2017-10-16 07:05:01 clouds 27o High | Kigali Rwanda

Dukurikire:
 
 

Ingufu z’amashanyarazi zikubye inshuro zirenga ebyiri mu myaka 7 – Murekezi

Yanditswe na IMVAHO NSHYA

Kuya 2017-07-11 13:33:16

 
Share on:
 
Yasuwe:109
 
Yavuzweho:200
 
10
 
10

Minisitiri w’Intebe Murekezi Anastase, avuga ko mu myaka 7 ishize Guverinoma yongereye ingufu z’amashanyarazi zikagera kuri Megawati (MW) 208,36 zivuye kuri MW 97 mu 2010.

Bigaragaza ko amashanyarazi u Rwanda rwari rufite yikubye inshuro zirenze ebyiri (2) hakaba hari kandi izindi nganda z’amashanyarazi zirimo kubakwa zizongeraho Megawati 354.

Minisitiri w’Intebe yabivugiye mu Nteko ishinga amategeko kuri uyu wa Kabiri tariki ya 11 Nyakanga 2017, ubwo yagezaga ku mitwe yombi y’abagize inteko ibikorwa bya Guverinoma mu rwego rw’ingufu, nkuko biteganywa n’Itegeko Nshinga.

Yabwiye inteko ibyakozwe mu birebana no kongera ingufu z’amashanyarazi mu murongo mugari, imbogamizi n’ibiteganyiwe gukorwa.

Minisitiri w’Intebe yatanze ingero z’uko amashanyarazi yiyongera, harimo amashanyarazi aturuka ku mazi angana na MW 47.18; aturuka kuri peteroli angana na MW 25 (uruganda rwatangaga amashanyarazi aturuka kuri mazutu angana na MW 14 kuri CIMERWA rwavanweho); aturuka ku mwuka wa gazi metani angana na MW 26.4; aturuka ku zuba angana na MW 11.63; mu gihe aturuka kuri nyiramugengeri angana na MW 15.

Mu rwego rwo kongera amashanyarazi, yagarutse ku mishinga itandukanye yashyizwe mu bikorwa. Urugero nk’umushinga w’Urugomero rwa Rukarara I rutanga MW 9 rwuzuye mu 2010, Urugomero rwa Rukarara II rutanga MW 2.2 rwuzuye mu 2014, Urugomero rwa Giciye I rutanga MW 4 rwuzuye mu 2014.

Harimo n’uruganda rutanga amashanyarazi akomoka ku mirasire y’izuba rwa GigaWatt Global (Rwamagana) rutanga MW 8.5 rwuzuye mu 2014, Urugomero rwa Nyabarongo I rutanga MW 28 rwuzuye mu 2014, Uruganda rutanga amashanyarazi akomoka kuri gaze metane rwa KivuWatt rutanga MW 26.4 rwuzuye mu 2015, Urugomero rwa Giciye II rutanga MW 4 rwuzuye mu 2016 n’iyindi.

Ku ngomero ntoya Murekezi yasobanuye ingomero nto zirindwi (7) zirimo Rugezi (Burera), Nshili I (Nyaruguru), Nyirabuhombohombo (Nyamasheke), Nyabahanga (Karongi), Janja (Gakenke), Mukungwa II (Musanze) na Gashashi (Rutsiro) zuzuye hagati ya 2011 na 2013; zose zitanga MW 6.3.

Avuga ko eshanu muri izi ngomero nto zeguriwe abikorera kugira ngo bazitunganye zigere ku bushobozi bwazo bungana na MW 5.7 nk’uko amasezerano abiteganya uretse Nshili I na Nyabahanga zagiye ku isoko ntizibone abazifata ariko zizasubizwa ku isoko zimaze gusanwa.

Urugomero rwa Ntaruka na rwo rutanga MW 11.5; harateganywa kurusana rugakoresha ikoranabuhanga rigezweho kuko rwubatswe mu 1959. Harimo gukorwa inyigo yo kurusana imirimo yo kurusana izakorwa mu mwaka w’ingengo y’imari wa 2018-2019.

Hari imishinga minini yatangiye itanga icyizere

Ku byerekeranye n’iyindi mishinga yatangijwe mu rwego rwo kongera amashanyarazi, Minisitiri w’Intebe yagarutse ku rugomero rwa Rusumo u Rwanda ruhuriyeho n’Ibihugu by’u Burundi na Tanzania ruzaba rufite ubushobozi bwa MW 80 aho buri Gihugu kizabona MW 26.

Imirimo yo kurwubaka yatangijwe ku mugaragaro ku wa 30 Werurwe 2017 biteganyijwe ko izarangira mu 2020.

Uruganda ruzatanga amashanyarazi akomoka kuri nyiramugengeri rwatangiye kubakwa ku itariki 9 Mata 2017 mu karere ka Gisagara n’Abashoramari ba HQ Power (Hakan) ruzatanga MW 80, biteganyijwe ko imirimo izaba yarangiye mu 2020.

Inyigo yo kubaka urugomero rwa Rusizi III u Rwanda ruhuriyeho na Repubulika Iharanira Demukarasi ya Kongo n’Igihugu cy’u Burundi ruzatanga MW 147 yararangiye kandi Umushoramari (IPS & SN Power yo muri Norvège) yarabonetse.

Amasezerano hagati y’ibihugu bitatu (Tripartite Agreement) n’Umushoramari yarateguwe, hasigaye kuyashyiraho umukono. Amafaranga y’uyu mushinga yamaze kuboneka binyuze ku bufatanye na Banki y’Isi, Banki Nyafurika Itsura Amajyambere na Banki y’u Burayi Itsura Amajyambere.

Ku bufatanye n’Abashoramari b’Abanyarwanda, imirimo yo kubaka ingomero nto za Rukarara V (Nyamagabe) izatanga MW 5 na Ntaruka A (Nyaruguru) izatanga MW 2 yaratangiye. Biteganyijwe ko izarangira mu 2020.

Inyigo zo kubaka izindi ngomero nto za Rukarara VI (MW 6.8) na Giciye III (MW 7.2) zararangiye ndetse n’amasezerano hagati ya Guverinoma n’Abashoramari b’Abanyarwanda yamaze gushyirwaho umukono.

Murekezi ati “Hari inyigo yo kubaka ingomero nto 67 yamaze gukorwa zirimo n’izo maze kubabwira. Ubu Guverinoma irakomeza gushishikariza abashoramari b’Abanyarwanda kubaka n’izisigaye.’’

Ku byerekeye amashyuza, hakozwe igerageza ku musozi wa Kalisimbi hashingiwe ku bushakashatsi bw’ibanze bwari bwakozwe mu mwaka wa 2012 ku buryo budahagije. Nyuma yo gucukura, byagaragaye ko igipimo cy’ubushyuhe bungana na 74oC mu bujyakuzimu bwa m 3000 ko butatanga amashanyarazi kuko hakenerwa nibura 220oC. Uyu mushinga warahagaritswe.

Uretse kongera amashanyarazi, Umuyoboro mugari w’amashanyarazi wongerewe ubushobozi, uranagurwa ndetse n’imiyoboro iwushamikiyeho imwe n’imwe iravugururwa.

Ati “Mu myaka 7 ishize, u Rwanda rwakubye kabiri umuyoboro w’amashyanyarazi mugari uva kuri kilometero 371 ugera kuri kilometero 744.”

Imiyoboro ishaje iracyari inzitizi

Ku birebana n’inzitizi, Minisitiri w’Intebe yabwiye inteko zimwe mu nzitizi 9 zidindiza gahunda yo gukwirakwiza amashanyarazi mu gihugu. Zimwe muri zo ni ibikorwa bihenze byo kongera umuriro, ubushobozi buke bw’abakozi, imiyoboro ishaje aho hari zimwe mu ngufu zipfa ubusa, dore ko hari iyubatswe mu 1972 no mu 1959.

Depite Kalisa, Rusiha Gaston na Bagumisa bamwe mu batanze ibitekerezo, bashima byinshi Leta yakoze mu rwego rwo kwegereza abaturage amashanyarazi ku buryo basanga mu myaka mike iri imbere nta cyaro kizaba gihari bitewe nuko henshi bazaba bacanye.

JPEG - 92.2 kb
Abadepite bagize umwanya wo gutanga ibitekerezo

TWAGIRA WILSON

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE