2017-10-16 07:05:01 clouds 27o High | Kigali Rwanda

Dukurikire:
 
 

Umurimo w’ubushinjacyaha usaba kuba inyangamugayo – Minisitiri Murekezi

Yanditswe na IMVAHO NSHYA

Kuya 2017-07-11 05:25:51

 
Share on:
 
Yasuwe:117
 
Yavuzweho:200
 
10
 
10

Minisitiri w’Intebe, Murekezi Anastase, yakiriye indahiro z’abashinjacyaha babiri, Rudahusha Didier uherutse kugirwa umushinjacyaha mu Rukiko Rukuru na Kayitesi Claudine wagizwe umushinjacyaha mu Rukiko rw’Ibanze, ababwira ko umurimo w’ubushinjacyaha usaba kuba inyangamugayo.

Nyuma yo kwakira indahiro z’aba bashinjacyaha, ejo hashize ku wa 10 Nyakanga 2017, Minisitiri w’Intebe Murekezi Anastase yabibukije iby’ingenzi biranga uyu murimo, abasaba no kutazapfusha ubusa icyizere bagiriwe n’Umukuru w’Igihugu

Yagize ati “Murasabwa kutazapfusha ubusa icyo cyizere mwagiriwe n’Umukuru w’Igihugu n’Abanyarwanda twese muri rusange. Umurimo w’ubushinjacyaha ni umurimo ukomeye, ujyana n’inshingano ziremereye zo kurengera uburenganzira bwa muntu, uwo murimo usaba ko amategeko yose awugenga yubahirizwa ariko mbere ya byose uwo murimo ubasaba kuba inyangamugayo. Imyanzuro yose muzajya mufata izajye irangwa n’ubutabera bunyura abaturage baza babagana.”

Minisitiri w’Intebe yakomeje yibutsa aba bashinjacyaha kimwe n’abandi bose basanzwe muri uyu mwuga guhugukira amwe mu madosiye yamaze kugaragara ko ari mu byaha bikunze gukorwa cyane mu Rwanda.

JPEG - 121.7 kb
Minisitiri w’Intebe Murekezi Anastase hagati, iburyo bwe ni Rudahusha Didier naho ibumoso ahabanza ni Kayitesi Claude nyuma yo kurahira (Foto Primature)

Amadosiye y’ibyaha abashinjacyaha bo mu Rwanda basabwa kwitaho cyane ni arebana n’ibyaha by’ubwicanyi bukomeza kugaragara mu miryango, icuruzwa ry’ibiyobyabwenge byambukiranya imipaka ndetse n’icuruzwa ry’abantu.

Rudahusha Didier, nk’umushinjacyaha mushya mu Rukiko Rukuru, yavuze ko yiteguye gufatanya na bagenzi be asanze muri uyu mwuga mu gukomeza guhangana n’ibyaha bitandukanye bageza ubutabera bunoze ku Banyarwanda.

Abashinjacyaha barahiriye inshingano ni abahawe aka kazi n’Inama y’Abaminisitiri yateranye ku wa 26 Gicurasi 2017 iyobowe na Perezida wa Repubulika y’u Rwanda Paul Kagame.

NIYONSENGA SCHADRACK

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE