2017-09-21 09:07:12 clouds 27o High | Kigali Rwanda

Dukurikire:
 
 

Nzamwita agiye gutanga kandidature yo kongera kuyobora FERWAFA

Yanditswe na IMVAHO NSHYA

Kuya 2017-07-11 15:09:13

 
Share on:
 
Yasuwe:341
 
Yavuzweho:200
 
10
 
10

Mu gitondo cyo ku wa Gatanu taliki 14 Nyakanga 2017, Nzamwita Vincent De Gaulle usanzwe ayobora ishyirahamwe ry’umupira w’amaguru mu Rwanda “FERWAFA” azashyikiriza komisiyo y’amatora (ikorera muri FERWAFA) kandidature ye yo kongera kwiyamamariza kuyobora iri shyirahamwe .

Amakuru Imvaho Nshya ikesha abari mu bikorwa byo kumufasha kwiyamamariza kuyobora FERWAFA yemeza ko iyi kandidature izaba ikubiyemo ibyangombwa bye birimo kopi y’irangamuntu, icyemezo cy’uko atakatiwe igifungo kirenze amezi atandatu, umwirindoro we na kopi y’impamyabushobozi.

Nk’uko biri mu ngingo ya kane y’amategeko agenga amatora ya FERWAFA, Nzamwita n’abamushyigikiye banamaze gutoranya abantu 14 bazavamo 9 bazajya muri Komite nyobozi n’abandi batanu basimbura uwagira ikibazo.

JPEG - 341.3 kb
Nzamwita Vincent de Gaule ugiye kongera kwiyamamariza kuyobora FERWAFA

Aba 9 barimo Visi Perezida, ushinzwe kwamamaza ibikorwa bya FERWAFA, umuyobozi wa komisiyo y’ amarushanwa, uwa tekinike, uzareba umupira w’abagore, ureba ibijyanye n’iterambere ry’umupira w’abato, umutekano na komisiyo y’ubuvuzi. Nzamwita azaba afite uburenganzira bwo gusimbuza uwakwitwara nabi wese bitanyuze mu nteko rusange.

Dukuzimana Antoine, usanzwe ari umunyamabanga mukuru wa Gicumbi FC akaba n’umwe mu bajyanama ba Nzamwita yabwiye Imvaho Nshya ko muri manda ya kabiri, bashaka gushyira imbere ibijyanye n’imiyoborere bakananoza ibijyanye n’amarushanwa y’abana.

Yagize ati “Turifuza gushyiraho abakozi bashoboye kandi tukajya tubakurikirana tukanabakorera igenzura. Hari amakosa yabaga ukabona nta we uhanwe, ibyo ntibizongera. Dushaka kunoza imiyoborere ubundi tukita ku marushanwa n’amategeko tukongeraho n’umupira w’abana. Turumva hazajya habaho kwinenga buri mezi atatu, tunavugurure imikoranire n’itangazamakuru abantu bakamenya ibyo dukora’’.

Nzamwita kuri ubu arahabwa amahirwe yo gutsindira manda ya kabiri nyuma y’aho Murenzi Abdallah wigeze kuyobora akarere ka Nyanza atangarije ko atakiyamamarije kuyobora FERWAFA.

Komisiyo itegura amatora ya FERWAFA igaragaza ko kuva taliki 10 kugeza 15 Nyakanga 2017 hazatangira kwakirwa kandidature z’abiyamamaza, abazaba bemerewe batangazwe taliki 05 Kanama 2017 maze kwiyamamaza bitangire kuva taliki 14 Kanama 2017 kugeza taliki 09 Nzeri 2017 buri bucye haba amatora.

BIZIMANA ERIC

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE