2017-12-12 14:14:08 clouds 27o High | Kigali Rwanda

Dukurikire:
 
 

2010-2017: Amazi meza yavuye kuri m3 123 000 agera kuri m3 182 000

Yanditswe na IMVAHO NSHYA

Kuya 2017-07-10 13:59:04

 
Share on:
 
Yasuwe:151
 
Yavuzweho:200
 
10
 
10

Mu myaka irindwi ishize ya manda ya kabiri ya Perezida Paul Kagame hakoreshejwe imbaraga nyinshi mu kongera umubare w’Abanyarwanda bagerwaho n’amazi meza, maze hubakwa inganda zitunganya amazi zinyuranye, bituma mu gihugu amazi meza aboneka ava kuri m3 123 000 ku munsi muri 2010, ubu ageze kuri m3 182 000 ku munsi.

Kugeza amazi meza ku baturage byajyanye na serivise z’isuku n’isukura mu gihe cy’imyaka irindwi ishize. Abagejejweho amazi meza biyongereye ku buryo bugaragara, kuko muri 2010 bari 74.5%, ubu bakaba bageze kuri 84.8% hagendewe ku ibarura rya kane ry’imibereho mu ngo rya 2013/2014 (EICV4), bivuze ko ubu biyongereye.

Ibikorwa byo gufata amazi na byo byateye imbere, kuko byavuye kuri 89% muri 2014 ubu bigeze ku 101%, mu gihe amazi apfa ubusa yagabanutse akava kuri 42% muri 2014, mu mwaka ushize wa 2016 akaba yari ageze ku gipimo cya 35.5% nk’uko bitangazwa na Minisiteri y’Ibikorwa remezo.

Hubatswe inganda umunani zitunganya amazi

Mu myaka 7 ishize, kuva muri 2010, hubatswe inganda umunani zitunganya amazi. Ibi byongereye amazi meza mu gihugu, ava kuri m3 123 000 ku munsi muri 2010, ubu akaba ageze kuri m3 182 000 ku munsi.

Inganda zitunganya amazi zubatswe mu myaka irindwi ishize, hari urwa Nzove II rutanga amazi angana na m3 25 000 ku munsi mu mujyi wa Kigali, urwa Gihengeri rutanga m3 2 500 ku munsi rukageza amazi meza ku baturage b’Akarere ka Gatsibo.

Hubatswe kandi uruganda rutunganya amazi rwa Nyabimata rutanga amazi angana na m3 1 500 ku munsi mu karere ka Nyaruguru, ndetse n’urwa Mata rutanga angana na m3 600 ku munsi mu karere ka Rusizi kimwe n’urwa Nkombo rutanga amazi angana na m3 720 mu karere ka Rusizi.

JPEG - 276.8 kb
Mu myaka irindwi ishize, hashyizwe imbaraga mu kongera amazi meza mu rwego rwo guteza imbere ubuzima bw’Abanyarwanda (Foto James R.)

Minisiteri y’Ibikorwa Remezo kandi itangaza ko hari izindi nganda eshatu zitunganya amazi zubatswe mu mushinga LVWATSAN II zikaba zitanga amazi angana na m310 210 mu turere twa Nyanza, Nyagatare na Kayonza.

Mu rwego rwo gukemura ikibazo cy’amazi make mu mujyi wa Kigali no kuyongera hagamijwe guhaza abayakeneye, Guverinoma y’u Rwanda yasinye kontaro na ‘Culligan International’ yo kwagura uruganda rwa Nzove II rukagira ubushobozi bwo gutanga amazi angana na m3 40 000 ku munsi, hakabaho kandi no kwagura uruganda rushya rwa Nzove I rutanga amazi angana na m3 40 000 ku munsi rukagira ubushobozi bwo gutanga angana na m3 65 000 ku munsi.

Kuva 2010, hasanwe hongererwa ubushobozi inganda 8 zitunganya amazi

Inganda zitunganya amazi zasanwe ni uruganda rwa Kadahokwa mu mujyi wa Huye maze amazi rwatangaga ava kuri m3 4 000 ku munsi agera kuri m3 8 500 ku munsi. Uruganda rwa Mpanga/Nyanza, na rwo rwongerewe ubushobozi, maze amazi rwatangaga ku munsi ava kuri m3 1 100 agera kuri m3 3 200.

Uruganda rutunganya amazi rwa Nyamabuye/Gicumbi, na rwo rwaravuguruwe, maze amazi rugeza ku baturage ava kuri m31 100 ku munsi aba m3 1 600 ku munsi. Urwa Gihuma na rwo rwongerewe ubushobozi, maze rutanga m3 3 900 ku munsi avuye kuri m3 1 900 ku munsi.

Uruganda rutunganya amazi rwa Cyondo/Nyagatare, rwongerewe ubushozi, ubu rutanga amazi angana na m3 11 000 ku munsi avuye kuri m3 5 100 ku munsi. Naho uruganda rutunganya amazi rwa Ngenda, nyuma yo kuvugururwa ruratanga angana na m3 4 500 ku munsi ruvuye kuri m3 2 500.

Hari kandi uruganda rwa Rwabusoro rutunganya amazi rwavuguruwe, rwongererwa ubushobozi, ruva ku mazi angana na m3 800 ku munsi, ubu ruratanga angana na m3 1 200 ku munsi. Urundi ni uruganda rutunganya amazi rwa Muhazi ubu rutanga angana na m3 3 200 ku munsi nyuma yo kongererwa ubushozi, avuye kuri m3 1 200 ku munsi.

Ibikorwa remezo bikwirakwiza amazi byarubatswe biranasanwa

JPEG - 43.6 kb
Bigaragara ko amazi yapfaga ubusa atarakoreshwa yagabanutse

Mu myaka irindwi ishize kandi habayeho gusana no kubaka ibikorwa remezo bigeza amazi ku baturage, ahubatswe kilometero (km) 2 168 mu bice by’icyaro, byafashije kugeza amazi meza ku baturage 1 481 680.

Binyuze muri gahunda PNEARII yo kugeza amazi meza mu cyaro, hubatswe imiyoboro y’amazi ifite uburebure bwa km 447 mu turere twa Musanze, Rulindo, Gicumbi, Karongi na Nyamasheke.

Binyuze mu mushinga wa EAMER (wo kugeza amazi mu cyaro mu turere twa Gatsibo, Nyagatare, Huye, Nyanza, Gisagara, Ruhango, Kamonyi, Rusizi na Nyamasheke) hubatswe imiyobo y’amazi n’ibijyanye na yo ireshya na km 269, bituma abagana na 158,225 muri utu turere babona amazi meza.

Binyuze mu mushinga wa PEPAPS mu bice by’icyaro, hubatswe imiyoboro y’amazi n’ibijyanye na yo ireshya na km 628 bihesha amazi meza abaturage 298 246 mu turere twa Nyaruguru, Gisagara na Huye.

Naho binyuze mu mushinga WASH mu Ntara y’Amajyaruguru n’iy’Iburengerazuba, hubatswe km 646 z’imiyoboro y’amazi n’ibikorwa remezo bijyanye na yo, bituma abaturage 522 669 babona amazi meza mu turere twa Burera, Musanze, Nyabihu na Rubavu.

Minisiteri y’Ibikorwa Remezo na none ivuga ko binyuze mu mushinhga PEPAPS mu bice by’icyaro, hubatswe imiyoboro ireshya na km 628 igeza amazi meza ku baturage 298 246 bo mu turere twa Nyaruguru, Gisagara na Huye.

JPEG - 34 kb
Uburyo amazi meza yagiye yiyongera abazwe muri metero kibe birashimishije

Na none binyuze muri WASH mu ntara y’Amajyaruguru n’iy’Iburengerazuba hubatswe ibikorwa remezo bireshya na km 646, bigeza amazi meza ku baturage 522 669 mu turere twa Burera, Musanze, Nyabihu na Rubavu.

Binyuze mu mushinga FEA hubatswe uburyo bwo kugeza amazi meza ku baturage bureshya na km 68, bityo abangana na 50 540 bagerwaho n’amazi meza mu turere twa Nyamagabe na Nyaruguru.

Ikindi ni uko binyuze mu mushinga wa JICA w’amazi, mu Ntara y’Iburasirazuba hubatswe ibikorwa remezo byo kugeza amazi meza ku baturage bireshya na km 92, byayagejeje ku bangana na 63 000 mu turere twa Kirehe na Ngoma.

MUGABO LAMBERT

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE