2017-11-21 14:43:49 clouds 27o High | Kigali Rwanda

Dukurikire:
 
 

Nyamasheke: Abaturage biyemeje gusigasira iterambere bakesha Perezida Kagame

Yanditswe na IMVAHO NSHYA

Kuya 2017-07-12 09:33:10

 
Share on:
 
Yasuwe:120
 
Yavuzweho:200
 
10
 
10

Abaturage b’umurenge wa Bushenge mu karere ka Nyamasheke, barishimira aho bagejejwe n’ubuyobozi bwiza bw’igihugu burangajwe imbere na Perezida wa Repubulika Paul Kagame, aho bavuga ko kuri ubu ubuyobozi ari bwo babonye ibitaro by’akataraboneka n’abaganga b’inzobere batari barigeze babona ku ngoma zabanje.

Mu bikorwa by’iterambere aba baturage bishimira, uretse ibi bitaro, harimo isoko ryiza rya kijyambere, imihanda ikoze neza yikubye inshuro nyinshi, n’ibindi, bakavuga ko gukomezanya na Perezida wa Repubulika Paul Kagame ari kimwe mu byabafasha gukomeza kwihutisha mu iterambere.

Ubwo Imvaho Nshya yabagendereraga, bishimiye ibyagazweho mu murenge wabo babikesha imiyoborere myiza, bamwe bagaragaje ko muri iyi miyoborere ibaha gutekana ari bwo babashije kugura inka banywa amata, abandi barihira abana mu mashuri, abandi bashyira amashanyarazi mu nzu zabo basezerera udutadowa.

JPEG - 259 kb
Gitifu Nabagize Justine abasaba abaturage kutirara kuko urugamba rw’iterambere rukomeje

Habimana Augustin w’imyaka 67 yagize ati “Kuri iyi myaka mfite, muri iyi myaka mike ishize ni bwo nabashije kugeza inka mu rugo rwanjye, nanjye norora inka kandi mbere itungo nari naroroye rigaragara ni ikibwana cy’ingurube na cyo kitari cyarigeze kigira icyo kimarira.

Ariko ubu inka yanjye irampa ifumbire, ndeza neza kandi iyi nka nayikuye mu buhinzi no mu buvumvu, nyamara mbere ayo nakoreraga nt acyo yamariraga kuko nta buyobozi bwadukanguraga amaso ngo butwereke ibyo dukwiye kubyaza umusaruro w’iterambere.”

Avuga ko ubu yasirimutse kuko mbere kwambara inkweto n’ipantalo nziza agiye mu bandi nta cyo byamubwiraga, ariko ubu ngo arambara akambika n’abe bakizihirwa, urwaye akivuza kuko mituweli ayitanga kare, abana be bakiga akaba yumva bazanaminuza kubera imiyoborere myiza.

Banavuga ko kimwe mu bibizihiye ari ibitaro bya Bushenge bubakiwe na Perezida Kagame nyuma y’uko ibindi bishegeshwe n’umutingito, akanabaha kaburimbo ihagera, kuba nta muturage ukigenda mu rume kubera ko imihanda yaharuwe, abana bose bakaba bava mu bujiji umunsi ku munsi kuko amashuri yabegerejwe, amatsinda yo kwizigamira akaba akura abaturage mu bukene uko bukeye n’uko bwije, bakavuga ko mu myaka 7 iri imbere, bari kumwe na Perezida Kagame bazaba bateye imbere bitangaje.

Umunyamabanga nshingwabikorwa w’uyu murenge wa Bushenge, Nabagize Justine, avuga ko aho bageze hashimishije nubwo batakwirara kuko urugendo rw’iterambere rugikataje, akishimira ko buri muturage wese atanga mituweli yarwara akabasha kwivuza, ibitaro byo ku rwego rw’intara bibarizwa mu murenge wabo, n’ibindi byinshi bibashimisha bagaterwa ishema no kuyoborwa neza.

Ati “Umuturage w’umurenge wa Bushenge uyu munsi arishimye rwose kandi ni mu gihe, bafite isoko riganwa na Rusizi na Nyamasheke ndetse na Kigali turayigaburira ibijumba n’ibindi tweza. Dufite ivuriro rigezweho buri wese areba ubwuzu bukamutaha, abaturage bibumbiye mu matsinda n’amakoperative bariteza imbere uko bwije n’uko bukeye kuko bigishijwe gukoresha imbaraga zabo ngo bikure mu bukene, mituweli turarenza 100% kuko bamaze kumenya akamaro kayo, n’ibindi byinshi aho ubuhinzi n’ubworozi biteza imbere abaturage bifatika.”

Uyu muyobozi asaba abaturage gusigasira ibyagezweho bafasha ubuyobozi mu kubicungira umutekano banirinda uwabihungabanya cyangwa ngo abasubize inyuma mu buryo ubwo ari bwo bwose, akanabasaba guharanira kubyongera bahanga udushya tubateza imbere, buri wese impano nziza afite akayikoresha kugira ngo bakomeze barangwe n’iterambere, n’abagifite intege nke abafite intege babazamure.

BAHUWIYONGERA SYLVESTRE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE