2017-09-21 09:07:12 clouds 27o High | Kigali Rwanda

Dukurikire:
 
 

2010-2017: Ikoranabuhanga ryahinduwe ishingiro ry’ubukungu

Yanditswe na IMVAHO NSHYA

Kuya 2017-07-13 07:23:10

 
Share on:
 
Yasuwe:93
 
Yavuzweho:200
 
10
 
10

Abari batunze telefoni ngendanwa muri 2010 bari 36% ubu ni 72,65%
Abakoreshaga interineti muri 2010 bari 7% ubu ni 36, 6%.

Minisiteri y’Urubyiruko n’Ikoranabuhanga ivuga ko mu myaka irindwi ishize (2010-2017) ya manda ya Perezida Paul Kagame, ikoranabuhanga ryateye imbere ku buryo bugaragara.

Mu kiganiro kihariye kirambuye Imvaho Nshya yagiranye na Emmanuel Habumuremyi, umujyanama wa Minisitiri w’urubyiruko n’ikoranabuhanga, yagaragaje ko imibare y’ibyagezeho mu ikoranabuhanga kuva mu 2010 yagiye izamuka umusubirizo.

Yagize ati “Ku bijyanye n’aho twavuye mu rwego rw’ikoranabuhanga, mu itumanaho n’isakazabumenyi, kuva mu mwaka wa 2010 kugera muri uyu mwaka, usanga ari byinshi, kuko ureba imibare ukuntu yagiye izamuka bikagenda biguha ishusho y’uburyo mu gihe kigiye kuza bigiye kwihuta noneho kurushaho kuko icyo gihe mbere habanje kubakwa umusingi ariko ubu noneho umusingi urahari, ibyakomerezwaho birahari kugira ngo dushobore gutera imbere kurushaho.”

JPEG - 273 kb
Mu myaka irindwi ishize ikoranabuhanga ryatejwe imbere, ni nabwo ryatangiye kugira uruhare rwaryo mu musaruro mbumbe w’igihugu

Uretse gufasha izindi nzego gukora neza, mu myaka irindwi ishize uruhare rw’ikoranabuhanga mu musaruro mbumbe w’igihugu rwavuye hafi ku busa rugera hafi 3%.

Abantu batunze telefoni ngendanwa bavuye kuri 36% ubu ni 72,65%

Habumuremyi avuga ko ikintu cya mbere umuntu yaheraho ari ibijyanye n’ikoreshwa ry’amatelefone ngendanwa n’Abanyarwanda, aho usanga umubare waragiye uzamuka cyane.

Mu mwaka wa 2010 abantu bari bafite telefone ngendanwa bari ku kigero cya 36%, ariko ubu bageze hejuru ya 72% kuzamuka.

Yagize ati “Mu mpera za 2016 twari kuri 79,2% ariko haje kubaho ko hari telefone zimwe zitagiye zikoreshwa, izo simukadi zikavanwa ku murongo, ubu rero turi kuri 72, 65%.”

Umuvuduko wa interineti urashimishije

Ahandi habayeho uburyo bwo kwihuta cyane ni mu gukoresha interineti (murandasi). Uyu muyobozi avuga ko abantu bayikoreshaga mu mwaka wa 2010 wasangaga batageze ku 10%, ubu bageze kuri 36, 6%.

Ibi bivuze ko habayeho umuvuduko ku bantu bayikoresha, bitewe ahanini na serivisi zituma umuntu ajya gukoresha ‘internet’ ziyongereye.

Ikindi cyo kwishimirwa ni uburyo ikoranabuhanga ryagiye rikoreshwa mu buryo bw’imari cyangwa se uburyo bw’ibyazwamusaruro nka bizinesi.

Aha, ni ho usanga nka serivisi zijyanye no guhanahana amafaranga, kwishyurana hakoreshejwe ikoranabuhanga, zaragiye ziba nyinshi cyane mu gihe muri za 2010 wasangaga abantu batageraga ku bihumbi 200 bakoresha ‘mobile money’ ubu usanga barenga hafi 3 000 000 ndetse bari hafi gukabakaba 4 000 000.

4G igeze ku kigero cya 62% mu mijyi yose y’u Rwanda

Muri iyi myaka irindwi kandi u Rwanda rwavuye kuri ‘internet’ yo mu cyiciro cya kabiri n’icya gatatu, rutangira gukoresha iya 4G yihuta kurusha izindi kugeza ubu ku isi.

Ibi byajyanye no kuyigeza hirya no hino mu gihugu, hifashishijwe umuyoboro mugari wa ‘fibre optique’ kuko ubu mu gihugu hose hari ureshya na kilometero zisaga 5000.

Ibi byatumye umubare w’abakoresha ‘internet’ uva kuri 7% mu mwaka wa 2011 ugera kuri 36,6% muri 2016.

Biteganyijwe ko u Rwanda rwose ruzaba rufite uyu muyoboro wa 4G kugera kuri 95% mu mpera z’uyu mwaka. Muri uku kwezi turimo bikaba bigeze kuri 62% ku buryo hari ahantu henshi mu Rwanda ushobora kugenda ugasanga 4G yarahageze.

Mu myaka irindwi ihanahanamakuru ryaroroshye cyane

Habumuremyi avuga ko ikoranabuhanga rikoreshwa muri Leta hahanahanwa amakuru, ikigo cya Leta giha ikindi amakuru biroroshye, uburyo Leta ihana serivisi n’abaturage ibyo nabyo byarorohejwe ndetse ni ibintu bigenda byigaragaza.

Muri 2010 hari serivise zitangirwa kuri interineti (online services) zidatanga igisubizo kihuse, ariko ubu umuntu ashobora kwicara iwe akaba yakwaka serivisi akayibona yose nta hantu agiye gutonda umurongo ku biro runaka.

Kuri ubu, serivisi z’Irembo zimaze kugeraho ni 53 ariko biteganyijwe ko mu gihe kizaza ari serivisi umuntu azajya yiha ari mu rugo atiriwe ajya kureba umuntu uwo ari we wese.

Mu bindi bijyanye n’amaporogaramu atandukanye abantu bagiye bashyiraho, muri 2010 kubona ‘internet’ ahantu hahurira abantu benshi ntibyashobokaga, ariko ubu mu mabisi harimo WI FI aho umuntu ashobora kuba avuye ku kazi ntatandukane nako ageze mu modoka ataha. Ibi bivuze ko bitakiri inzitizi ko umuntu ashobora kubura uko avugana n’abantu ashaka.

Habaye impinduka nyinshi mu ikoranabuhanga

Mu bijyanye no kubaka urwego rw’ikoranabuhanga harebwa ibijyanye na politiki zitandukanye zagiye zijyaho ndetse no ku bigo byagiye bishyirwaho kugira ngo bifashe mu gushyira mu bikorwa izo politiki, hari ibigo bibiri bishya byashyizweho mu rwego rw’ikoranabuhanga n’isakazabumenyi.

Icya mbere ni icyo bita RISA (Rwanda Information Society Authority), kikaba ari ikigo gishinzwe guteza imbere ikoranabuhanga mu itumanaho n’isakazabumenyi ku buryo u Rwanda ruba umuryango ukoresha ikoranabuhanga cyane. Iki kigo kizashyira u Rwanda ku rwego ruhanitse mu ikoranabuhanga rigamije impinduka ku Banyarwanda.

Hakabaho n’ikindi cyitwa “National Security Agency”, harimo ibijyanye n’umutekano w’ibinyuzwa mu ikoranabuhanga. Habumuremyi ati “ Iyo wubaka ibikorwa remezo by’ikoranabuhanga, ugashyiramo serivisi zawe, biba bisaba ko ugomba no kubaka ubushobozi bujyanye n’umutekano kuko iyo wibeshye gato ibyo unyuzaho byose bishobora gusenyuka.

Ku bw’ibyo rero, iki kigo cyashyizweho. Itegeko ryacyo riri hafi gusohoka ku buryo mu gihe kizaza kizaba ari cyo kizajya gikurikirana umutekano w’iby’ikoranabuhanga.”

Abikorera mu ngamba zo kugira ikoranabuhanga iryabo

Habumuremyi avuga ko ikindi gishimishije kurushaho ari uko Leta mbere ari yo yashyiragaho ibikorwa remezo, igashaka n’uburyo serivisi zinyuzwamo ariko muri iki gihe Leta yashishikarije abikorera kuba ari bo cyane cyane bayobora cyangwa se bakoresha cyane ibijyanye no gushora imari mu by’ikoranabuhanga n’itumanaho n’isakazabumenyi.

Impamvu ni uko muri uru rwego ari ahantu aba bikorera bashobora kubyaza amafaranga bakabona inyungu. Ku bw’ibyo, usanga imishinga myinshi igenda ikorwa ubu ikorwa n’abikorera kandi ugasanga ibafasha kwiteza imbere.

U Rwanda rwagiye rubona ibihembo mu rwego rw’ikoranabuhanga

JPEG - 113.6 kb
Perezida Kagame yahembewe guteza imbere ikoranabuhanga muri 2015

Muri iyi manda y’imyaka 7 ishize, urwego u Rwanda rugezeho mu ikoranabuhanga rurishimiwe cyane kuko hari n’ibihembo byinshi byagiye biboneka.

Harimo ibihembo byagiye bitangwa n’Umuryango Mpuzamahanga w’Itumanaho (ITU) cyangwa se hakabaho kugenda u Rwanda ruhabwa umwanya wa mbere n’ibigo bitandukanye bitanga amanota ku bihugu aho ruza ari urwa mbere cyangwa se rukaza ari urwa kabiri mu ikoranabuhanga.

Icyegeranyo cy’umuryango mpuzazamahanga w’ubukungu ku isi “World Economic Forum” cy’umwaka ushize, cyashyize u Rwanda ku mwanya wa mbere ku isi mu guteza imbere ikoranabuhanga, ruba urwa 32 ku isi n’urwa mbere muri Afurika mu guteza imbere imibereho myiza y’abaturage hifashishijwe ikoranabuhanga.

Mu bindi, Abanyarwanda batangiye gukoresha ikoranabuhanga bishimiye uburyo ribafasha mu buzima bwabo bwa buri munsi ndetse hari gahunda zitandukanye zo gutuma Umunyarwanda koko abona umusaruro ufatika uturutse mu ikorabuhanga n’isakazabumenyi.

Ni muri urwo rwego, Abanyarwanda bashishikarizwa kwitabira ibijyanye n’ikoranabuhanga mu itumanaho n’isakazabumenyi, dore ko igihugu cyashyizemo imbaraga mu gutuma ikoranabuhanga riba ishingiro ry’ ubukungu kugira ngo koko ribabyarire umusaruro, cyane ko ubu ikoranabuhanga nta kintu na kimwe ridashobora gukoreshwamo haba mu burezi, mu bucuruzi, mu buzima, n’ibindi.

Bityo, ikoranabuhanga rifungura amarembo ntibabone isoko hafi y’iwabo gusa, ahubwo bakaribona mu buryo bwagutse kandi bugera ku rwego rw’isi.

MUKAGAHIZI ROSE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE