gusa turi ku rwego rumwe tuzagerageza twitware neza”.

Umukino uheruka guhuza aya makipe wabaye muri 2015 muri CECEFA, Amavubi yatsinzwe na Tanzania ibitego 2-1. Gusa muri 2011 Amavubi abona itike bwa mbere muri CHAN yasezereye Tanzania nyuma yo kunganya igitego 1-1 muri Tanzania, umukino wo kwishyura Amavubi atsinda igitego 1-0.

Abakinnyi 18 berekeje muri Tanzania

Abanyezamu: Ndayishimiye Eric (Rayon Sports) na Nzarora Marcel (Police FC)

Myugariro: Manzi Thierry (Rayon Sports), Kayumba Soter, Bishira Latif, Iradukunda Eric (AS Kigali), Rucogoza Aimable (Bugesera FC), Imanishimwe Emmanuel, Nsabimana Aimable (APR FC) na Muvandimwe Jean Marie Vianney (Police FC).

Hagati: Niyonzima Olivier Sefu, Muhire Kevin (Rayon Sports), Mukunzi Yannick, Bizimana Djihad (APR FC) na Nshuti Dominique Savio (AS Kigali).
Rutahizamu: Mico Justin (Police Fc), Nshuti Innocent (APR FC) na Mubumbyi Barnabe (AS Kigali).

BUGINGO FIDELE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE