2017-11-17 14:59:33 clouds 27o High | Kigali Rwanda

Dukurikire:
 
 

Nyamasheke:Ikindi cyuma gipima abarwayi mu bitaro bya Bushenge cyaburiwe irengero

Yanditswe na IMVAHO NSHYA

Kuya 2017-07-09 14:46:23

 
Share on:
 
Yasuwe:619
 
Yavuzweho:200
 
10
 
10

Ibitaro bya Bushenge mu karere ka Nyamasheke byongeye kwibwa icyuma gipima indwara zinyuranye, zirimo n’iz’umuvuduko w’amaraso, kikaba cyibwe hatarashira amezi 3 hibwe ikindi, abayobozi b’ibi bitaro n’ababyivurizamo bakaba bakomeje guhangayikishwa n’iri yibwa ry’ibikoresho rya hato na hato.

Mu kiganiro n’Imvaho Nshya, umucungamutungo w’ibi bitaro Nkurikiyimana Edmond, yemeje aya makuru, avuga ko iki cyuma kimaze ibyumweru 2 cyibwe, bikaba byarabanje kugirwa ibanga banga ko bibangamira iperereza, kugeza ubu hakaba hagishakishwa aho giherereye, na we akemeza ko iki ari ikibazo gihangayikishije cyane, bwaba ubuyobozi ndetse n’abahivuriza.

Yagize ati “Ni byo twongeye kubura icyuma gikomeye cyane gipima indwara mu mubiri, kigafata ibipimo ngenderwaho byinshi icyarimwe (patient monitor), kikaba kibuze hatarashira amezi 3 tubuze ikindi cyo mu bwoko bumwe na cyo ariko cyari gifite ingufu kurusha iki nubwo biri mu gaciro kamwe.

JPEG - 351.8 kb
Ibitaro bya Bushenge byafashe ingamba zikarishye zo guhashya ubujura bukomeje kubibasira

Tukaba tugikurikirana ku bufatanye na Polisi ngo tumenye irengero ryacyo, hagati aho abakozi 4 barimo umuganga n’abaforomo 3 bakekwa bakaba bakomeje gukurikiranwa bari mu kazi, icyo iperereza rizatangaza akaba ari cyo kizaduha umwanzuro wo kugira icyo dukora.”

Nubwo uyu muyobozi avuga gutya ariko hari andi makuru aturuka muri bamwe mu bakozi b’ibi bitaro avuga ko abakurikiranwa bageze ku 10, barimo abaforomo 3, abatera ikinya 3, abakora isuku 3 n’umuganga umwe , aba bose bakaba bakomeje gukurikiranwa bari mu kazi.

Nk’uko bikomeza bivugwa n’uyu muyobozi, ngo iki cyuma cyabuze kuwa 24 Kamena nijoro, bukeye abari baraye izamu ntibaha ibikoresho abari babasimbuye, abiriwe barakora ariko mu ma saa cyenda y’igicamunsi baza kuvuga ko nta hererekanya ry’ibikoresho ryabayeho kandi hari icyuma gipima indwara batabona, ngo bibanza gukekwa ko cyaba kiri gukoreshwa mu zindi serivisi, ariko bigaragara ko cyaburiwe irengero.

Akomeza avuga ko byahise bimenyeshwa inzego z’umutekano iperereza rigatangira, na n’ubu rigikorwa.

Abajijwe icyo avuga kuri ubu bujura bukabije bukomeje kugaragara muri ibi bitaro, Nkurikiyimana yagize ati “Biduteye impungenge cyane kuba ibikoresho bikomeje kubura gutyo kandi hakabura iby’ingenzi binahenze, kuko nka kiriya cyari gifite agaciro ka 1.500.000 n’icy’ubushize kikaba cyari hafi agaciro nk’ako, tukabona bitangiye gukabya cyane bikaba byadusabye gufata izindi ngamba ngo duhangane n’iki kibazo.”

Mu ngamba avuga zahise zifatwa harimo ko sosiyete icunga umutekano muri ibi bitaro yasabwe kongera abakozi cyane cyane aba nijoro bakava kuri 6 bakaba nibura 10, gukaza ubugenzuzi mu binjira mu bitaro bose n’abakozi bagatangira gusakwa, gusaba abakozi kwita ku bikoresho bahabwa kuko bidashobora kubikwa ahubwo biba bikoreshwa buri kanya mu kuvura, no gushaka uburyo mu bitaro hashyirwamio kamera zicunga umutekano.

BAHUWIYONGERA SYLVESTRE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE