2017-09-23 09:22:12 clouds 27o High | Kigali Rwanda

Dukurikire:
 
 

Bosenibamwe yasobanuye birambuye imikorere ya NRS, ikigo gishya yahawe kuyobora

Yanditswe na IMVAHO NSHYA

Kuya 2017-07-06 13:57:19

 
Share on:
 
Yasuwe:1077
 
Yavuzweho:200
 
10
 
10

Mu nama y’abaminisitiri yateranye ku wa Gatanu, tariki ya 30 yasohotsemo umwanzuro uvuga ko Bosenibamwe Aime yagizwe umuyobozi w’Ikigo cy’Igihugu gishinzwe igororamuco (National Rehabilitation Services, NRS).

Iki kigo cyashyizweho kugira ngo gihurize hamwe ibindi bigo bisanzwe bikora imirimo y’igororamuco bifasha gusubiza ku murongo abantu babangamira umudendezo w’abandi, barimo abakoresha ibiyobyabwenge, inzererezi, indaya, abajura boroheje, abazunguzayi, abasabiriza, abana n’abakuze barangwa n’imyitwarire ibangamye…

Mu kiganiro cy’ihariye Bosenibamwe yagiranye n’Imvaho Nshya ku wa 06 Nyakanga 2017, yasobanuye byinshi ku kigo gishya yashinzwe kuyobora.

Iki kigo kizakorana n’ibindi bitandukanye nabyo bisanzwe bifite aho bihurira n’umuco nyarwanda.

JPEG - 116.2 kb
Bosenibamwe Aime yasobanuye byinshi ku kigo gishya yahawe kuyobora

Yavuze ko ikigo cy’igihugu gishinzwe igororamuco, gisanze mu Rwanda hari ibindi bigo byinshi bifite mu nshingano zabyo umuco nyarwanda nk’Itorero ry’igihugu, RALC ndetse na za Minisiteri y’Umuco na Siporo, iy’urubyiruko n’ikoranabuhanga ndetse n’iy’iterambere ry’umuryango.

Ati “Kuba umuntu yahabwa umuco uboneye urumva ko ari ibintu bisaba inzego zitandukanye, ni no muri ya gahunda ya Leta yacu yo gukorera hamwe nk’ikipe, intego n’ubundi ikomeza kuba ya yindi ni iyo kuzamura imibereho myiza y’Abanyarwanda.”

Bosenibamwe avuga ko byaba ari ukwibeshya haramutse hagize abatekereza ko iki kigo gishya kije gutanga amafaranga ku babuze ibyo bakora bakishora mu buzererezi, kunywa urumogi, gusabiriza n’ibindi bibangamira umudendezo wa rubanda

Ati “Ntabwo tuzagorora umuco ngo noneho uwo muntu wagorowe nyuma y’igihe runaka umubwire ngo nasohoke agende, hazabaho uburyo bwo kubakurikirana, hazabaho kubasobanurira ko ubuzima barimo budakwiriye ariko nanone kubakura muri ubwo buzima ni ukubereka inzira ikwiriye mu buryo bufatika, si ukubaha aho bagana ni ukubereka aho bagana, ni ugufasha umuntu ariko na we yifasha.”

Icyakora ngo hari aho bizajya biba ngombwa ko hari abafashijwe na NRS bashyirirwaho koperative runaka bakayihurizwamo mu kubafasha kwifasha. Aba ngo bazajya bafasha gutegura imishinga yababyarira inyungu.

Ati “Ntabwo ikigo kizavuga ngo bariya bantu bazaba bakuwe mu mihanda, mu buraya, no mu bundi buzererezi ngo bazabe hari mu kigo aho bazaba bahugurirwa ubuziraherezo, ni ukubahugura tukabaha ubushobozi noneho nibasubira iwabo babaye abaturage nk’abandi bose hanyuma muri bwa bufatanye bw’inzego, inzego zibanze nk’uko zifite inshingano zo guteza imbere imibereho myiza y’abaturage zibe zabasha no kubafasha nabo.”

Ntabwo NRS izaba ari gereza

Bosenibamwe ati “Igikenewe ntabwo ari ugushyiraho DASSO n’abashinzwe umutekano ngo birirwe babirukankana, twe ntabwo tuje gukora ibitangaza bidasanzwe kurusha ibyo abandi bakoze mbere ariko tuje gushyiraho gahunda yo guhuza ibikorwa, kugira ngo rero aba bantu bose tubagereho tuzakoresha uburyo bwiza bwo kubegera aho bazaba bari, hazabaho gahunda yo kuvuga ngo ese bariya bantu baba barihe?”

Akomeza agira ati “Birumvikana ko abantu bose batahita babyumva ngo bishyikirize inzego, uwo tuzabona ko ahunga tuzamufata dukoresheje imbaraga za Leta ariko atari muri ntego yo kumufata ngo tumuhane cyangwa ngo tumufunge, ni ukugira ngo noneho ubone uburyo umusobanurira noneho ari hamwe. Ntawunanira umwigisha, ntabwo twemera ko hari umuntu nyamuntu unanirana burundu, ushobora kumwigisha agatoroka ariko byanze bikunze azageraho ajye ku murongo.”

Bosenibamwe kandi yavuze ko nta nshingano n’imwe iba yoroshye muri iki gihugu, uhereye ku mateka ya Jenoside yakorewe Abatutsi mu 1994 ndetse n’umuvuduko w’iterambere igihugu cyacu cyifuza ko abantu bose bakora cyane.

Gusa Bosenibamwe avuga ko afite ubunararibonye buhagije mu buyobozi bwa Leta aho yakoze imirimo itandukanye mbere yo gushingwa kuyobora NRS.

Asaba Abanyarwanda bose ubufatanye mu mirimo ya NRS

Abanyarwanda bose basabwe kuzagaragaza ubufatanye mu mirimo y’iki kigo cyane ko n’ubusanzwe mu muco nyarwanda nta muntu n’umwe wishimiraga kuba yarebera mu gihe Abanyarwanda bangirika biroha mu ngezo zitandukanye n’umuco w’igihugu.

Ati “Iki kigo kije kuba igisubizo gikomeye mu guhangana n’ibibazo bikibangamiye umuryango nyarwanda, turifuza rero gufatanya n’abantu bose kugira ngo abana bacu bareke uburaya, bave mu businzi, bajye mu miryango abantu bose bakabaho batekanye.

Kuba ikigo cy’igihugu gishinzwe igororamuco kiri mu nshingano za Minisiteri y’Ubutegetsi bw’Igihugu (MINALOC) byatumye ibindi bigo byari bisanzwe bifite aho bihurira n’igororamuco nka Iwawa na Gitagata bikurwa mu nshingano za Minisiteri y’urubyiruko na Minisiteri y’Uburinganire n’Iterambere ry’Umuryango, byose bigengwa n’iki kigo nacyo kigengwa na MINALOC.

NIYONSENGA SCHADRACK

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE