2017-09-24 09:25:05 clouds 27o High | Kigali Rwanda

Dukurikire:
 
 

Rusizi:Impanuro za Kagame zamufashije kwikura mu bukene yiyubakira uruganda rwa Miliyoni 80

Yanditswe na IMVAHO NSHYA

Kuya 2017-07-14 06:19:36

 
Share on:
 
Yasuwe:152
 
Yavuzweho:200
 
10
 
10

Nzagirante Fiacre w’imyaka 51 y’amavuko, utuye mu mudugudu wa Idaga, akagari ka Mashesha, mu murenge wa Gitambi, mu karere ka Rusizi, arishimira ko yikuye mu bukene, ubu akaba atunze uruganda rwa miliyoni 80 abikesha impanuro za Perezida wa Repubulika Paul Kagame.

Uyu mugabo ubarirwa mu bafite ifaranga ritubutse muri uyu murenge atuyemo, mu myaka mike ishize yari umukene cyane, kubona aho kuba n’ibimutunga abibonamo ihurizo rikomeye.

Ashingiye ku mpanuro za Perezida Kagame akunda gukurikirana kuri Radiyo na Televiziyo, ngo zatumye ava mu bufundi yinjira mu buhinzi bwa kawa, none mu myaka mike cyane abumazemo akaba amaze kwiyubakira uruganda rwa kawa rwamutwaye amafaranga 80 000 000 rwiyongera ku yindi mitungo itandukanye afite.

Mu kiganiro n’Imvaho Nshya ubwo umurenge wa Gitambi wishimiraga ibyo umaze kugezwaho na Perezida Paul Kagame muri iyi manda y’imyaka 7 ishize, Nzagirante Fiacre yavuze ko aho avuye n’aho ageze hashimishije, akaba avuga ko abikesha imiyoborere myiza ya Perezida Kagame.

JPEG - 167.1 kb
Nzagiranye yereka Umunyamakuru w’Imvaho Nshya zimwe mu mashini z’uruganda rwe

Uyu mugabo uvuga ko yamaze imyaka 26 ari umufundi utagize icyo yimariye, avuga ko yaje kwishyira hamwe na bagenzi be bakora koperative ‘Tuzamurane’ y’abahinzi ba kawa, mu mwaka wa 2010 bubaka uruganda rwa kawa, muri 2014 bubaka urundi, zose hamwe zifite agaciro k’amafaranga 280 000 000, aza kubona bidahagije yiyubakira n’urwe bwite rufite agaciro ka 80 000 000 z’amafaranga y’u Rwanda.

Yagize ati “Maze kuba umuhinzi wa kawa ntangarugero, tumaze no kubona izo nganda zombi, naje kujya mu gihugu cy’u Buyapani kuri misiyo ya Leta y’u Rwanda, nanjye nurira indege njya kureba uko mu Buyapani bita kuri kawa marayo iminsi 12.

Mvuyeyo ntekereza gushyira ibyo nkuyeyo mu bikorwa, ni bwo nubakaga uruganda rwanjye bwite rwa kawa, rufite agaciro ka 80 000 000 ushyizemo n’imirima yarwo n’imashini zarwo, rukaba rwarangiriye akamaro cyane.”

Yakomeje agira ati “Si ibyo gusa nagejejweho n’imiyoborere myiza kuko ubu mfite inzu mbamo ifite agaciro katari munsi ya 40 000 000, nkaba nkoresha abakozi mpemba mu gihe hari akazi kenshi kajyanye na kawa bagera kuri 50 mpa arenga 1 500 000 buri kwezi, nkaba maze no kubona Agoronome uhoraho nzajya mpemba buri kwezi akazajya akurikirana imirimo yose y’uruganda n’ubuhinzi bwanjye bwa kawa.

Mfite inka 4 n’ibindi bikorwa bikomeye bimpa icyizere ko abana banjye baziga na za kaminuza, byose mbikesha imiyoborere myiza n’umutekano usesuye nkoreramo.”

Nzagirante avuga ko anishimira ko bagenzi be bamutoreye guhagararira ihuriro ry’amakoperative y’abahinzi ba kawa muri aka karere, akaba anamaze kugira ingemwe 50 000 zimutwaye miliyoni yose y’amafaranga agiye guha abaturage bagatera, mu minsi iri imbere kawa zikazaba ari nyinshi, akanashimira Leta ko igiciro cya kawa kigenda kizamuka.

Umunyamabanga nshingwabikorwa w’umurenge wa Gitambi, Habimana Emmanuel, avuga ko aho abaturage bageze biteza imbere hashimishije, akabasaba kurindira umutekano ibyo bagezeho kugira ngo hatazagira ubasubiza inyuma ashaka kubyangiza.

BAHUWIYONGERA SYLVESTRE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE