2017-11-23 07:40:03 clouds 27o High | Kigali Rwanda

Dukurikire:
 
 

RURA mu ishoramari no kugeza serivisi zinoze ku bafatabuguzi n’abaturage

Yanditswe na IMVAHO NSHYA

Kuya 2017-07-07 08:29:15

 
Share on:
 
Yasuwe:139
 
Yavuzweho:200
 
10
 
10

Ubuyobozi bw’Urwego rw’Igihugu rushinzwe kugenzura imirimo imwe n’imwe ifitiye Igihugu akamaro (RURA) buvuga ko mu myaka irindwi ishize u Rwanda rwateje imbere ishoramari mu rwego rw’Ingufu, Amazi ,Isuku n’Isukura kandi na serivise zitangwa muri izi nzego zikarushaho kunozwa no kwegerezwa abaturage. RURA igaragaza ko nk’ingufu z’umuriro w’amashanyarazi zavuye kuri Megawatt 96 mu mwaka wa 2011-2012 ubu zikaba zigeze kuri Megawatt 205 muri uku kwezi kwa Kamena 2017.

Mu kiganiro ku bikorwa RURA imaze kugeraho kuva mu mwaka wa 2011 kugeza muri uyu mwaka wa 2017, Umuyobozi w’ishami rishinzwe ibijyanye n’ingufu, amazi isuku n’isukura , Eng.Alfred Dusenge BYIGERO yavuze ko RURA imaze gukora byinshi mu rwego rw’ingufu, amazi, isuku n’isukura birimo gufasha ibigo ndetse n’aba rwiyemezamirimo bakora ibikorwa byo gutanga ingufu z’amashanyarazi, amazi, isuku n’isukura gukora imirimo yabo neza kandi bakanatanga serivisi nziza ku baturage.

JPEG - 161.4 kb
Amashanyarazi ntabwo akiri ikibazo mu Rwanda; Mu masaha y’ijoro igice kinini cy’u Rwanda gihinduka urwererane.

Nk’uko Eng. BYIGERO yakomeje abivuga , ngo mu bikorwa RURA ikora mu rwego rw’ingufu , amazi, isuku n’isukura birimo gutanga impushya ( licenses& permits) ku bashaka gukora iyi mirimo. Eng. BYIGERO avuga ko hatanzwe impushya zitandukaye ku bantu bakora ibikorwa byo gutanga ingufu z’amashanyarazi , amazi isuku n’isukura aho ikigo gishinzwe gukwirakwiza amashanyarazi EUCL ( Energy Utility Corporation Limited) cyahawe impushya enye zirimo; uruhushya rwo kubyaza ingufu amashanyarazi, kuyatwara, kuyakwirakwiza ndetse n’urwo kuyacuruza mu gihugu no hanze.

Eng. BYIGERO yagize ati “Tumaze gutanga impushya enye kuri EUCL, tumaze gutanga impushya z’agateganyo ( provisional licenses) kuri ba rwiyemezamirimo 15, tumaze kandi gutanga impushya 22 z’abakora umurimo wo gukora no gutunganya ibikorwa by’amashanyarazi (Electrical installation permits ).”

Umuyobozi w’ishami rishinzwe ibijyanye n’ingufu, amazi isuku n’isukura muri RURA avuga ko usibye gutanga impushya banagira uruhare mu gushyiraho amabwiriza (regulations&guidelines), kugenzura iyubahirizwa ry’amategeko n’amabwiriza ku bakora imirimo yo gutanga serivise z’ingufu z’amashanyarazi, amazi isuku n’isukura, gukora ku buryo imirimo ifitiye igihugu akamaro ikomeza gutangwa idahagaze, kubungabunga inyungu rusange, kurengera no guteza imbere inyungu z’abahabwa n’abatanga serivisi z’ingufu z’amashanyarazi, amazi, isuku n’isukura, guteza imbere ikwirakwizwa rya serivisi zigenzurwa zikagera ku bafatabuguzi bose harimo abafite ubushobozi buke, abatuye mu cyaro n’abanyantege nke, gusuzuma (review) amasezerano y’ubucuruzi bw’amashanyarazi n’amazi (Power& Water Purchase Agreements), kugenzura ko ntabaryamira abandi ku isoko ry’abatanga izo servisi (fair competition). Harimo kandi no guteza imbere imikorere hakurikijwe Politiki ya Leta y’Ubukungu n’imari, guteza imbere no kongera ubumenyi rusange hamwe no kugira uruhare mu gushyiraho ibiciro.

JPEG - 82.6 kb
Uruganda rutanga ingufu ziturutse kuri Gas Methan ruri mu byongera umubare w’abakoresha amashanyarazi

Gushyira hamwe no kubahiriza amategeko n’amabwiriza, imbarutso y’umusaruro umaze kugerwaho

Umuyobozi w’ishami rishinzwe ibijyanye n’ingufu, amazi isuku n’isukura muri RURA Eng. Alfred D. BYIGERO avuga ko gushyira mu bikorwa gahunda za Leta bimaze kugeza u Rwanda ku ntambwe ishimishije mu rwego rwo kongera ingufu z’amashanyarazi, amazi , isuku n’isukura kuko byiyongereye mu myaka irindwi ishize mu buryo bugaragarira buri wese. Yagize ati “ Mu mwaka wa 2011-2012 abantu bagerwagaho n’amashanyarazi mu gihugu hose bari 10% ariko ubu bamaze gusaga 30% . Byose byaturutse kuri gahunda nziza Leta y’u Rwanda yashyizeho yo kongera ingufu z’amashanyarazi.”

Hubatswe inganda nini zitanga ingufu z’amashanyarazi, harimo uruganda rutanga ingufu z’amashanyarazi zituruka ku mirasire y’Izuba ruri i Rwamagana rufite ubushobozi bwo gutanga umuriro wa Megawatt 8,5, ari narwo ruganda runini muri Afurika y’Uburasirazuba mu kubyaza imirasire y’izuba ingufu z’amashanyarazi.

U Rwanda kandi rwabashije kubyaza ingufu z’amashanyarazi Gaz Methane iri mu kiyaga cya Kivu, aho uruganda rutunganya amashanyarazi akomoka kuri Gaz Methane igice cya mbere rwuzuye rukaba rwaratashywe umwaka ushize wa 2016, rufite ubushobozi bwo gutanga Megawatt 26.”

JPEG - 194.9 kb
Amazi meza yakomeje kongerwa ndetse na ba rwiyemezamirimo bakora ibijyanye no gucuruza amazi bariyongera

Politiki nziza yatumye ba rwiyemezamirimo mu bijyanye no gutanga ingufu z’amashyanyarazi biyongera

Eng. BYIGERO yavuze ko ba rwiyemezamirimo bakora imirimo yo gutanga ingufu z’amashanyarazi bakomeje kwiyongera aho bavuye kuri 0,35% mu mwaka wa 2011 ubu bakaba bageze kuri 51% mu mwaka wa 2017.

Yagize ati “Politiki yo kongera ingufu z’amashyanyarazi ndetse n’amazi yakomeje gushyirwamo imbaraga ndetse ba rwiyemezamirimo bashaka gukora aka kazi bakomeza koroherezwa. Ibigo bya REG/EUCL byashinze imizi birakorera mu gihugu hose ndetse na ba Rwiyemezamirimo (Independent Power Producers) bakora imirimo yo kongera ingufu z’amashanyarazi bakomeza kwiyongera. Nk’uko akomeza abivuga, ngo ibimaze kugerwaho binajyana no kwiyongera kw’abantu bakoresha ingufu z’amashanyarazi, aho n’ibiciro byayo ku bantu batifashije hamwe n’inganda byagabanutse . ikigereranyo cy’abafite amashanyarazi cyavuye kuri 10% muri 2011 kigera kuri 30% mu mwaka wa 2017.”

Kubyaza ingufu z’amashyanyarazi ingufu z’isubira byashyizwemo imbaraga

Eng. Alfred D. BYIGERO avuga ko kubyaza ingufu z’amashyanyarazi ingufu zisubira (Renewable Energy)nk’ amazi n’imirasire y’izuba byakomeje kwitabwaho aho ubu bigeze ku kigero cya 50%.

Ibiciro by’amashanyarazi byaragabanutse guhera mu ntangiriro z’umwaka wa 2017

JPEG - 161.4 kb
Amashanyarazi ntabwo akiri ikibazo mu Rwanda; Mu masaha y’ijoro igice kinini cy’u Rwanda gihinduka urwererane.

Nk’uko yakomeje abivuga, ngo gushyiraho ibiciro by’amazi n’amashanyarazi ni imwe mu nshingano za RURA ndetse ngo bikaba byarakozwe mu rwego rwo gukomeza inzira y’iterambere. Yagize ati ,“Ku bantu batifashije igiciro cy’amashanyarazi cyaragabanijwe kugira ngo babashe kubona ibyangombwa by’ibanze.” Ahandi igiciro cyagabanutse bigaragara ni ku nganda nto kugira ngo zibashe guhangana mu karere u Rwanda ruherereyemo. Mu rwego rwo gukomeza guteza imbere ubukerarugendo naho igiciro cy’amashanyarazi cyaragabanutse kuri za hoteli ndetse no ku nganda zitunganya amazi ( water treatment plants& water pumping stations) naho igiciro kiragabanuka, abandi bafatabuguzi basanzwe bo bakomeza kwishyura ibijyanye n’ibyo bakoresheje.”

Urwego rwo kongera amazi, isuku n’isukura rumaze gutera imbere

Umuyobozi w’ishami rishinzwe ibijyanye n’ingufu, amazi isuku n’isukura muri RURA Eng. Alfred D. BYIGERO avuga ko kuba u Rwanda rukomeje kurangwa n’isuku bitikora ahubwo ko hari aho bikomoka. Mbere y’umwaka wa 2011, gukusanya no gutwara imyanda bisa nkaho bitabagaho, nyamara ubu hari ba rwiyemezamirimo 23 bafite impushya zo gukora uyu murimo mu gihugu cyose. Hari kandi ba Rwiyemezamirimo 159 bahawe impushya zo gukora amasuku atandukanye ku mihanda no mu busitani rusange. Ibi byose bikaba bikomeje guhesha igihugu cyacu isura nziza mu ruhando rw’amahanga ku bigendanye n’isuku.

Yagize ati “Ibigo bikora imirimo yo gukwirakwiza amazi bimaze kuba byinshi, nyuma ya WASAC ubu dufite abandi ba rwiyemezamirimo 32 mu gihugu hose. Izi mpinduka zose zagaragaye nyuma yaho RURA ibyinjiriyemo ikuraho akajagari . Ubu ibikorwa byo gukwirakwiza amazi bikorwa n’Umuntu wabyize kandi ubishoboye.

JPEG - 82.6 kb
Uruganda rutanga ingufu ziturutse kuri Gas Methan ruri mu byongera umubare w’abakoresha amashanyarazi

Eng. BYIGERO yakomeje avuga ko hakomeje gutangwa impushya ku bantu bakora umurimo w’isuku ndetse hashyirwaho ibiciro binogeye buri muturage. Bamwe mu baturage baganiriye n’Imvaho Nshya bavuga ko amazi ari muri bimwe mu by’ibanze bari bakeneye ndetse bakaba bashimira Leta y’u Rwanda yabagejejeho amazi.

Bwankarikari Geoffrey, umuturage wo mu kagari ka Munini Umurenge wa Rwimbogo mu karere ka Gatsibo, kamwe mu duce twagiraga ikibazo cyo kubura amazi yatangarije Imvaho Nshya ko ubu bamaze kubona amazi kandi ko nyuma yo kubona amazi hari bimwe mu bibazo byabaye amateka.

Yagize ati “Ubu mu gace dutuyemo dufite amavomo atatu tumaze igihe kinini tuyabonye. Kuva twabona amazi abaturage bakize indwara ahanini zaturukaga ku mirire mibi.”Bwankarikari yakomeje avuga ko byose babikesha ubuyobozi bwiza bwa Nyakubahwa Perezida Paul Kagame.

Ikoreshwa ry’ibikomoka kuri Peteroli na Gaze rimaze gutera imbere

Umuyobozi w’ishami rishinzwe ibijyanye n’ingufu, amazi isuku n’isukura, Eng.Alfred BYIGERO yavuze ko RURA yatangiye kugenzura ibikomoka kuri Petroli na Gaze mu gihe cya vuba kuko ubusanzwe yagenzuraga ibijyanye no kubaka ibikorwa remezo bijyanye n’ibikomoka kuri Peteroli harimo Sitasiyo n’ízindi serivise.

Nk’uko yakomeje abivuga, RURA yahawe ububasha bwo kugenzura ibikomoka kuri Gazi na Petroli mu mwaka ushize harimo ibijyanye no kubyinjiza mu gihugu, gushyiraho ibiciro, ikoreshwa ryabyo hamwe n’ibindi bikorwa. Eng. Byigero yakomeje avuga ko ubu hamaze kujyaho itegeko rigena igenzurwa ndetse n’icuruzwa ry’ibikomoka kuri Gaze na Peteroli ryashyizweho mu mwaka wa 2013.

Eng. Alfred yagize ati “Ubu hariho itegeko rigenga ibijyanye n’icuruzwa n’ibikomoka kuri Peteroli, hari amabwiriza ajyanye n’iyubakwa rya Sitasiyo za Peteroli, hari amabwiriza ajyanye no gukoresha n’iyubakwa ry’ibigega bya Peteroli, hari amabwiriza yashyizweho y’ikoreshwa rya Gaze itekeshwa hamwe n’ibindi .

Umuyobozi w’ishami rishinzwe ibijyanye n’ingufu, amazi isuku n’isukura, Eng.Alfred BYIGERO yavuze ko ubu hasigaye hariho amabwiriza ajyanye no kubaka Sitasiyo bitandukanye n’uko mbere abantu babikoraga aho umuntu yifataga akubaka Sitasiyo aho yishakiye.

Yagize ati “Kuva mu mwaka wa 2014 ntabwo abantu bacyubaka Sitasiyo za Peteroli aho bashatse hose. Ubu tumaze gutanga impushya z’abantu bubaka amasitasiyo 58 ndetse n’umuntu umwe wubatse ibigega bibika Peteroli. Tumaze gutanga impushya icyenda z’agateganyo ku bantu bashaka gukora imirimo yo gutwara Gaze n’ibikomoka kuri Petroli.”

Umuyobozi w’ishami rishinzwe ibijyanye n’ingufu, amazi isuku n’isukura Eng.Alfred BYIGERO yavuze ko RURA ikurikirana buri kintu cyose kijyanye n’ingufu, amazi isuku n’isukura ikareba uko bigera ku baturage ndetse hakarebwa n’iba nta ngorane bishobora kubakururira.

Yifashishije urugero rw’íkibazo cy’umwe mu baturage bo mu karere ka Kamonyi wagirwagaho ingaruka n’itsinga z’amashanyarazi , agaragaza uburyo RURA yagirikiranye ndetse igategeka REG igahita igikemura.

Uburyo bwo kubika ibikomoka kuri Peteroli bwaravuguruwe

Umuyobozi w’ishami rishinzwe ibijyanye n’ingufu, amazi isuku n’isukura, Eng.Alfred BYIGERO yavuze ko mu mwaka wa 2011 ibigega bibika ibikomoka kuri Petroli byari bicye cyane kuko ngo u Rwanda rwari rufite ubushobozi bwo kubika ibikomoka kuri Petroli bwari kwifashishwa mu kwezi kumwe n’igice aho rwari rufite ubushobozi bwo kubika litiro miliyoni 31 ariko ubu bushobozi bumaze kwikuba inshuro zisaga eshatu n’igice kuko mu bubiko bw’ibikomoka kuri Petroli harimo litiro
74,075,000,000.

JPEG - 160 kb
Ubushobozi bwo kubika ibikomoka kuri Petelori bwikubye inshuro eshatu buva kuri litiro miliyoni 31 bukagera kuri litiro 74,075,000,00

Abakoresha Gas bamaze kwiyongera

Eng. Alfred BYIGERO yavuze ko mu myaka yashize abantu batari bazi niba na Gaze itekeshwa ibaho. Agaragaza ko mu mwaka wa 2011 abantu bakoreshaga Gaze itekeshwa bari 8% mu mujyi wa Kigali ariko ubu bakaba barazamutse bakagera kuri 12%. Naho mu mijyi yindi yunganira Kigali abakoresha gaze Mu mwaka wa 2012 bari kuri 2,3% ubu bageze kuri 3,5%. Eng. BYIGERO agira ati, “Mu ngamba dufite n’uko mu mwaka wa 2020 mu mujyi wa Kigali abantu bazaba bakoresha Gaze bazaba ari 30% naho mu mijyi yunganira Kigali bakagera ku 10%.”

Gas Methane yo mu Kivu yatangiye gutanga umusaruro

Eng.Alfred BYIGERO yabivuze Gaze Methane yatangiye gutanga umusaruro aho KIVU WATT iteganya gutanga ingufu z’amashanyarazi zikomoka kuri Gas Methane zigera kuri Megawatt 100 mu byiciro bibiri ndetse icyiciro cya mbere kikaba cyararangiye aho gitanga Megawatt 26.
Nk’uko yakomeje abivuga ibi ngo bijyana no gukomeza gukangurira abaturage gukoresha biogas mu rwego rwo kugabanya ikoreshwa ry’inkwi.
Ubuyobozi bwiza ni bwo shingiro ry’iterambere

Umuyobozi w’ishami rishinzwe ibijyanye n’ingufu, amazi isuku n’isukura muri RURA Eng. Alfred Byigero avuga ko ibikorwa byose bageraho ndetse n’iterambere igihugu gifite bikomoka kuri Politike nziza ya Nyakubahwa Perezida Paul Kagame. Yagize ati “Ibi byose kubigeraho tubikesha ubuyobozi bwiza dukesha Nyakubahwa Perezida wa Repubulika y’u Rwanda Paul Kagame uduha umurongo wa Politike tugenderaho ndetse n’inzego zitandukanye zafatanyije kugira ngo habeho uburyo buboneye abashoramari bakorera mu gihugu cyacu ndetse natwe bikatworohereza gufasha abashoramari bashaka kuza gukorera mu gihugu cyacu.

Uruhare rwa RURA ni ingenzi mu gushyiraho amabwiriza no kugenzura ko umurongo wifuzwa ukurikizwa bigatuma inzego z’imirimo ifitiye igihugu akamaro zigenzurwa na RURA ziyongera kandi zikanatera imbere, ari nako zunguka kandi na none zikarushaho kunoza imikorere, gutanga serivisi nziza ku bafatabuguzi barimo n’abaturage. Hari ndetse n’izatangiye gushyiraho uburyo bwo gukemura ibibazo by’abafatabuguzi. Iyo ibibazo bidakemutse umufatabuguzi agana RURA hanyuma ikamufasha kurenganurwa mugihe bigaragaye ko yarenganye.

JPEG - 293.7 kb
Uruganda rutunganya ingufu zikomoka ku mirasire y’izuba ruherereye i Rwamagana
atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE