2017-10-18 18:43:44 clouds 27o High | Kigali Rwanda

Dukurikire:
 
 

Croix Rouge yahumurije abikangaga ko ikirunga cya Nyiragongo kigiye kuruka

Yanditswe na IMVAHO NSHYA

Kuya 2017-07-12 07:26:55

 
Share on:
 
Yasuwe:268
 
Yavuzweho:200
 
10
 
10

Mu minsi mike mu karere ka Rubavu kimwe no bindi bice binyuranye humvikanye umutingito udakabije, bamwe babihuza n’ibihuha by’uko ikirunga cya Nyiragongo kiri mu gihugu cya Repubulika iharanira Demokarasi ya Kongo gishobora kuruka, ariko ubuyobozi bwa Croix Rouge y’u Rwanda burahumuriza abaturage ko nta kimenyetso na kimwe kigaragaza ko ibi bibazo byabaho.

Ibihuha by’uko ikirunga cya Nyiragongo gishobora kuruka vuba cyatijwe imbaraga nuko umutingito uherutse kumvikana mu karere ka Rubavu wakurikiwe n’imyitozo yabereye mu mujyi wa Goma muri Repubulika iharanira Demokarasi ya Congo, igamije kureba uko abantu bakwitwara mu gihe habaho ibiza bitunguranye birimo iruka ry’ikirunga, imitingito ikabije, cyangwa se ikindi icyo ari cyo cyose.

JPEG - 252.1 kb
Umuyobozi wa Croix Rouge yahumurije abikangaga iruka ry’ikirunga

Ubuyobozi bw’umuryango utabara imbabare ‘Croix Rouge’ mu karere ka Rubavu, bugaragaza ko nta kibazo ikirunga cya Nyiragongo giteje, ndetse n’umutingito wabayeho ngo nawo nta kibazo cyawo nk’uko Dr Dushime Derricks, uyobora uyu muryango abivuga.

Yagize ati “Ndagira ngo ntangarize abanyarwanda muri rusange ndetse n’abatuye mu karere ka Rubavu by’umwihariko ko nta birunga cyangwa imitingito byenda kuba vuba aha. Ubushakashatsi ndetse n’ibimenyetso dufite kugeza ubu bitwereka ko nta kibazo na kimwe gihari cyangwa giteganya kuba mu minsi ya vuba."

Uyu muyobozi yakomeje avuga ko bakangurira abaturage guhora biteguye ibiza bijyanye n’ibihe by’impeshyi, nk’inkongi z’imiriro, amapfa, banitegura kwirinda n’ibiza biza mu bihe by’imvura.

JPEG - 74.9 kb
Nyiragongo iheruka kuruka muri 2002

Abakorerabushake ba Croix Rouge bavuga ko bahora biteguye umunsi ku munsi, ndetse ngo banahawe n’ubumenyi mu gutanga ubutabazi aho bibaye ngombwa mu gihe cy’ibiza.

Nyiragongo yaherukaga kuruka muri 2002, icyo gihe yasize yishe abantu 147 ndetse n’igice kinini cy’umujyi wa Goma gisenyutse.


MAGARAMBE THEODORE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE