2017-10-16 07:05:01 clouds 27o High | Kigali Rwanda

Dukurikire:
 
 

Rayon Sports yashyikirijwe igikombe cya shampiyona

Yanditswe na IMVAHO NSHYA

Kuya 2017-07-09 10:10:07

 
Share on:
 
Yasuwe:94
 
Yavuzweho:200
 
10
 
10

Ikipe ya Rayon Sports yashyikirijwe igikombe cya shampiyona y’icyiciro cya mbere yegukanye muri uyu mwaka w’imikino 2016-2017.

Iyi kipe yashyikirijwe igikombe ejo hashize tariki 08 Nyakanga 2017 nyuma y’umukino wa gicuti wayihuje na Azam FC yo muri Tanzania.

Muri uwo mukino wabereye kuri Sitade ya Kigali i Nyamirambo, Rayon Sports yitwaye neza itsinda Azam FC ibitego 4-2.

Ibitego bya Rayon Sports byatsinzwe na Kwizera Pierrot, Nshuti Savio, Muhire Kevin na Nahimana Shassir naho Azam FC itsindirwa na Yahya Mudhatir na Yahya Mohamed.

JPEG - 430.7 kb
Abakinnyi ndetse n’abatoza ba Rayon Sports bishimira igikombe cya shampiyona bari bamaze gushyikirizwa (Foto Gentil)

Uyu mukino wari witabiriwe n’abafana b’iyi kipe ku bwinshi ndetse n’abayobozi batandukanye b’ishyirahamwe ry’umupira w’amaguru mu Rwanda “FERWAFA” gusa Perezida wa FERWAFA, Nzamwita Vincent De Gaule nta bwo yigeze ahagera nyamara byari byitezwe ko agomba kuba ari mu bashyikiriza ikipe ya Rayon Sports igikombe.

Visi Perezida wa FERWAFA, Kayiranga Vedaste ni we wari uhari nk’umuyobozi mukuru muri FERWAFA.

Abakinnyi ndetse n’abatoza ba Rayon Sports bambitswe imidali banashyikirizwa igikombe giherekejwe na sheki ya miliyoni 25 z’amafaranga y’u Rwanda.

Gusa nk’uko byatangajwe iyi shampiyona igitangira, ikipe yegukana igikombe cya shampiyona izajya ibona miliyoni 2 kuko yabashije kuza mu makipe 8 ya mbere, miliyoni 2 kuko yaje muri 4 za mbere ndetse na miliyoni 3 kuko yaje muri 2 za mbere zikiyongera kuri miliyoni 10 ahabwa ikipe zose zakinnye shampiyona y’icyiciro cya mbere.

Aya mafaranga yose akaba yaratanzwe n’umuterankunga wa shampiyona y’u Rwanda, Azam TV. Bivuze ko iyi kipe ya Rayon Sports yabonye miliyoni 42 zose hamwe.

Masudi yahise yegura

N’ubwo byari ibyishimo ku bakinnyi, abayobozi, abatoza ndetse n’abakunzi ba Rayon Sports muri rusange, umutoza Masudi Djuma yatangaje ko yeguye ku mpamvu ze bwite.

Gusa yavuze ko ashimira cyane abakunzi b’ikipe ya Rayon Sports kuko bamweretse urukundo cyane.

Masudi yavuze ko muri Rayon Sports ari mu rugo, ati “Mu rugo umwana aragenda akagaruka”. Yakomeje avuga ko nta kipe n’imwe agiyemo n’ubwo havugwaga Police FC na Mukura.

Uyu mutoza mu myaka ibiri amaze muri Rayon Sports yayihesheje igikombe cy’Amahoro 2016 ndetse n’igikombe cya shampiyona 2016-2017. Ubu yari afite amasezerano y’imyaka 3, ubu yarasoje umwaka wa mbere ku masezerano ye.

Ikipe ya Rayon Sports yegukanye igikombe cya shampiyona 2016-2017 kiba icya 8 mu mateka yayo. Iki gikombe yacyegukanye ifite amanota 73 irusha amanota 12 Police FC yari iyikurikiye.

Iki gikombe cyiyongereye ku cyo yatwaye mu 1975, 1981, 1997, 1998, 2002, 2004 na 2013.
BUGINGO FIDELE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE